Zyozuwe 24 - Cebaara Bible 2010

Isirayɛli ye n gi kɔ̀rirɔ bàā báara Yawe ma

¹ A Zyozuwe Isirayɛli syɛɛnfeleyi myɛ yeri n kpóʔoro Sisyɛmi ma, pe lè pe wolɛɛbèle, ní be kùndigibèle, ní be kútiijoobèle n fàra be yɛɛ̀kinibèle na. A be pan n baa kpóʔoro Kolocɔlɔɔ yɛ́ʔɛ ma.

² Lǎli bee ni a Zyozuwe syɛ́ɛnmi myɛ pye: «Yawe wi lè Isirayɛli ye Kolocɔlɔw, wi n jo: ‹Booma ni yele tóolɛɛbèle maa pye wodɛ́ɛnbéle ní cábigi jelige na pe lè Tera kpáagi wòolo wi lè Abirahami ní Nahɔri tóow. Pe maa ni báara kolocɔlɔbèle pèle nikwɔɔlɔ ma.

³ A mii yele tóolɛɛgi Abirahami láa yaà cábigi jelige na, ní baa wi yɛ́ɛgi kíni n Kanaan tári myɛ nyaari n foro. A mii wi yòdaʔayi nɛʔɛ. Mii maa Izaaki kaan wi ma,

⁴ ní baa Zyakɔbi ní Ezau kaan Izaaki ma. Mii n Seyiiri nyanbeleyi kúlo kaan Ezau ma jàngó li pye wi wolò. A Zyakɔbi ní wi jáabèle kári Ezyipiti ma.

⁵ Koro kàdoʔo ma a mii Mowizi ní Aarɔn tun, mii n wɔʔɔyɔ taʔa Ezyipiti na n yɛlɛ ní kérigèle ní mii kpéʔele wi níngi ni lè níì yele yirige yaà.

⁶ Mii n yele tóolɛɛbèle yirige Ezyipiti ni, a yele i syée n sáà nan Sólomi Lɔ̀ʔɔ na. A Ezyipiti ye yiri n taʔa yele tóolɛɛbèle na ni nɛnɛ ní kapɛɛnkpumɔn-wòtorobéle ní n fàra syɔɔnyɔ fɔ̀ɔlɔ na fwɔɔ n sáà nan Nyɛ́nɛri solomɔ lɔ́ʔɔ na.

⁷ Lǎli bee ni a yele tóolɛɛbèle yákpogèle wáa mii Yawe kurugo, a mii yébilimɛ lége yele ní Ezyipiti ye níngi ni, níì Sólomi Lɔ̀ʔɔ tɛ́ʔɛ n be tɔ́n. Gee mii kpéʔele Ezyipiti na lè, yele nyapiigèle n gi nyaa. Yele n tɔ̀nɔ n tɛ́ɛn n mɔn fìími tára ni.

⁸ Mii n pan ní yele ní Amɔri ye tári ma, poro bele be pye lè Zyuridɛnw canʔafolomɔ ma. A pe baa yìri n kapɛɛnni kpúmɔn ní yele ní, a mii be le yele kɔ́yi ni, a yele be tári syɔɔ n taa. Mii n be kálagi yele yɛ́ʔɛ ma.

⁹ Sipɔɔri jáaw Balaki wi pye lè Mowabi fànʔafɔw, a woro yìri bi kapɛɛnni kpúmɔn ní yele Isirayɛli ye ní, níì tun Beyɔɔri jáaw Balaami ma níì jo wi ba yele dánga.

¹⁰ Kàjáa mii ga baa fɔ̀lɔ n lóʔo Balaami ma í. A wi kòro ni dùbaw kpéʔele yele ma, a mii yele yirige Balaki kɔ́gi ni.

¹¹ A yele Zyuridɛnw jeli n sáà nan Zyeriko na. A Zyeriko ye kapɛɛnnɛ kpúmɔn ní yele ní n fàra Amɔri ye, ní Perezi ye, ní Kanaan ye, ní Hɛti ye, ní Giirigasi ye, ní Hɛvi ye,ní Yebusi ye na. A mii be le yele kɔ́yi ni.

¹² A mii zèrenaàjiriye tórigo yele yɛ́ʔɛ ma, a yi sáà Amɔri ye fànʔafɔbèle bee siin nɛnɛ n yirige yaà yele yɛ́ʔɛ ma. Koro ga kpéʔele mɔ ŋɔséew wàlá mɔ sedegi báriga ni í.

¹³ Mii n tára kaan yele ma, dee di lè yele ga fɔ̀rɔ ní di ní í, ní kèye ní, yee yi lè yele ban ye yi faan í, ní baa tɛ́ɛn yi ni, ní ɛrɛzɛn tírire, ní olivye tíire, a yele i líi, dee di lè yele ban ye di cɔ́rɔ í.›

¹⁴ Tɔ́ɔliw ni ki n yɛlɛ yaa fɛ̀ɛgí Yawe na yáā báara wi ma ní funvii, ní kányɛɛgi na. Kolocɔlɔbèle bele má yele tóolɛɛbèle da ni báara lè cábigi jeligɔgee na, ní bele má pe da ni báara lè Ezyipiti ni, ki n yɛlɛ ye be yirige yaà yáā báara Yawe ma.

¹⁵ Kapye yele o caa bàā báara Yawe ma í, wee má yele a ra báara lè, ye wee bee nyɛ́nɛ ye wòlo níjanʔa, gee bee n jo kolocɔlɔbèle bele má yele tóolɛɛbèle da ni báara lè cábigi jeligɔgee na, wàlá Amɔri ye tári ni yele tɛ́ɛn lè, poro kolocɔlɔbèle. Mii ní mii kpáagi wòolo si na, Yawe má wolo a ra báara.»

¹⁶ A syɛ́ɛnmi wi yari: «Bi Yawe yaʔa sáā báara kolocɔlɔbèle pèle nikwɔɔlɔ ma, ki n yɛlɛ sɔ̀nguri bee í léeli wolo na.

¹⁷ Níì cán Yawe wi nyɛ wolo Kolocɔlɔw, woro wi wolo ní wolo tóolɛɛbèle yirige Ezyipiti tári ni, púlori kpaʔa ni. Woro wi kakpolo-kpèleyi bee kpéʔele wolo nyɛ́nɛ na. Woro wi wolo kpáaw wéle tánʔani làla myɛ ni wolo kpéʔele lè, ní syɛɛnfeleyee myɛ nínge ni wolo foro lè.

¹⁸ Yawe n syɛɛnfeleyi myɛ nɛnɛ n yirige yaà wolo yɛ́ʔɛ ma n fàra Amɔri ye na be pye lè wodɛ́ɛnbéle ní tári naa ni. Yawe má wolo a wɔ́ɔ ra báara, níì cán woro wi nyɛ wolo Kolocɔlɔw.»

¹⁹ A Zyozuwe syɛ́ɛnmi pye: «Yele a gbǎn ra báara Yawe ma í, níì cán woro wi nyɛ Kolocɔlɔw wojaɔn. Wi i nyɛ yejaʔa Kolocɔlɔɔ. Wi a fɔ̀lɔ́ da yele kakoloyi ní yele kapeegèle kùsulugo syoo í.

²⁰ Lǎli ni yele ga Yawe yaʔa lè níì kári n sa ni báara kolocɔlɔ-nibɔnbèle ma, wi a kolo lúru bi kapeʔe kpéʔele yele na fwɔɔ bi yele kálagi kwɔ́ɔ, àlí bi gi taa wi n kacàngēle saʔa kpéʔele yele na n kwɔ́ɔ.»

²¹ A syɛ́ɛnmi Zyozuwe yari: «Eʔe, Yawe má wolo a tɔ̀nɔ́ da báara.»

²² A Zyozuwe syɛ́ɛnmi pye: «Yele i nyɛ yeyɛɛ séerabéle, ncan yele ye gi nyɛ́nɛ n wòlo bàā báara Yawe ma.» A be jo: «Wolo i nyɛ gi séerabéle.»

²³ «Ki si i lè nya, ye kolocɔlɔ-nibɔnbèle yirige yaà pe nyɛ yele níngi ni lè, yé yele fúnyi kàriga Yawe ma, wi lè Isirayɛli Kolocɔlɔw.»

²⁴ A syɛ́ɛnmi Zyozuwe pye: «Yawe wolo Kolocɔlɔw má wolo a ra báara, sáā wi jóomi lúro.»

²⁵ A Zyozuwe joogaanna kpéʔele ní syɛ́ɛnmi ní cángi bee Sisyɛmi ni, níì làlwa kèlē télege n kaan be ma n fàra tundunro na.

²⁶ A Zyozuwe kérigèle bee sɛ́bɛ Kolocɔlɔɔ làlwaw sɛ́bɛ ni, níì kàdɛnɛgbɔʔɔ láa n yérige yaà syɛni tíigi láara ni gi pye lè Yawe kpɔ̀ʔɔrɔli tɛɛcànga ni.

²⁷ A Zyozuwe syɛ́ɛnmi myɛ pye: «Ye wéle, kàdɛnɛgi naa a pye séera wolo kánmi na. Níì cán syɛ́ɛnree myɛ Yawe joo wolo ma lè, ki n di lóʔo. Ki a pye séera yele kánmi na jàngó yele a kɔ́ yele Kolocɔlɔw cée í.»

²⁸ Koro kàdoʔo ma a Zyozuwe syɛ́ɛnmi lúrugo n tórigo, pe myɛ nibin nibin pe kɔriyɔ ma.

Zyozuwe kùúw kéele

²⁹ Kérigèle bee pyele kadoʔo ma, Nun jáaw Zyozuwe wi pye lè Yawe falipyew, a wi kùu. Wi maa taa yɛ̀ʔɛlɛ dabata ní kpɔrigɔ.

³⁰ A be wi tɔ́n Timinati-Sera ni, wi kɔ́rigi tára ni, Efirayimi nyanbeleyi kúlo ni, Gaasyi nyanbelegi solomɔkulo kàbangi na.

³¹ Isirayɛli ye maa ni báara Yawe ma Zyozuwe sìíw myɛ ni, ní wolɛɛbèle bele pe da kòro Zyozuwe kàdoʔo ma lè, poro sìíw myɛ ni, poro bele pe da Yawe kapyegèle cán lè, koro gele wi kpéʔele Isirayɛli ye ma lè.

³² Zyozɛfu kaceleri Isirayɛli ye da láa n yìri Ezyipiti ma n pan lè, a pe baa di tɔ́n Sisyɛmi ni, tátɛɛli ni, lee Zyakɔbi da syɔɔ Sisyɛmi tóow Hamɔri yòdaʔayi ma lè wálifiio támabéle dabata na, á loro baa pye Zyozɛfu yòdaʔayi kɔ́rigɔ ni.

³³ A Aarɔn jáaw Eleyazari baa kùu, a be wi tɔ́n wi jáaw Fineyasi dǎndamagi na, Efirayimi nyanbeleyi kúlo ni.