Zyozuwe 3 - Cebaara Bible 2010

Zyuridɛnw jelile kéele

¹ A Zyozuwe sɔ̀li n yìri nyǐngi nyɔ́ɔ na. A wi ní Isirayɛli ye myɛ yiri Syitimi ni n kári n sáà nan Zyuridɛnw na. Sáni be jeli lè a be syɔ́ɔn nɛɛ bee.

² A canya taanri ga kwɔ́ɔ, a yɛɛ̀kinibèle nyaari nyaari n sɔ̀lɔ tɛɛkòrogi ni

³ n syɛ́ɛnri naa joo n gbàn syɛ́ɛnmi ma níì jo: «Levii ye wóbèle be lè sáriga-wòlobèle, lǎli ni yele ga be nyaa a be Yawe yele Kolocɔlɔw joogaanna kásu láa lè, tɛ́ɛgi naa ni yele nyɛ lè ki n yɛlɛ ye yiri gi ni ye taʔa wi na.

⁴ Cúlo nibin félege si n yɛlɛ wi pye yele ní wi níngi ni, yele a kɔ́ nùuni wi na í. Kólogee yele yɛlɛ bi láa lè, woro wi a gi tɛ̀ɛn yele na, níì cán yele ga kɔ́ɔ̀ sɔ̀lɔ n nyaa kólogi bee ni í.»

⁵ A Zyozuwe gi joo syɛ́ɛnbèle ma níì be pye: «Ki n yɛlɛ ye yeyɛɛ zámaga ye yaʔa, níì cán nyɛ̀ʔɛna Yawe a kakpoloyo kpéʔele yele níngi ni.»

⁶ A Zyozuwe gi joo sáriga-wòlobèle ma níì be pye: «Ki n yɛlɛ ye joogaanni kásu láa ye kíni syɛ́ɛnbèle yɛ́ʔɛ na.» A be joogaanni kásu láa n kíni syɛ́ɛnbèle yɛ́ʔɛ na.

⁷ A Yawe gi joo Zyozuwe ma níì wi pye: «Níjanʔa mii a mɔ kpɔ́ʔɔli kéele séli Isirayɛli ye myɛ nyɛ́nɛ na, koro ga pye pe gi cán bi cán mii i nyɛ ní mɔ ní àmɛɛ mii da pye ní Mowizi ní lè.

⁸ Mɔ si na, sáriga-wòlobèle be joogaanni kásu láa lè, ki n yɛlɛ mi syɛ́ɛnri naa joo mi gbàn be ma mí be pye: ‹Yele ga sáà nan Zyuridɛn lógbew na, ye yére Zyuridɛnw ni.› »

⁹ A Zyozuwe Isirayɛli ye pye: «Ki n yɛlɛ ye nùuni nɛɛ naa ye ba Yawe yele Kolocɔlɔw syɛ́ɛnrɛ lóʔo.»

¹⁰ A Zyozuwe jo: «Gee naa a gi tɛ̀ɛn yele na yele í gi cán bi cán Kolocɔlɔɔ woweew i nyɛ yele níngi ni, si wɔ́ɔ gi cán bi cán wi a tɔ̀nɔ́ syɛ́ɛnbèle naa nɛnɛ yele yɛ́ʔɛ ma, poro bele be nyɛ lè Kanaan ye, ní Hɛti ye, ní Hɛvi ye, ní Perezi ye, ní Giirigasi ye, ní Amɔri ye, n fàra Yebusi ye na.

¹¹ Ye wéle, wee wi nyɛ lè tári myɛ Kàfɔlɔ, woro joogaanni kásu wi a kíni yele yɛ́ɛgi na bi sa jée Zyuridɛnw ni.

¹² Tɔ́ɔliw ni ki n yɛlɛ ye nànbēle kɛɛ ní siin nyɛ́nɛ ye wòlo Isirayɛli syɛɛnfeleyi ni, gee bee n jo syɛɛnfelege o syɛɛnfelege í nàɔn nibin kaan.

¹³ Yawe wi lè tári myɛ Kàfɔlɔ, sáriga-wòlobèle be wi joogaanni kásu lée lè, poro ga tɛ́nɛ sáà nyɔ̌ngèle le Zyuridɛn lógi ni, lǎli bee ni Zyuridɛn lógi a ceri. Gee gi yìrigí ǹjoʔo ma ni fóo ni tíri lè, koro a yére bi kpoʔolo yaà.»

¹⁴ Lǎli ni syɛ́ɛnbèle yìri tɛɛkòrogi ni bi Zyuridɛnw jeli lè, sáriga-wòlobèle be joogaanni kásu láa lè, a poro kíni pe yɛ́ɛgi na ni syée.

¹⁵ Ki si maa pye yaliiri làrilaala ni. Lǎli bee ni Zyuridɛnw gáà nyìn n kabi n fala seʔe tári ni. Sáriga-wòlobèle be joogaanni kásu láa lè, a poro ga sáà nan Zyuridɛnw na níì be tɔ́lɔyi le lǒgi ni kàgogi na,

¹⁶ lǎli bee ni lǒgi gi yìrigí ǹjoʔo ma ni fóo ni tíri lè, a koro yére yaà n kpoʔolo kiyɛɛ na. A lǒgi bee kpoʔolo kiyɛɛ na fwɔɔ n sáà nan Saritan taana kěgi na pe yiri lè Adami. Gee si ki da ni fóo ni syée Araba Sólomi Lɔ̀ʔɔ ma lè, ki lè solonɛʔɛmi lɔ̀ʔɔ a koro sɔ̀lɔ n tìgi kelekele n ceri. A syɛ́ɛnbèle Zyuridɛnw jeli Zyeriko zǐnmi na.

¹⁷ Sáriga-wòlobèle pe da Yawe joogaanni kásu láa lè, a poro sámaga n yére tɛɛwaagi ni n kòro nya Zyuridɛnw nínge ni. A Isirayɛli ye myɛ i sɔ̀lɔ́ tɛɛwaagi ni fwɔɔ n taa a syɛɛnfelegi myɛ baa sɔ̀lɔ n kwɔ́ɔ n Zyuridɛnw jeli.