Zyozuwe 21 - Cebaara Bible 2010

Levii ye kěyi kéele

¹ A Levii ye narigbaayi kùndigibéle kári sáriga-wòlow Eleyazari, ní Nun jáaw Zyozuwe, ní Isirayɛli ye syɛɛnfeleyi narigbaaya kundigibéle ma

² n sáà joo ní be ní Silo ni, Kanaan tári ni níì jo: «Yawe maa gi joo n gbàn Mowizi ma níì jo kèyaa n yɛlɛ yi kaan wolo ma wolo í tɛ́ɛn yi ni n fàra tári na ti yi màʔa lè, toro í pye wolo yaweeri kéele na.»

³ Koro na Isirayɛli ye kèyaa wòlo be kɔ́rigi ni n fàra tári na ti yi màʔa lè n kaan Levii ye ma n yɛlɛ ní gi ní àmɛɛ Yawe da gi joo n gbàn lè.

⁴ Pe n gɔ̌nw wáa Kehati túlugi wòolo kéele na. Levii ye be pye lè sáriga-wòlow Aarɔn yòdaʔayi, a poro kèye kɛɛ ní taanri taa gɔ̌nw wáala báriga ni. Kěyi bee maa pye Zyuda syɛɛnfelegi, ní Simeyɔn syɛɛnfelegi, ní Bɛnzyamɛ syɛɛnfelegi kèyaa.

⁵ A Kehati yòdaʔayi wozanya kèye kɛɛ taa gɔ̌nw wáala báriga ni, Efirayimi túlugi wòolo syɛɛnfelege tára, ní Dan túlugi wòolo syɛɛnfelege wóro, ní Manase túlugi wòolo syɛɛnfelege tíla wóro ni.

⁶ A Gerisyɔmi yòdaʔayi kèye kɛɛ ní taanri taa gɔ̌nw wáala báriga ni, Isakari túluyi wòolo syɛɛnfelege tára, ní Azɛɛri túlugi wòolo syɛɛnfelege tára, ní Nɛfitalii túlugi wòolo syɛɛnfelege wóro, ní Manase túlugi wòolo syɛɛnfelege tílawee wóro ni wi nyɛ lè Basyan ni.

⁷ A Merarii yòdaʔayi wòolo kèye kɛɛ ní siin taa n yɛlɛ ní be túluyi ní Wurubɛn syɛɛnfelegi, ní Gadi syɛɛnfelegi, ní Zabulɔn syɛɛnfelegi ni.

⁸ A Isirayɛli ye gɔ̌nw wáa kěyi bee, ní yi tári kéele na ti yi màʔa lè, níì yi kaan Levii ye ma n yɛlɛ ní gi ní àmɛɛ Yawe da gi joo n gbàn Mowizi ma a wi joo lè.

⁹ Kěyee be yirige Zyuda yòdaʔayi syɛɛnfelege, ní Simeyɔn yòdaʔayi syɛɛnfelege ni n kaan lè, yoro yi nyɛ yee naa,

¹⁰ yi maa pye Aarɔn jáabèle wóyo, be pye lè Kehati túlugi wóbèle pèle, woro wee wi pye lè Levii yòdaʔagaa. Níì cán poro gɔ̌nw da tɛ̀ɛn wozelibèle.

¹¹ A be Kiiriyati-Ariba kaan be ma ki lè Heburɔn n fàra tári na ti gi màʔa lè. Kěgi bee maa pye Zyuda nyanbeleyi kúlo ni. Anaki tóow pe da ni yiri Ariba.

¹² Pe si maa kěgi séye ní gi kèpiigèle kaan Yefune jáaw Kalɛbi ma n kwɔ́ɔ kɔrigɔ.

¹³ A be Heburɔn kaan sáriga-wòlow Aarɔn yòdaʔayi ma n fàra tári na ti gi màʔa lè ki lè kàsuro-jée-kègaa syɛɛnkpoobèle ma, ní wɔ́ɔ̀ Libina kaan be ma n fàra tári na ti gi màʔa lè,

¹⁴ ní Yatiiri n fàra tári na ti gi màʔa lè, ní Ɛsyitemowa n fàra tári na ti gi màʔa lè,

¹⁵ ní Holɔn n fàra tári na ti gi màʔa lè, ní Debiiri n fàra tári na ti gi màʔa lè,

¹⁶ ní Ayɛn n fàra tári na ti gi màʔa lè, ní Yuta n fàra tári na ti gi màʔa lè, ní Bɛti-Syemɛsyi n fàra tári na ti gi màʔa lè. A yoro pye kèye kpanjɛrɛ n fàra tári na ti yi màʔa lè, yee be yirige lè syɛɛnfeleyi bee siin ni.

¹⁷ Yee si be taa Bɛnzyamɛ syɛɛnfelegi ni lè, yoro yi nyɛ Gabaɔn n fàra tári na ti gi màʔa lè, ní Geba n fàra tári na ti gi màʔa lè,

¹⁸ ní Anatɔti n fàra tári na ti gi màʔa lè, ní Alimɔn n fàra tári na ti gi màʔa lè. A yoro pye kèye sicɛrɛ.

¹⁹ Sáriga-wòlobèle be lè Aarɔn yòdaʔayi, kěyee be taa lè, yi myɛ bìnɛw n pye kèye kɛɛ ní taanri n fàra tári na ti yi màʔa lè.

²⁰ Levii ye be lè Kehati túlugi wozanbèlē, poro maa Efirayimi syɛɛnfelegi kèyaa taa gɔ̌nwáari báriga ni.

²¹ Pe n Sisyɛmi kaan be ma n fàra tári na ti gi màʔa lè ki pye kàsuro jée kàʔa Efirayimi nyanbeleyi kúlo ni, n fàra Gezɛɛri na, ní tári ti gi màʔa lè,

²² ní Kibisayimi n fàra tári na ti gi màʔa lè, ní Bɛti-Horɔn n fàra tári na ti gi màʔa lè. A yoro pye kèye sicɛrɛ.

²³ Yee be taa Dan syɛɛnfelegi ni lè, yoro yi nyɛ Ɛliteke n fàra tári na ti gi màʔa lè, ní Gibetɔn n fàra tári na ti gi màʔa lè,

²⁴ ní Ayalɔn n fàra tári na ti gi màʔa lè, ní Gati-Irimɔn n fàra tári na ti gi màʔa lè. A yoro pye kèye sicɛrɛ.

²⁵ Yee si be taa Manase syɛɛnfelegi tíla ni lè, yoro yi nyɛ Taanaki n fàra tári na ti gi màʔa lè, ní Gati-Irimɔn n fàra tári na ti gi màʔa lè. A yoro pye kèye siin.

²⁶ A Kehati yòdaʔayi túlugo wozanbèlē keye myɛ bìnɛw pye kèye kɛɛ n fàra yi tári na ti yi màʔa lè.

²⁷ Gerisyɔmi yòdaʔayi yi nyɛ lè Levii ye narigbaayi ni, a be Golan kaan yoro ma Basyan ni n fàra tári na ti gi màʔa lè, Manase syɛɛnfelegi tíla wóʔo ki da pye, ní i nyɛ kàsuro-jée-kègaa syɛɛnkpoobèle ma. A be Beyasyitira kaan be ma n fàra tári na ti gi màʔa lè. A yoro pye kèye siin.

²⁸ Isakari syɛɛnfelegi kèye be taa lè, yoro yi nyɛ Kisyɔn n fàra tári na ti gi màʔa lè, ní Dabirati n fàra tári na ti gi màʔa lè,

²⁹ ní Yarimuti n fàra tári na ti gi màʔa lè, ní Ɛn-Gannimi n fàra tári na ti gi màʔa lè. A yoro pye kèye sicɛrɛ.

³⁰ Yee be taa Azɛɛri syɛɛnfelegi ni lè, yoro yi nyɛ Misyeyali n fàra tári na ti gi màʔa lè, ní Abidɔn n fàra tári na ti gi màʔa lè,

³¹ ní Helikati n fàra tári na ti gi màʔa lè, ní Erehɔbi n fàra tári na ti gi màʔa lè. A yoro pye kèye sicɛrɛ.

³² Yee be taa Nɛfitalii syɛɛnfelegi ni lè, yoro yi nyɛ kàsuro jée kěgi ki lè Kedɛsyi, syɛɛnkpoobèle ma, Galile ni n fàra tári na ti gi màʔa lè, ní Hamɔti-Dɔɔri n fàra tári na ti gi màʔa lè, ní Karitan n fàra tári na ti gi màʔa lè. A yoro pye kèye taanri.

³³ Kěyee Gerisyɔmi ye taa lè n yɛlɛ ní be narigbaayi ní, yi myɛ binɛw n pye kɛɛ ní taanri n fàra tári na ti yi màʔa lè.

³⁴ Kěyee be yirige Zabulɔn syɛɛnfelegi ni n kaan Levii ye wozanbèle ma lè, be lè Merarii yòdaʔayi narigbaaya woolo, yoro yi nyɛ Yokineyami n fàra tári na ti gi màʔa lè, ní Karita n fàra tári na ti gi màʔa lè,

³⁵ ní Dimina n fàra tári na ti gi màʔa lè, ní Nahalali n fàra tári na ti gi màʔa lè. A yoro pye kèye sicɛrɛ.

³⁶ Yee be taa Wurubɛn syɛɛnfelegi ni lè, yoro yi nyɛ Besɛɛri n fàra tári na ti gi màʔa lè, ní Yahasa n fàra tári na ti gi màʔa lè,

³⁷ ní Kedemɔti n fàra tári na ti gi màʔa lè, ní Mefaati n fàra tári na ti gi màʔa lè. A yoro pye kèye sicɛrɛ.

³⁸ Yee be taa Gadi syɛɛnfelegi ni lè, yoro yi nyɛ kàsuro-jée-kěgi ki lè Aramɔti, syɛɛnkpoobèle ma, Galaadi ni n fàra tári na ti gi màʔa lè, ní Mahanayimi n fàra tári na ti gi màʔa lè,

³⁹ ní Hɛsyibɔn n fàra tári na ti gi màʔa lè, ní Yayezɛɛri n fàra tári na ti gi màʔa lè. A yoro myɛw pye kèye sicɛrɛ.

⁴⁰ Kěyee nyɔ́ɔ Merarii yòdaʔayi taa lè gɔ̌nw wáala báriga ni n yɛlɛ ní be túluyi ní be pye lè Levii túlugi wozanbèlē, yi n pye kèye kɛɛ ní siin.

⁴¹ Kěyee Levii ye taa lè Isirayɛli ye tálɛɛgèle ni, yi myɛ bìnɛw n pye kèye togoye siin ní kɔrɔtaanri n fàra tári na ti yi màʔa lè.

⁴² Kěyi bee myɛ nibin nibin maa pye ní yi tára n yi màʔa. Anbée gi pye kěyi bee myɛ na.

⁴³ Kánmi bee na Yawe tári myɛ kaan Isirayɛli ye ma, dee kéele na wi da kàli níì jo woro a di kaan be toolɛɛbèle ma lè. A be di syɔɔ n taa níì tɛ́ɛn di ni.

⁴⁴ A Yawe ŋɔ́ndaali kaan be ma kàbanyi myɛ na n yɛlɛ ní kàligi ní wi da kpéʔele be toolɛɛbèle ma lè. Pe nigoowaa faala ga gbàn n yére n be sige í. A Yawe pe nigoobèle myɛ le be kɔ́yi ni.

⁴⁵ Kánmi bee na syɛɛntaanri myɛ Yawe da joo Isirayɛli kpáagi wòolo ma lè, ti tàa faala ga kòro sìnvoro ni í, ti myɛ n foro.