Zyozuwe 18 - Cebaara Bible 2010

Gɔ̌nwáari syɛɛnfeleyi wozanya kéele na

¹ A Isirayɛli syɛ́ɛnmi myɛ piyɛɛ gbóʔoro Silo ma n sáà Syɛ́ɛnmi Tɛɛfaraga fànikpaʔa kóri yaà beè. Tári maa pye be kɔlɔ̀ na n kwɔ́ɔ.

² Isirayɛli ye syɛɛnfeleye kɔrɔsiin yi da kòro, yee yi lè yi da kɔ́ɔ̀ yi kɔ́rigi lɛɛlɛ taa í.

³ A Zyozuwe Isirayɛli ye pye: «Táree Yawe yele tóolɛɛbèle Kolocɔlɔɔ kaan yele ma lè, làlìí yele ní i sigi si náa yìri bi di syɔɔ taa?

⁴ Ye nànbēle taanri-daanri nyɛ́nɛ ye wòlo syɛɛnfelege o syɛɛnfelege ni. Mii a be tun be sa tári nyaari be màʔa, pé di kánmi sɛ́bɛ bi yɛlɛ ní be kɔ́rigi kánma ní, si lúru pan mii ma.

⁵ Pe a sa di tíla tɛɛyɛ kɔrɔsiin. Zyuda si n yɛlɛ bi kòro wi láʔagologi na, wòrogulo kàbangi na, Zyozɛfu kpáagi wòolo si wɔ́ɔ kòro pe láʔagologi na, solomɔkulo kàbangi na.

⁶ Koro na ye sa tári tíla tíla tɛɛyɛ kɔrɔsiin, yé gi sɛ́bɛ yaa maa nɛɛ naa mii ma. Mii a ba gɔ̌nw wáa yele ma di kéeli na nɛɛ naa Yawe wolo Kolocɔlɔw yɛ́ʔɛ ma.

⁷ Kàjáa Levii ye a lɛɛlɛ taa yele níngi ni í, níì cán Yawe sáriga-wòlori fáli wi nyɛ be kɔ́rigi. Gadi ní Wurubɛn, ní Manase syɛɛnfelegi tíla n be lɛɛli taa n kwɔ́ɔ Zyuridɛn jeligɔgee na canʔafolomɔ ma, loro lee Yawe falipyew Mowizi da kaan be ma lè.»

⁸ A nǎnbèle bee yìri n kári, poro bele pe da ni syée sa tári tímana bi pan lè. Zyozuwe si maa be pye: «Yaa syée ye sa tári nyaari ye màʔa, yé di kánmi sɛ́bɛ ye lúru yaa maa mii ma. Mii a ba gɔ̌nw wáa yele ma di kéeli na nɛɛ naa Silo ni, Yawe yɛ́ʔɛ ma.»

⁹ A nǎnbèle bee kári n sáà tári nyaari n foro, níì di tíla tɛɛyɛ kɔrɔsiin, níì gee bee sɛ́bɛ sɛ́bɛwaa ni n yɛlɛ ní di kěyi ní, níì lúru n pan Zyozuwe ma tɛɛkòrogi ma Silo ni.

¹⁰ A Zyozuwe gɔ̌nw wáa be ma Silo ni, Yawe yɛ́ʔɛ ma, níì tári lɛɛ lɛɛ Isirayɛli ye na yaà beè n yɛlɛ ní be tílaganmi ní.

Bɛnzyamɛ tálɛɛli

¹¹ A be gɔ̌nw wáa Bɛnzyamɛ syɛɛnfelegi yòdaʔaya woolo tálɛɛlɛ kéele na n yɛlɛ ní be túluyi ní. A be tálɛɛli pye Zyuda wóli ní Zyozɛfu yòdaʔayi wòolo wólo nínge ni.

¹² Pe solomɔkulo kàbangi láʔagologo maa séli Zyuridɛnw na, níì sɔ̀lɔ Zyeriko solomɔkulo kàbangi na n foro nyanbeleyi kúlo ni n kári canʔajeemɛ kabangi na fwɔɔ n sáà nan Bɛti-Avɛn fìími tára na.

¹³ A láʔagologi níì láa beè n fala Luzi ma, Luzi tìgimi ni wòrogulo ma. Luzi pe kɔ́ ba ni yiri Betɛli. A gi níì tìgi Atarɔti-Adaari ma n sɔ̀lɔ nyanbelegi ǹjoʔo ni, táàma Bɛti-Horɔn wòrogulo kàbangi na.

¹⁴ A láʔagologi láa canʔajeemɛ ma ní sáà kolo n fala Sólomi Lòkpɔʔɔ kabaan na wòrogulo ma nlaa yaà nyanbelegi ma ki lè Bɛti-Horɔn zǐnmi na, ní níì kári fwɔɔ n sáà nan Kiiriyati-Baali na, pe ba ni yiri lè Kiiriyati-Yeyarimi, ki lè Zyuda yòdaʔayi kègaa. Nɛɛ bee canʔajeemɛ kabangi láʔagologo da sɔ̀lɔ.

¹⁵ Wòrogulo kàbangi láʔagologo maa séli Kiiriyati-Yeyarimi tɛɛ̀laʔali na, níì kári canʔajeemɛ kabangi na fwɔɔ n sáà nan Nɛfitowa lònyungi na.

¹⁶ A láʔagologi tìgi n kári n sáà nan nyanbelegi láʔala na ki lè Bɛn-Hinɔmi jǐnlɔgi zìnmɛ na, Erefa ye jǐnlɔgi solomɔkulo ma, níì tìgi Hinɔmi jǐnlɔgi ni n kári n sáà nan Yebusi ye wòrogulo kàbangi na, ní níì tìgi fwɔɔ n sáà nan Ɛn-Worogɛli na.

¹⁷ A gi níì kolo n fala solomɔkulo ma n sáà nan Ɛn-Syemɛsyi na, níì kári n sáà nan Gelilɔti na, ki lè Adumimi tɛɛ̀lúguli zìnmɛ na, ní níì kári fwɔɔ n sáà nan Bohan kàdɛnɛgi na, wi lè Wurubɛn yòdaʔagaa.

¹⁸ A gi sɔ̀lɔ solomɔkulo kòlodìgimi ni, Araba zǐnmi na ní níì tìgi n fala Araba kàbangi na.

¹⁹ A láʔagologi sɔ̀lɔ Bɛti-Hogila solomɔkulo kòlodìgimi kàbaan na n sáà nan Solonɛʔɛmi Lɔ̀ʔɔ na solomɔkulo ma, beè Zyuridɛnw sáà jée lè wòrogulo ma. Koro gi pye wòrogulo kàbangi láʔagologo.

²⁰ Zyuridɛnw wi pye canʔafolomɔ kabangi láʔagologo. Koro gi pye Bɛnzyamɛ yòdaʔayi kɔ́rigɔ n yɛlɛ ní be túluyi ní. Pe tári láʔagoloyo yi pye yee bee di kàbanyi myɛ na.

²¹ Bɛnzyamɛ yòdaʔayi syɛɛnfelege keye yi nyɛ yee naa, n yɛlɛ ní be túluyi ní, yoro yi nyɛ Zyeriko, ní Bɛti-Hogila, ní Emɛki-Kesiisi,

²² ní Bɛti-Araba, ní Semarayimi, ní Betɛli,

²³ ní Aviimi, ní Para, ní Ofira,

²⁴ ní Kefari-Amonayi, ní Ofinii, ní Geba. A yoro pye kèye kɛɛ ní siin n fàra yi kèpiigèle na.

²⁵ Gabaɔn, ní Arama, ní Beyerɔti,

²⁶ ní Misipe, ní Kefiira, ní Mosa,

²⁷ ní Erekɛmi, ní Yiripeyɛli, ní Tareyala,

²⁸ ní Sela, ní Elɛfi, ní Yebusi, pe ba ni yiri lè Zyerusalɛmi, n fàra Gibeyati ní Kiiriyati na. A yoro pye kèye kɛɛ ní sicɛrɛ n fàra yi kèpiigèle na. Koro gi pye Bɛnzyamɛ yòdaʔayi kɔ́rigɔ n yɛlɛ ní be túluyi ní.