Zyozuwe 5 - Cebaara Bible 2010

¹ Amɔri ye fànʔafɔbèle myɛ be pye lè Zyuridɛn jeligi na canʔajeemɛ ma n fàra Kanaan ye fànʔafɔbèle myɛ na be pye lè Sólomi Lòkpɔʔɔ nyɔ́ɔ na, a pe ga gi lóʔo Yawe n Zyuridɛnw waʔa Isirayɛli ye yɛ́ʔɛ ma fwɔɔ n taa a be sɔ̀lɔ, zɔ̀n ga níì pye be ni í, a fyáari be cò Isirayɛli ye yɛ́ʔɛ ma.

Isirayɛli ye kɛ́nɛw kéele Giiligali ni

² Lǎli bee ni a Yawe Zyozuwe pye: «Ki n yɛlɛ mi gbèrifɔn kàdɛnɛyɛ ŋɔ́géle sámaga mi ní mi Isirayɛli ye kɛ́nɛ.»

³ A Zyozuwe gbèrifɔnw kàdɛnɛyɛ ŋɔ́géle sámaga n tɛ́ʔɛ n Isirayɛli ye kɛ́nɛ Aralɔti dǎndamagi taana.

⁴ Nyǔngee na Zyozuwe be kɛ́nɛ lè koro gi nyɛ gee naa: Nǎnbèle bele myɛ pe da yiri Ezyipiti ni lè, poro bele be pye kapɛɛnkpumɔnbèle lè, poro myɛw maa kùu kólogi na fìími tára ni pe yirili kàdoʔo ma Ezyipiti ni.

⁵ Syɛ́ɛnbèle myɛ pe da yiri Ezyipiti ni lè poro maa kɛ́nɛw kpéʔele. Kàjáa syɛ́ɛnbèle myɛ be see fìími tára ni lè n be yaʔa tánʔani na pe yirili kàdoʔo ma Ezyipiti ni, pe da pe wàa kɛ́nɛ í.

⁶ Isirayɛli ye maa ni nyaari ni máari fìími tára ni n baa taa yɛ̀ʔɛlɛ togoye siin, fwɔɔ n taa kapɛɛnkpumɔn-nǎnbèle myɛ pe da yiri Ezyipiti ni lè, a poro myɛ baa kùu fìími tára ni àmɛɛ gi lè pe da fɔ̀lɔ n lóʔo Yawe ma í. A Yawe si kàli níì jo woro a fɔ̀lɔ bi be yaʔa be tári nyaa í, dee nyɔɔfaliga woro da kpéʔele be toolɛɛbèle ma lè níì jo woro a di kaan wolo ma, tári di nyìn nɔ́nɔw ní sárigi na ni fóo lè.

⁷ Pe pìíbèle si wi baa télege di ni be sìndɛɛgi ni. Poro si Zyozuwe baa kɛ́nɛ, níì cán pe maa pye sìngɛ́nɛbéle àmɛɛ gi nyɛ lè pe da be kɛ́nɛ kólogi na í.

⁸ Lǎli ni be syɛɛnfelegi myɛ kɛ́nɛ n kwɔ́ɔ lè, a be kòro tɛʔɛ̀ nibin ni tɛɛkòrogi ni fwɔɔ bi taa be pɔʔɔ.

⁹ A Yawe gi joo Zyozuwe ma níì jo: «Mii n Ezyipiti fɛ̀ɛ́ri pɛ́ɛ n láʔa yele na níjanʔa.» Koro na be tɛ́ɛgi be mɛ́ʔɛ le ni gi yiri Giiligali, a mɛ́ɛgi bee kòro gi na fwɔɔ n baa nan níjanʔa na.

Sɔ̀lɔ-mí-yaʔali sériselio Kanaan tári ni

¹⁰ A Isirayɛli ye tɛ́ɛn Giiligali ni, níì Sɔ̀lɔ-mí-yaʔali séri kpéʔele yaà yégi canya kɛɛ ní sicɛrɛ wóʔo na, cângwɔɔgi nyɔ́ɔ na, Zyeriko tɛɛfiiyi na.

¹¹ Sɔ̀lɔ-mí-yaʔali séri canʔa nyǐndaliga na, a be tári yaliifálaraa lìi, levé fun búru ní yaliipyá be lìi cángi bee tiimaa, wee be kála lè.

¹² Cángee na be tári yaliifálara lìi lè, a ki ga pye nyǐndaligi na, a mánɛw ceri. Isirayɛli ye ga níì mánɛ taa í, a be kòro ni Kanaan tári yaliifálara líi yɛ́ɛli bee.

Yawe kapɛɛnkpumɔnbèle kàfɔlɔ

¹³ N Zyozuwe yaʔa Zyeriko taana, a wi kɔ́ɔ̀ wi yɛ́ɛgi yìrige n wéle n nànwaa nyaa wiyɛɛ yɛ́ʔɛ ma woyéreo ní, ŋɔsée si i nyɛ wi kɔ́gi ni wowaaɔ ní. A Zyozuwe nùuni wi na ní sáà wi pye: «Ní wolo ní lé mɔ nyɛ láà ba fwɔɔ wolo nígoobèle ní mɔ nyɛ?»

¹⁴ A wi jo: «Eʔe, mii i nyɛ Yawe kapɛɛnkpumɔnbèle kàfɔlɔ, a mii pan wi wee tɔ́ɔliw ni.» A Zyozuwe too n yɛ́ɛgi cíbele tári na n wi kpɔ̀ʔɔrɔ níì jo: «Ni kàfɔlɔ, nyàʔá mɔ caa bi joo mɔ falipyew ma wi lè mii?»

¹⁵ A Yawe kapɛɛnkpumɔnbèle kàfɔlɔ Zyozuwe pye: «Mɔ taʔalayi wòlo mɔ tɔ́lɔyi na, níì cán tɛ́ɛgee ni mɔ yére lè, ki i nyɛ tɛɛcànga.» A Zyozuwe gi kpéʔele.