Zyozuwe 4 - Cebaara Bible 2010

Sɔ̀ngudaari kàdɛnɛyɛ kɛɛ ní siin kéele

¹ Lǎli ni syɛɛnfelegi myɛ Zyuridɛnw jeli n kwɔ́ɔ lè, a Yawe gi joo Zyozuwe ma níì jo:

² «Ki n yɛlɛ ye nànbēle kɛɛ ní siin nyɛ́nɛ ye wòlo syɛ́ɛnbèle ni, gee bee n joo syɛɛnfelege o syɛɛnfelege ni nàɔn nibin.

³ Yé syɛ́ɛnri naa joo ye gbàn be ma yé be pye: ‹Ki n yɛlɛ ye kàdɛnɛyɛ kɛɛ ní siin láa nɛɛ naa Zyuridɛnw nínge ni, tɛ́ɛgee ni sáriga-wòlobèle yére tɔ́lɔyi na lè, yaa syée ní yi ní ye sa yi tɛ́ʔɛ tɛ́ɛgee ni yele a syɔ́ɔn lè yébiligi ni.› »

⁴ A Zyozuwe nǎnbèle kɛɛ ní siin yeri, bele wi da nyɛ́nɛ n wòlo lè Isirayɛli ye níngi ni syɛɛnfelege o syɛɛnfelege ni, nàɔn nibin.

⁵ A Zyozuwe baa be pye: «Yaa syée ye sa kàdɛnɛyɛ nibin nibin láa Yawe yele Kolocɔlɔw joogaanna kásu yɛ́ʔɛ ma Zyuridɛnw nínge ni ye taʔala yele fókaannyunyi na bi yɛlɛ ní Isirayɛli ye syɛɛnfeleyi nyɔ́ɔ ní,

⁶ jàngó gee bee í pye fɛ̀ɛ yele níngi ni. Lǎli ni yele pìíbèle ga kɔ́ baa yele yíbe lè nyɛ̀ʔɛna níì jo: ‹Nyàʔá gi nyɛ kàdɛnɛyi naa kɔ́rɔ yele ma?›

⁷ Ye gi joo be ma yé be pye: ‹Koro n taa ncan Zyuridɛn lógi maa ceri Yawe joogaanni kásu yɛ́ʔɛ ma. Lǎli ni wi da ni Zyuridɛnw jelegi lè Zyuridɛn lógi maa ceri.› Kàdɛnɛyi naa si a kòro sɔ̀ngudaara yáriga Isirayɛli ye ma làla o làla.»

⁸ A Isirayɛli ye gi kpéʔele n yɛlɛ ní gi ní àmɛɛ Zyozuwe gi joo n gbàn lè. Pe n sáà kàdɛnɛyi kɛɛ ní siin láa Zyuridɛnw nínge ni n yɛlɛ ní Isirayɛli ye syɛɛnfeleyi nyɔ́ɔ ni àmɛɛ Yawe da gi joo Zyozuwe ma lè. A be kári ní yi ní n sáà tɛ́ʔɛ tɛ́ɛgee ni be sáà syɔ́ɔn lè.

⁹ Sáriga-wòlobèle pe da joogaanni kásu láa lè, tɛ́ɛgee ni poro da yére tɔ́lɔyi na lè, a Zyozuwe kàdɛnɛyaa kɛɛ ní siin taʔala yaà yiyɛɛ na tɛ́ɛgi bee ni Zyuridɛnw nínge ni. Yi i yaà fwɔɔ n baa nan níjanʔa na.

¹⁰ Sáriga-wòlobèle pe da joogaanni kásu láa lè, pe maa yére n kòro nya Zyuridɛnw nínge ni fwɔɔ bi taa gee Yawe da joo n gbàn Zyozuwe ma wi joo syɛ́ɛnbèle ma lè, n yɛlɛ ní gee myɛ ní Mowizi da joo n yaʔa Zyozuwe ma lè koro myɛ í foro. A syɛ́ɛnbèle jeli kelekele.

¹¹ Lǎli ni syɛ́ɛnbèle myɛ jeli n kwɔ́ɔ lè péw, a sáriga-wòlobèle náà sɔ̀lɔ n kíni pe yɛ́ɛgi na ní Yawe joogaanni kásu ní.

¹² Wurubɛn ye, ní Gadi ye, ní Manase syɛɛnfelegi tíla maa kíni Isirayɛli wóbèle bele yɛ́ʔɛ ma ní kapɛɛnkpumɔn-yárira ní, n yɛlɛ ní gi ní àmɛɛ Mowizi da gi joo be ma lè.

¹³ Kapɛɛnkpumɔnbéle sirakamayɛ siin félege maa pye ní kapɛɛnkpumɔn-yáriri ní kapɛɛnni kánma na ni syée Yawe yɛ́ʔɛ ma Zyeriko tɛɛfiiyi kàbaan na.

¹⁴ Cángi bee na a Yawe Zyozuwe kpɔ́ʔɔ Isirayɛli ye myɛ nyɛ́nɛ na, a be i fɛ̀ɛgí wi na wi sìíw canya myɛ ni àmɛɛ pe da ni fɛ̀ɛgí Mowizi na lè.

¹⁵ A Yawe Zyozuwe pye:

¹⁶ «Sáriga-wòlobèle be séeraw joogaanna kásu láa lè, ki n yɛlɛ mi gi joo be ma pe yiri nya Zyuridɛnw ni.»

¹⁷ A Zyozuwe syɛ́ɛnri naa joo sáriga-wòlobèle ma níì jo: «Ye yiri Zyuridɛnw ni.»

¹⁸ Sáriga-wòlobèle pe da Yawe joogaanni kásu láa lè, lǎli ni be yiri Zyuridɛnw nínge ni lè n be yédaagèle taʔa táwaari na, lǎli bee ni a Zyuridɛn lógi lúru n jée gi tɛɛlɛɛgi ni ni fóo, níì nyìn n kabi n fala seʔe tári ni àmɛɛ ki da sélì pye lè.

¹⁹ Yɛ́ɛli yézelige canya kɛɛ wóʔo na syɛ́ɛnbèle Zyuridɛnw jeli, ní sáà tɛ́ɛn Giiligali ma, Zyeriko láʔali na canʔafolomɔ ma.

²⁰ Kàdɛnɛyee kɛɛ ní siin pe da láa Zyuridɛnw ni lè, a Zyozuwe yoro taʔala yiyɛɛ na yaà Giiligali ni.

²¹ A wi gi joo Isirayɛli ye ma níì jo: «Yele pìíbèle ga kɔ́ baa yele yíbe nyɛ̀ʔɛna níì jo: ‹Nyàʔá gi nyɛ kàdɛnɛyi naa kɔ́rɔ?›

²² Ye yi kéeli tɛ́ʔɛ ye be tama yé jo: ‹Isirayɛli ye n Zyuridɛnw naa jeli táwaara na.

²³ Níì cán Yawe yele Kolocɔlɔw maa Zyuridɛn lógi waʔa yele yɛ́ʔɛ ma fwɔɔ n taa a yele sɔ̀lɔ, àmɛɛ Yawe yele Kolocɔlɔw da gi kpéʔele Nyɛ́nɛri Solomɔ Lɔ́ʔɔ na wi da waʔa wolo yɛ́ʔɛ ma lè fwɔɔ n taa a wolo sɔ̀lɔ,

²⁴ jàngó tári syɛɛnfeleye myɛ í gi cán bi cán Yawe kɔ́gi i nyɛ sée kɔ́lɔ, yele sáā fɛ̀ɛgí Yawe yele Kolocɔlɔw na làla o làla.› »