Zyozuwe 6 - Cebaara Bible 2010

Isirayɛli ye n Zyeriko jaa

¹ Zyeriko kpàánweegèle maa sámaga n tɔ́n gbanʔama Isirayɛli ye kéeli na. Syɔɔn faala da ni yirigi gi ni í, syɔɔn faala da wɔ́ɔ ni jǐn yaà í.

² A Yawe Zyozuwe pye: «Wéle, mii n Zyeriko, ní gi fànʔafɔw, ní gi kapɛɛnkpumɔn-sànbalibèle le mɔ kɔ́yi ni.

³ Yele kapɛɛnkpumɔn-nǎnbèle myɛ a ra kěgi máari canʔa o canʔa tɔlɔgɔ nibin. Mɔ a gi kpéʔele kánmi bee na bi taa canya kɔrɔni.

⁴ Sáriga-wòlobēle kɔrɔsiin a kíni kásuw yɛ́ʔɛ na ní bànyɛnyɛ tomaaya kɔrɔsiin ní. Canya kɔrɔsiin wógi na ye kěgi màʔa tɔlɔyɔ kɔrɔsiin, sáriga-wòlobèle sáā tòmaayi wíi.

⁵ Lǎli ni pe ga bànyɛnyi wìi lè gbanʔama, lǎli ni yele ga tòmaayi wìimɛ lóʔo lè, syɛ́ɛnbèle myɛ a yákpogèle wáa gbanʔama, kěgi tò a kabi too wiyɛɛ na, syɛ́ɛnbèle myɛ si n yɛlɛ paa lúru paa jǐn gbakama.»

⁶ A Nun jáaw Zyozuwe sáriga-wòlobèle yeri ní baa be pye: «Ki n yɛlɛ ye joogaanni kásu láa, sáriga-wòlobèle pèle kɔrɔsiin si bànyɛnyɛ tomaaya kɔrɔsiin láa bi kíni da syée Yawe joogaanni kásu yɛ́ʔɛ ma.»

⁷ Koro kàdoʔo ma a wi gi joo syɛ́ɛnmi ma níì jo: «Ye sɔ̀lɔ yaa kěgi máari, kapɛɛnkpumɔnbèle pèle si kíni bàā syée Yawe joogaanni kásu yɛ́ʔɛ ma.»

⁸ A gi kpéʔele àmɛɛ Zyozuwe da gi joo syɛ́ɛnbèle ma lè. Sáriga-wòlobèle kɔrɔsiin pe da bànyɛnyi tòmaaya kɔrɔsiin láa n kíni ni syée Yawe yɛ́ʔɛ ma lè, a be i sɔ̀lɔ́ ní i tòmaayi wíi ni syée, Yawe joogaanni kásu si i nyɛ be kurugo.

⁹ Kapɛɛnkpumɔnbèle bele maa kíni ni syée sáriga-wòlobèle yɛ́ʔɛ ma pe da ni tòmaayi wíi lè, á poro kàdoʔo ma wóbèle si taʔa joogaanni kásu na. A be i táanri ni syée, pé si i tòmaayi wíi.

¹⁰ Zyozuwe si maa gi joo n gbàn syɛ́ɛnmi ma níì jo: «Yele a kɔ́ ra yákpogèle wáa í, yele a kɔ́ gi yaʔa yákpogéle wáama í lóʔo í. Syɛɛnrɛ faala ga yɛlɛ di yiri yele nyɔ́ɔyi ni í fwɔɔ bi taa cángi í ba nan, gee ni mii a yele pye lè: ‹Ye yákpogèle wáa.› Lǎli bee ni, ye yákpogèle wáa.»

¹¹ A Yawe kásuw kěgi màʔa. Wi n gi màʔa tɔlɔgɔ nibin, koro kàdoʔo ma a be lúru n kári tɛɛkòrogi ma n sáà syɔ́ɔn yaà.

¹² A Zyozuwe sɔ̀li n yìri nyǐngi nyɔ́ɔ na, á sáriga-wòlobèle Yawe kásuw láa.

¹³ Sáriga-wòlobèle bele kɔrɔsiin má bànyɛnyi tòmaaya kɔrɔsiin pye lè Yawe kásuw yɛ́ʔɛ ma, a poro níì tánʔani séli ní i tòmaayi wíi. Kapɛɛnkpumɔnbèle bele maa pye pe yɛ́ɛgi na, á poro kàdoʔo ma wóbèle si taʔa Yawe kásuw na. A be i táanri ni syée, pé si i tòmaayi wíi.

¹⁴ Canziin wógi na, a be kěgi màʔa tɔlɔgɔ nibin níì lúru n kári tɛɛkòrogi ma. A be gi kpéʔele kánmi bee na n baa taa canya kɔrɔni.

¹⁵ Canya kɔrɔsiin wógi na a be yìri nyǐnjerigi na n kěgi màʔa kanijanmi na n baa taa tɔlɔyɔ kɔrɔsiin. Cángi bee yagana be kěgi màʔa tɔlɔyɔ kɔrɔsiin.

¹⁶ Tɔ́lɔyi kɔrɔsiin wóʔo na, lǎli ni sáriga-wòlobèle tòmaayi wíi lè, a Zyozuwe gi joo syɛ́ɛnmi ma níì jo: «Ki n yɛlɛ ye yákpogèle wáa, níì cán Yawe n kěgi kaan yele ma.

¹⁷ Kěgi ní gi fúngi yárira myɛ n yɛlɛ pe di kálagi péw àmɛɛ di yaʔa Yawe ma lè. Nànjaacew wi lè Arahabi, woro nibin wi yɛlɛ bi kòro sìi na, woro ní yala o yala li nyɛ ní wi ní kpáagi ni lè, níì cán bele wolo da tun lè woro wi baa be làriga.

¹⁸ Ki si n yɛlɛ yaa yeyɛɛ kɔ̀rɔsíi yáriri na, dee yele yɛlɛ bi yaʔa lè. Yáriri bee di yɛlɛ di yaʔa lè, yele a kɔ́ di tàa láa í, si yele Isirayɛli ye tɛɛkòrogi lége kálagigwɔɔli ni bi nyáʔamina yaʔa li nan gi na í.

¹⁹ Wálifiiw, ní tɛ́ɛw, ní kanyɛɛnri yárira, n fàra túnmɔri yárira na, toro myɛ n yaʔa Yawe ma kɔlɔ̀ na, ti a jée Yawe lɔ́ri tɛɛkɔngɔ ni.»

²⁰ A syɛ́ɛnmi yákpogèle wáa, á be tòmaayi wìi. Lǎli ni syɛ́ɛnbèle tòmaayi wìimɛ lóʔo lè, a be yákpogèle wáa gbanʔama, a tǒw kabi n too wiyɛɛ na, a syɛ́ɛnbèle myɛ nibin nibin lúgu n jée gbakama kěgi ni n gi jaa.

²¹ Yáriri myɛ di pye kěgi ni lè, a be ŋɔséew tɛ́ʔɛ n di kálagi n kwɔ́ɔ péw, gee bee n jo nǎnbèle, ní cébèle, ní pìíbèle, ní wolɛɛbèle n fàra yaweekpologèle ní yaweeyiligèle, ní jòfanibèle na.

Zyozuwe n Arahabi yaʔa sìi na

²² Nǎnbèle siin pe da sáà tári saanri n wéle lè, a Zyozuwe be pye: «Ye sa jée nànjaacew kpaʔa ni ye céw bee ní wi kpáagi wòolo myɛ yirige naa bi yɛlɛ ní kàligi ní yele da kpéʔele wi ma lè.»

²³ Nìgɔcaribèle be pye tundunlarabèle lè, a poro kári yaà n sáà Arahabi yirige naa, woro ní wi tóow, ní wi nɔ́ɔw, ní wi senyɛnbèle, ní wi kpáagi wòolo myɛ ní. A be wi kpáagi wòolo myɛ yirige n sáà télege Isirayɛli ye tɛɛkòrogi kàdoʔo ma.

²⁴ A be kěgi ní gi fúngi yárira myɛ sórigo. Kàjáa wálifiiw, ní tɛ́ɛw, ní kanyɛɛnri yárira n fàra túnmɔri wóro na, pe maa toro tɛ́ʔɛ Yawe kpáagi lɔ́rɔ tɛɛkɔngɔ ni.

²⁵ Arahabi wi lè nànjaacew, Zyozuwe maa woro yaʔa sìi na n fàra wi tóow kpaʔa wòolo myɛ, ní wi wóbèle myɛ na. Níì cán tundunbèle bele Zyozuwe da tórigo pe sa Zyeriko saanri wéle lè, wi maa sáà bele bee làriga. A wi tɛ́ɛn Isirayɛli ye níngi ni fwɔɔ n baa nan níjanʔa na.

²⁶ Lǎli bee ni a Zyozuwe syɛ́ɛnri naa joo ní kàliga ní níì jo: «Syɔ́ɔnwee wi ga baa yìri lè n níì Zyeriko kěgi naa faan, ki n yɛlɛ syɔ́ɔnw bee í dánga Yawe yɛ́ʔɛ ma. Wi ga gi kàpɔɔnw le, wi pìiseliw a kùu. Wi ga ni kpàánweegèle kɔ̀riyɔ nii, wi kàdotɔnw a kùu.»

²⁷ Yawe maa pye ní Zyozuwe ní, woro wee mɛ́ʔɛ ki da yiri lè tári myɛ ni.