Zyozuwe 20 - Cebaara Bible 2010

Kàsuro-jée-kěyi kéele

¹ A Yawe gi joo Zyozuwe ma níì wi pye:

² «Syɛ́ɛnri naa joo Isirayɛli ye ma mí be pye: ‹Ki n yɛlɛ ye kàsuro-jée-kèye nyɛ́nɛ ye wòlo yeyɛɛ kéeli na, yoro yee kéele mii joo Mowizi ma a wi jo yele ma lè,

³ koro ga pye wàa ga fòʔo syɔɔn na n kpóo, bi gi taa wi ga gi kíri í, wi a gbǎn fàn bi sa jée kěyi bee kàa ni. Kánmi bee na wee wi a ra wi caa bi sìsyaanw wolo gɔlɔ́ wòlo lè, wi a syɔɔ wee bee ma.

⁴ Syɛɛnkpóow ga fàn n sáà nan kěyi bee kàa na, wi a yére kěgi kpàánweele na si wi kataali joo tɛ̀ɛn kěgi bee wólɛɛbéle na. Poro a wi syɔɔ lége ní peyɛɛ ní kěgi ni, si tɛɛkòrogo kaan wi ma wi pye yaà ní poro ní.

⁵ Wee wi wi caa bi sìsyaanw wolo gɔlɔ́ wòlo lè, woro ga kári wi kurugo, pe a kɔ́ syɛɛnkpóow le wi kɔ́yi ni í, níì cán wi ga gi kíri níì wi syɛɛnnyɛnw kpóo wii í, wi si da caà pye wi nigoò làlaa faala ni í.

⁶ Wi a kòro kěgi bee ni bi taa ba yére syɛ́ɛnmi yɛ́ʔɛ ma pé wi kútiiw joo, wi a wɔ́ɔ kòro yaà bi taa lǎli bee sáriga-wòlobēle kafɔlɔ wi nyɛ fáliw na lè woro í kùu, koro kàdoʔo ma kěgee ma wi da yìri lè n fàn n kári yaà, wi a náa lúru kári gee bee ma wi kpaʔa ma.› »

⁷ A be Kedɛsyi wòlo n yaʔa kɔlɔ̀ na Galile tári ni, Nɛfitalii nyanbeleyi kúlo ni, ní Sisyɛmi, Efirayimi nyanbeleyi kúlo ni, ní Kiiriyati-Ariba wi lè Heburɔn, Zyuda nyanbeleyi kúlo ni.

⁸ A be Besɛɛri tɛ̀ɛn Zyuridɛn jeligɔgee na Zyeriko canʔafolomɔ kabangi na fìími tára ni Wurubɛn tári tɛɛ̀fála-falaga ni, ní Aramɔti, Galaadi ni, gi pye lè Gadi syɛɛnfelegi wóʔo, ní Golan, Basyan ni, gi pye lè Manase syɛɛnfelegi wóʔo.

⁹ Yoro yi pye kěyi, yee pe da tɛ̀ɛn lè Isirayɛli ye myɛw ní nibɔnw kéele na wi baa tɛ́ɛn ní be ní lè, koro ga pye wee wi ga fòʔo syɔɔn na n kpóo lè, wi fàn bi kári yaà beè, koro ga pye sìsyaanw wolo gɔlɔ́-wòloo kɔ́lɔ a kɔ́ nan wi na bi wi kpóo í, bi gi yaʔa wi ga kɔ́ɔ̀ yére syɛ́ɛnmi yɛ́ʔɛ ma á be wi kútiiw joo í.