Zyozuwe 22 - Cebaara Bible 2010

Syɛɛnfeleyi siin ní tílaw lúrugarila Zyuridɛnw jelige na

¹ Lǎli bee ni a Zyozuwe Wurubɛn ye, ní Gadi ye, ní Manase syɛɛnfelegi tíla yeri

² ní baa be pye: «Gee myɛ Yawe falipyew Mowizi da joo n gbàn yele ma lè, yele n gi sámaga n cò, a yele wɔ́ɔ̀ mii jóomi lóʔo níì gi kpéʔele, gee myɛ mii joo n gbàn yele ma lè.

³ Làridɔɔnni myɛ li sɔ̀lɔ lè fwɔɔ n baa nan níjanʔa na, yele ga téè lúru níì yele senyɛnbèle yaʔa í. Gee Yawe yele Kolocɔlɔw da joo n gbàn yele ma lè, yele n gi foro.

⁴ Tɔ́ɔliw ni àmɛɛ Yawe yele Kolocɔlɔw ŋɔ́ndaala kaan yele senyɛnbèle ma n yɛlɛ ní syɛ́ɛnri ní wi da joo be ma lè, ye kólogi láa ye lúru yaa syée yele kpaaya ma, ye sa tɛ́ɛn tári ni, dee Yawe falipyew Mowizi kaan yele ma lè Zyuridɛnw canʔafolomɔ ma.

⁵ Tundunree ní làlwawee Yawe falipyew Mowizi joo n gbàn yele ma lè, ye yákirii yaʔa di na yé di sámaga ye cò. Ye Yawe yele Kolocɔlɔw kéele yaʔa li yele dɛ́nɛ, yáā wi kóloyi myɛ táanri, yé wɔ́ɔ yaa wi tundunri myɛ kpéʔele, yé tan wi na, yaa báara wi ma ní yele zɔ̌nbèle myɛ, ní yele fúnyi myɛ ní.»

⁶ A Zyozuwe dùba kpéʔele be ma níì be lúrugo n tórigo, a be kári be kpaaya ma.

⁷ Mowizi maa kɔrigɔ kaan Manase syɛɛnfelegi tílawaa ma Basyan ni, á Zyozuwe baa kàa kaan tílawee ma be senyɛnbèle bele nínge ni Zyuridɛnw jelige na canʔajeemɛ kabangi na. Lǎli ni Zyozuwe be lúrugo n tórigo paa syée be kpaaya ma lè, a wi dùba kpéʔele be ma

⁸ níì be pye: «Ki n yɛlɛ ye lúru yaa syée yele kpáayi ma ní lɔnɛʔɛri ní yele taa lè, ti lè yaweenɛʔɛri, ní wálifiiw, ní tɛ́ɛw, ní kanyɛɛnri, ní túnmɔri, n fàra yaleri saʔa na. Ye kapɛɛnni yataara lɛɛ yeyɛɛ na ní yele senyɛnbèle ní, toro dee yele taa yele nigoobèle ni lè.»

Pe n sáriga-wòlo-yafanʔa faan Zyuridɛnw taana

⁹ A Wurubɛn ye, ní Gadi ye, ní Manase syɛɛnfelegi tíla yiri Isirayɛli wóbèle bele nínge ni, Silo ni, Kanaan tári ni n lúru n kári Galaadi tári ma, toro dee be taa lè n yɛlɛ ní gee ní Yawe da joo n gbàn Mowizi ma a wi joo lè.

¹⁰ Lǎli ni Wurubɛn ye, ní Gadi ye, ní Manase syɛɛnfelegi tíla sáà nan lè Zyuridɛnw na, ní sèʔé i nyɛ Kanaan tári ni, a be kàdɛnɛyɛ tɛ́ʔɛ n sáriga-wòlo-yafaangbɔʔɔ faan wojanga ní, Zyuridɛnw nyɔ́ɔ na.

¹¹ A Isirayɛli wóbèle bele ba ni gi lúro syɛ́ɛnbèle ma pe i gi nyuu níì jo: «Ye wéle, Wurubɛn ye, ní Gadi ye, ní Manase syɛɛnfelegi tíla i yaà n sáriga-wòlo-yafanʔa faan wolo taana Zyuridɛnw nyɔ́ɔ na Kanaan tári ni.»

¹² Lǎli ni Isirayɛli ye gee bee lóʔo lè, a Isirayɛli syɛ́ɛnmi myɛ piyɛɛ gbóʔoro Silo ma bi kári sa kapɛɛnnɛ kpúmɔn ní be ní.

¹³ A Isirayɛli ye sáriga-wòlow Eleyazari jáaw Fineyasi tun Galaadi tári ma, Wurubɛn ye, ní Gadi ye, ní Manase syɛɛnfelegi tíla ma,

¹⁴ níì kùndigibèle pèle kɛɛ fàra wi na, gee bee n jo narigbaʔa o narigbaʔa kùndigi nibin Isirayɛli syɛɛnfeleyi myɛ nibin nibin ni. Pe myɛ n pye pe narigbaayi kùndigibéle Isirayɛli syɛɛnnɛʔɛmi ni.

¹⁵ A be kári Wurubɛn ye, ní Gadi ye, ní Manase syɛɛnfelegi tíla ma Galaadi tári ni n sáà joo ní be ní níì jo:

¹⁶ «Ye wéle, Yawe syɛ́ɛnmi myɛ n jo: ‹Nyàʔá gi nyɛ kakologi naa kpéʔelele nyúngo yele ma Isirayɛli ye Kolocɔlɔw na, àmɛɛ yele wàli n láʔa lè Yawe na níjanʔa, níì sáriga-wòlo-yafaangaa faan n pye yeyɛɛ wóʔo níì Yawe cée níjanʔa?

¹⁷ Ba Peyɔɔri kapeeli cɛ́rɛ lé wo ni, loro lee li lè àlí níjanʔa wolo ga kɔ́ɔ̀ gbàn n li nɔ́nʔɔri jée n láʔa woyɛɛ na n kwɔ́ɔ í, bi gi taa káfalagi yáama maa too Yawe syɛ́ɛnmi na?

¹⁸ Yele i wɛ̀ɛ́ bi láʔa Yawe na níjanʔa! Yele ga Yawe cée níjanʔa, nyɛ̀ʔɛna wi fúngi a tanʔa gbanʔama Isirayɛli syɛ́ɛnmi myɛ kurugo.

¹⁹ Táree yele taa lè di pye yele wóro, kapye ti n nɔ́nʔɔ, ki n yɛlɛ ye jeli yaa maa Yawe tári ma ye ba tɛ́ɛn wolo níngi ni, beè Yawe tɛɛkòrogi nyɛ lè. Kàjáa ki ga yɛlɛ yele í Yawe cée í. Yele a kɔ́ ceri láʔa wolo na si ní sáriga-wòlo-yafaangaa faan yeyɛɛ wóʔo bi fàra Yawe wolo Kolocɔlɔw wóʔo na í.

²⁰ Lǎli ni Zera jáaw Akan kapeele kpéʔele yáriri kéele na ti da yɛlɛ bi yaʔa lè péw, a Yawe fundanʔagbɔɔri too Isirayɛli syɛ́ɛnmi myɛ na, nǎnw bee nibin ban wi da kúu wi kapeeli kéele na í.› »

²¹ A Wurubɛn ye, ní Gadi ye, ní Manase syɛɛnfelegi tíla Isirayɛli syɛɛnnɛʔɛmi kùndigibéle yari:

²² «Yawe wi nyɛ Séekpɔɔw Kolocɔlɔɔ, woro tɔ̀nɔ́ wi nyɛ Séekpɔɔw Kolocɔlɔɔ, woro wi gi cán! Isirayɛli ye si a ba gi cán! Kapye céemɛ kéele wàlá kakologo wolo kpéʔele Yawe na, ki ga yɛlɛ wi wolo syɔɔ níjanʔa í.

²³ Kapye sáriga-wòlo-yafaangaa wolo faan gi pye wolo wóʔo, jàngó bi kolo lúru Yawe kurugo, kapye a wolo gi faan jàngó bàā sáriga-sórigow, ní míimi sáriga, wàlá pínɛnyɛnnɛgi sáriga wóo gi na, Yawe n yɛlɛ wi wolo yíbe gi kéeli na.

²⁴ Anbée ban gi tɔ̀nɔ́ nyɛ í, nyɛ̀ʔɛna kéeli sɔ̀ngurɔ na wolo gee bee pye. Níì cán wolo i sɔ̀ngí n jo, nyɛ̀ʔɛna yele pìíbèle a kɔ́ ba ra gi nyuu wolo wóbèle ma si jo: ‹Lɛɛlìí li nyɛ yele ma Yawe Isirayɛli ye Kolocɔlɔw kéele ni?

²⁵ Yawe n Zyuridɛnw pye láʔagologi wolo ní yele Wurubɛn ye, ní Gadi ye níngi ni. Koro na lɛɛlɛ faala tɔ̀nɔ́ o nyɛ yele ma Yawe kéeli ni í.› Kánmi bee na yele pìíbèle a pye sábabu si wolo pìíbèle láʔa Yawe yɛ́ɛgi fyáara na.

²⁶ Gee bee na wolo gi joo woyɛɛ ma níì jo: ‹Ye tíi wo sáriga-wòlo-yafanʔa faan, ki si a kɔ́ pye bàā sáriga-sórigow wàlá sárigawaa faala wóo gi na í.›

²⁷ Kàjáa ki a pye séera wolo ní yele níngi ni, si wɔ́ɔ ba pye séera wolo yòdaʔayi ní yele wóyi nínge ni naa wolo kàdoʔo ma jàngó wolo í kòro bàā Yawe sériw kèlē kpéʔele bàā wolo sáriga-sórigow, ní wolo sárigaw yaweegéle, ní wolo pínɛnyɛnnɛgi sáriga wóo Yawe ma wi kpɔ̀ʔɔrɔli kpaʔa yɛ́ʔɛ ma. Ki a pye séera jàngó yele pìíbèle a kɔ́ ba gi joo wolo wóbèle ma nyɛ̀ʔɛna í si jo: ‹Lɛɛlɛ o nyɛ yele ma Yawe kéeli ni í.›

²⁸ A wolo si jo: ‹Nyɛ̀ʔɛna pe ga kɔ́ baa syɛ́ɛnri bee joo wolo ma wàlá wolo yòdaʔayi ma, wolo a be yari: Ye Yawe sáriga-wòlo-yafaangi félege wéle, gee wolo tóolɛɛbèle faan lè, ki si o nyɛ sáriga-sórigow ní sárigasanw kéele na í, kàjáa ki i nyɛ séera wolo ní yele níngi ni.›

²⁹ Wolo í Yawe cée si kolo lúru wi kurugo níjanʔa bi sa sáriga-wòlo-yafaangaa faan bàā sáriga-sórigow, ní míimi sáriga, ní sárigawaa faala wóo gi na, ki n yɛlɛ sɔ̀nguri bee í léeli wolo na. Wolo o caa bàā sáriga wóo gi na í, fwɔɔ Yawe wolo Kolocɔlɔw sáriga-wòlo-yafanʔa na, ki nyɛ lè wi tɛɛkòrogi yɛ́ʔɛ ma.»

³⁰ Lǎli ni sáriga-wòlow Fineyasi, ní syɛ́ɛnmi kùndigibéle be pye ní wi ní lè, pe lè Isirayɛli syɛɛnnɛʔɛmi kùndigibéle, poro Wurubɛn ye, ní Gadi ye, ní Manase ye syɛ́ɛnri lóʔo lè, a ti be dɛ́nɛ.

³¹ A sáriga-wòlow Eleyazari jáaw Fineyasi Wurubɛn ye, ní Gadi ye, ní Manase ye pye: «Níjanʔa, wolo n gi cán ncan Yawe i nyɛ wolo níngi ni, níì cán yele ga kolomɔ kéele kpéʔele Yawe na í. Ki si i lè nya yele n Isirayɛli ye syɔɔ Yawe kpúmɔnri ma.»

³² A sáriga-wòlow Eleyazari jáaw Fineyasi ní kùndigibèle yìri yaà Wurubɛn ye, ní Gadi ye ma, Galaadi tári ni n lúru n pan Kanaan tári ma Isirayɛli ye wóbèle bele ma n baa kéeli bee joo n tɛ́ɛn be na.

³³ A kéeli bee Isirayɛli ye dɛ́nɛ, a Isirayɛli ye Kolocɔlɔɔ kpɔ̀ʔɔrɔ. Pe ga níì jo poro i syée sa kapɛɛnnɛ kpúmɔn bi tári kálagi í, toro dee ni Wurubɛn ye, ní Gadi ye nyɛ lè wodɛ́ɛnbéle ní.

³⁴ A Wurubɛn ye, ní Gadi ye mɛ́ʔɛ le sáriga-wòlo-yafaangi na níì jo: «Ki i nyɛ séera wo níngi ni, ncan Yawe i nyɛ Kolocɔlɔɔ.»