Zyozuwe 23 - Cebaara Bible 2010

Zyozuwe joozanni

¹ Làlaa saʔa maa kwɔ́ɔ àmɛɛ Yawe da ŋɔ́ndaala kaan Isirayɛli ye ma lè pe nigoobèle nínge ni, poro bele pe da be màʔa lè. Zyozuwe si maa tɔ̀nɔ n baa lɛɛ gbanʔama.

² Lǎli bee ni a Zyozuwe Isirayɛli ye myɛw yeri, pe lè pe wolɛɛbèle, ní be kùndigibèle, ní be kútiijoobèle ní n fàra be yɛɛ̀kinibèle na, ní baa be pye: «Ye wéle, mii wi lɛɛ n kwɔ́ɔ wee gbanʔama.

³ Yele si n gi nyaa gee myɛ Yawe yele Kolocɔlɔw kpéʔele syɛɛnfeleyi naa myɛ na lè yele kéeli na. Níì cán Yawe yele Kolocɔlɔw wi kapɛɛnni kpúmɔn n kaan yele ma.

⁴ Ye wéle, syɛɛnfeleyi bee wozanya yi kòro lè n séli yaà Zyuridɛnw na, ní yee myɛ mii kálagi n kwɔ́ɔ lè péw fwɔɔ n sáà nan Sólomi Lòkpɔʔɔ na canʔatoomɔ ma, mii n yee bee myɛ tára lɛɛ yele na gɔ̌nw wáala báriga ni a di pye yele Isirayɛli ye syɛɛnfeleyi kɔ́rigɔ.

⁵ Yawe yele Kolocɔlɔw a yi ŋɔrigɔ bi léeli yele na bi yi nɛnɛ yirige yaà yele yɛ́ʔɛ ma. Yele a yi tári syɔɔ taa bi yɛlɛ ní gi ní àmɛɛ Yawe yele Kolocɔlɔw gi joo yele ma lè.

⁶ Ye nìrimɛ le gbanʔama, yé Mowizi làlwaw sɛ́bɛ syɛ́ɛnrɛ myɛ sámaga ye cò, yáā táanri di na. Yele a kɔ́ wàli bi láʔa di na bi kári kàliige wàlá kàmɔnɔ ma í,

⁷ jàngó yele a kɔ́ yeyɛɛ nyáʔami ní syɛɛnfeleyi bee ní yi kòro yele níngi ni lè í. Yele a kɔ́ ra yi kolocɔlɔbèle mɛ́ɛyɛ yiri í, yele a kɔ́ ra kɛ̀ɛ́ pe mɛ́ɛyi na í, yele a kɔ́ ra báara be ma í, yele a kɔ́ ra tíri bàā tuun pe yɛʔɛ̀ ma í.

⁸ Kàjáa ki n yɛlɛ ye tan Yawe yele Kolocɔlɔw na àmɛɛ yele gi kpéʔele lè nlaa yaà fwɔɔ n baa nan níjanʔa na.

⁹ Yawe n syɛɛnfeleyi nɛnɛ n yirige yele yɛ́ʔɛ ma, yee yi da kpólo lè, á yi fǎngi nɛʔɛ. Nlaa n baa nan níjanʔa na, syɔɔn faala ga gbàn n kɔ́ɔ̀ yére n yele sige í.

¹⁰ Yele wàa nibin maa ni be saala kagunɔ nɛnɛ, níì cán Yawe yele Kolocɔlɔw wi da ni kapɛɛnni kpúmɔn ni kaangi yele ma n yɛlɛ ní gi ní àmɛɛ wi da gi joo yele ma lè.

¹¹ Koro na ki n tɔ̀nɔ n yɛlɛ yaa yeyɛɛ kɔ̀rɔsíi, yé Yawe yele Kolocɔlɔw kéele yaʔa li yele dɛ́nɛ.

¹² Yele ga kolo n lúru níì tan syɛɛnfeleyi bee na yi kòro yele níngi ni lè, yele ga bɛ̀ɛ ní yi ní cèpɔriyi na, yele ga yeyɛɛ nyáʔami yi ni,

¹³ ye gi fílige ye cán Yawe yele Kolocɔlɔw a ní kòro bàā syɛɛnfeleyi bee nɛnɛ da yirigi yele yɛ́ʔɛ ma í. Kàjáa yi a pye yele na cɔ̀ɔ, ní karinyanga, ní sapile yele lɛ̀ʔɛgèle ni, bi pye wúuro yele nyapiigèle ni fwɔɔ bi taa yele í kwɔ́ɔ yiri tácǎnri naa ni, dee Yawe yele Kolocɔlɔw kaan yele ma lè.

¹⁴ Ye wéle, mii wi a kári wee níjanʔa tári syɛ̀ɛnnɛ myɛ tɛɛ̀káriga ni. Yele si n gi cán ní yele zɔ̌nbèle myɛ, ní yele fúnyi myɛ ní ncan syɛɛncanree myɛ Yawe yele Kolocɔlɔw da joo yele kéeli na lè, ti tàa faala ga kòro sìnvoro ni í. Ti myɛ n foro yele ma, yafyɛn ga fɔ̀n di ni í.

¹⁵ Syɛɛncanree myɛ Yawe yele Kolocɔlɔw da joo yele kéeli na lè, kánmee na dee bee baa foro lè, kánmi bee na syɛɛnpeeree myɛ wi wɔ́ɔ̀ joo yele kéeli na lè, ti a ba foro yele na fwɔɔ bi taa wi yele kálagi péw bi yirige tácǎnri ni, toro dee Yawe yele Kolocɔlɔɔ kaan yele ma lè.

¹⁶ Joogaanlee kéele Yawe yele Kolocɔlɔw joo yele ma lè, yele ga li kálagi níì kári n sa ni báara kolocɔlɔbèle pèle nikwɔɔlɔ ma, ní i tíri ni tuun pe yɛʔɛ̀ ma, lǎli bee ni Yawe fundanʔari a cò naà yele kánmi na, yele a kwɔ́ɔ yiri kelekele tácǎnri naa ni, dee wi kaan yele ma lè.»