Zyozuwe 2 - Cebaara Bible 2010

Zyozuwe n tundunlarabéle siin tun Zyeriko ma

¹ A Nun jáaw Zyozuwe tundunlarabéle siin yìrige Syitimi ni n tun làrama ni níì jo: «Yaa syée ye sa tári ní Zyeriko kěgi saanri ye wéle.» A be kári, ní sáà jée nànjaacewaa kpaʔa ni, pe i wi yiri Arahabi, níì syɔ́ɔn yaà beè.

² A pe gi joo Zyeriko fànʔafɔw ma níì jo: «Wéle, Isirayɛli wóbèle pèle n pan naa yébiligi naa ni bi ba tári saanri wéle.»

³ Lǎli bee ni a Zyeriko fànʔafɔw tun a be sáà Arahabi pye: «Nǎnbèle pe baa tìrige mɔ ma n jée mɔ kpáagi ni lè, pe yirige naa. Níì cán tári be pan ba saanri wéle.»

⁴ Céw si maa nǎnbèle siin kɔ́ri n sáà làriga níì gi joo níì jo: «Kányɛʔɛ gii nǎnbèle pèle n tɔ̀nɔ n pan naa mii ma, kàjáa mii da tɔ́ɔ̀ be tɛɛyìrige cán í.

⁵ Kpàánweeli làridɔnnɔ ni, cângwɔɔ-yébilimi ni, a nǎnbèle bee yiri n kári. Mii si ga be kàbangáriga cán í. Yaa syée be kurugo kelekele, yele a be nɛnɛ cò.»

⁶ Bi gi taa wi maa lúgu ní be ní kpáagi ǹjoʔo ni n sáà làriga lɛnjere láara ni, dee wi da taani yaà lè kpáagi ǹjoʔo ni.

⁷ A syɛ́ɛnbèle bee yiri n Zyuridɛn kólogi láa ni syée be kurugo n sáà nan tɛɛjeligi na. Lǎli ni be yiri be kurugo lè, a be kpàánweeli tɔ́n.

⁸ Sáni tundunlarabèle í sínɛ lè, a Arahabi lúgu be kurugo kpáagi ǹjoʔo ni,

⁹ ní sáà be pye: «Mii n gi cán ncan Yawe n tári naa kaan yele ma. Yele fyáari n wolo cò. Yele kéeli n tári naa syɛ̀ɛnnɛ myɛ fànʔa kwɔ́ɔ.

¹⁰ Níì cán wolo n gi lóʔo lǎli ni yele yiri Ezyipiti ni lè, a Yawe baa Nyɛ́nɛri solomɔ lɔ́ʔɔ ceri yele yɛ́ʔɛ ma, ní wɔ́ɔ̀ gi lóʔo, gee yele kpéʔele Amɔri ye fànʔafɔbèle siin na, pe lè Sihɔn ní Ogi, poro bele be pye fǎngi na Zyuridɛn jeligɔgee na lè, àmɛɛ yele be kálagi n kwɔ́ɔ lè.

¹¹ Wolo gee bee lóʔo lè, a koro wolo bárigaw kwɔ́ɔ, zɔ̀n ga níì pye syɔɔn faala ni yele yɛ́ʔɛ ma í. Níì cán Yawe wi lè yele Kolocɔlɔw, woro wi nyɛ Kolocɔlɔɔ nyɛ̀ʔɛni na yaà ǹjoʔo ma ní nɛɛ naa tári na táàma.

¹² Koro na tɔ́ɔliw ni ki n yɛlɛ ye kàli mii ma Yawe na bi gi tɛ̀ɛn kacǎnni mii pye yele na lè, yele a wɔ́ɔ ba kacànna pye mii kpaʔa wóbèle na. Yé fɛ̀ɛwaa kaan ye yaʔa naa mii ma, wee na mii a gbǎn tága lè,

¹³ bi gi tɛ̀ɛn mii na yele a tɔ̀nɔ́ ba mii tóow ní mii nɔ́ɔw, ní mii senyɛnnǎnbèle, ní mii senyɛnjebèle, ní be wóbèle myɛ yaʔa sìi na, yele a wolo syɔɔ kùúw ma.»

¹⁴ A nǎnbèle bee wi pye: «Yele ga pye yele ga wolo kéeli joo syɔɔn faala ma í, wolo n fɔ̀lɔ bi kùu yele kéeli na. Lǎli ni Yawe ga tári le lè wolo kɔ́yi ni, wolo a kacànna kpéʔele mɔ na ní funviire ní.»

¹⁵ A wi be yirige fɛ̀nɛtiriw na n tìrige tǒw kàdoʔo ma ní mɛɛnnɛ ní. Níì cán wi kpáagi maa faan n pínɛ tǒw ni.

¹⁶ A wi be pye: «Yaa syée nyanbeleyi ma ye sa làra yaà beè, kapye koro ban í bele be yiri n kári yele kurugo lè, pe a yele taa cò. Ki si n yɛlɛ ye sa canya taanri kwɔ́ɔ yaà bi taa bele be yiri n kári yele kurugo lè, pe lúru pan. Koro kàdoʔo ma yele a náa kólogi láa bàā syée.»

¹⁷ A nǎnbèle bee wi pye: «Kánmi naa na wolo a syɔɔ kàligi ma, gee mɔ wolo kɔ́ri a wo kàli lè,

¹⁸ lǎli ni wolo ga baa jée tári ni lè, mi mɛɛnnyɛɛnni naa pwɔɔ fɛ̀nɛtiriw na, wee ni mɔ wolo yirige n tìrige lè. Mí mɔ tóow ní mɔ nɔ́ɔw kɔ́ri mi lége ní miyɛɛ ní kpáagi ni n fàra mɔ senyɛnbèle na be lè nǎnbèle, ní cébèle, ní mɔ kpaʔa wóbèle myɛ ní.

¹⁹ Syɔ́ɔnwee faala wi ga yiri mɔ kpáagi ni n kári kàfugo ma lè, syɔ́ɔnw bee kpóolo kapeele a pye wi tiimaa nyúngi ni. Wi yàkɛɛ a pye wolo na í. Bele si ga kòro ní mɔ ní kpáagi ni lè, á syɔɔnwaa baa kɔlɔ̀ taʔa pe wàa na, wee bee kpóolo kapeele a pye wolo nyúngo wólo.

²⁰ Mɔ si ga tɔ́ɔ̀ wolo kéeli joo syɔɔnwaa ma, kàligi gi nyɛ wo níngi ni lè, wolo a syɔɔ kàligi bee ma.»

²¹ A wi jo: «Amɛɛ yele gi joo lè, ki n yɛlɛ gi pye ànbée.» A wi be yaʔa a be kári. A pe ga kári a wi mɛɛnnyɛɛnni pwɔɔ fɛ̀nɛtiriw na.

²² A be kári n sáà nan nyanbeleyi na, níì kwɔ́ɔ yaà canya taanri fwɔɔ n taa bele pe da yiri be kurugo ni be caa lè, a poro lúru n pan. Pe maa sa ni be caa ni máari kólogi kàbanya myɛ na, pe si ga be nyaa í.

²³ Lǎli bee ni a nǎnbèle siin lúru n tìgi nyanbeleyi na n baa jeli n pan Nun jáaw Zyozuwe ma. Gee myɛ gi sáà pye yaà be na lè, a be baa gi joo n tɛ̀ɛn wi na.

²⁴ Pe n baa gi joo Zyozuwe ma níì jo: «Kányɛʔɛ na Yawe n tɔ̀nɔ n tári myɛ le wolo kɔ́yi ni. Tári syɛ̀ɛnnɛ myɛ báriga n tɔ̀nɔ n kwɔ́ɔ wolo yɛ́ʔɛ ma.»