Zyozuwe 17 - Cebaara Bible 2010

¹ Tɛɛgaa maa kaan Manase syɛɛnfelegi ma wi pye lè Zyozɛfu jáalɛɛw. Manase nànbiilɛɛli pe da ni yiri lè Makiiri, wi da pye lè Galaadi tóow, woro wi da Galaadi ní Basyan tɛ́nɛmi taa, níì cán wi maa pye kapɛɛnkpumɔn-nàɔn.

² A tɛɛgaa kaan Manase jáabèle bele ma n yɛlɛ ní be túluyi ní, pe lè Abyezɛɛri jáabèle, ní Helɛki jáabèle, ní Asiriyɛli jáabèle, ní Sisyɛmi jáabèle, ní Hefɛɛri jáabèle, ní Syemida jáabèle, poro be pye Zyozɛfu jáaw Manase yòdaʔayi, n yɛlɛ ní be túluyi ní.

³ Hefɛɛri wi lè Galaadi jáaw, Galaadi wi lè Makiiri jáaw, Makiiri wi lè Manase jáaw, woro jáaw Selofihadi da nànbile see í, càbala wi da see. Pe mɛ́ɛyi yi nyɛ: Mala, ní Nowa, ní Hogila, ní Milika, ní Tiirisa.

⁴ A poro pan sáriga-wòlow Eleyazari, ní Nun jáaw Zyozuwe, ní syɛ́ɛnmi kùndigibéle ma n baa gi joo be ma níì jo: «Yawe maa gi joo n gbàn Mowizi ma níì jo wi kɔ ba kɔrigaa kaan wolo ma wolo senyɛnnǎnbèle nínge ni.» Lǎli bee ni a be kɔrigaa kaan be ma be tóow senyɛ̀nnɛ nínge ni àmɛɛ Yawe da gi joo n gbàn lè.

⁵ A be lɛɛgéle kɛɛ kaan Manase syɛɛnfelegi ma n fàra Galaadi ní Basyan tári na di lè Zyuridɛnw canʔafolomɔ ma.

⁶ Níì cán Manase yòdaʔayi cálipiigéle maa kɔrigaa taa wi yòdaʔayi nínge ni, á Galaadi tári pye Manase yòdaʔayee wóro.

⁷ Manase láʔagologi maa séli Azɛɛri ma níì kári fwɔ́ɔ n sáà nan Mikimetati na wi yɛʔɛ̀ wáa lè Sisyɛmi ma, níì fala Yamɛ ma Ɛn-Tapuwa ye kàbangi na.

⁸ Tapuwa tɛ́nɛmi maa pye Manase yòdaʔayi wómɔ, kàjáa Tapuwa tiimaa wi pye lè Manase láʔagologi na, woro maa pye Efirayimi yòdaʔayi wóo.

⁹ A láʔagologi tìgi n fala Kana lòcoologi ma, lòcoologi wòrogulo kàbaan na. Kěyi yi pye yaà lè, yoro maa pye Efirayimi wóyo, bi gi taa yi i nyɛ Manase wóyi nínge ni. Manase láʔagologi gi lè lòcoologi solomɔkulo ma, a koro sáà láʔa Sólomi Lòkpɔʔɔ na.

¹⁰ Wòrogulo kàbangi maa pye Efirayimi wóʔo, solomɔkulo kàbangi si i nyɛ Manase wóʔo. Sólomi Lòkpɔʔɔ si i nyɛ pe láʔagologi. Manase ye maa sogi Azɛɛri na solomɔkulo kàbangi na ní wɔ́ɔ̀ sogi Isakari na canʔafolomɔ kabangi na.

¹¹ Kěyee Manase taa lè Isakari, ní Azɛɛri ni, yoro yi nyɛ: Bɛti-Syeyan ní gi tɛ́nɛmi kèye, ní Yibileyami ní gi tɛ́nɛmi kèye, ní Dɔɔri ye ní gi tɛ́nɛmi kèye, n fàra Ɛn-Dɔɔri ye ní gi tɛ́nɛmi kèye, ní Taana ye ní gi tɛ́nɛmi kèye, ní Megido ye ní gi tɛ́nɛmi kèye na. A yoro pye tɛ́nɛdɛɛyɛ taanri.

¹² Manase jáabèle da gbàn n kěyi bee syɔɔ n taa í. Kanaan ye da fɔ̀lɔ n yiri tári bee ni í.

¹³ Lǎli ni si Isirayɛli ye baa fànʔa taa lè, a be Kanaan ye kɔ́ri pe i pɔrɔtɔɔri fáli kpéʔele, pe ga gbàn n be nɛnɛ n yirige yaà í.

¹⁴ A Zyozɛfu yòdaʔayi wòolo baa gi joo Zyozuwe ma níì jo: «Nyàʔá na mɔ tɛʔɛ̀ nibin kaan wolo ma, lɛɛlɛ nibin yagana wolo kɔ́rigi, bi gi taa wolo i nyɛ syɛɛnnɛʔɛmɛ àmɛɛ Yawe dùbaw taʔa wolo na lè n baa nan lǎli naa na?»

¹⁵ A Zyozuwe be pye: «Kapye yele i nyɛ syɛɛnnɛʔɛmɛ, ye lúgu yaa syée kɔligi ma ye sa tɛɛgaa jaa yaà beè Perezi ye ní Erefa ye tári ni àmɛɛ Efirayimi nyanbeleyi kúlo cɛ́rɛ yele ni lè.»

¹⁶ A Zyozɛfu yòdaʔayi jo: «Nyanbeleyi kúlo a tɔ̀nɔ́ wolo yɛlɛ í, kàjáa Kanaan ye myɛ be nyɛ lè wodɛ́ɛnbéle ní jǐnlɔgi ni, ní bele be nyɛ lè Bɛti-Syeyan, ní gi tɛ́nɛmi kèye ni, n fàra bele na be nyɛ lè Zyizireyɛli jǐnlɔgi ni, tunmɔrɔ kapɛɛnkpumɔn-wòtorobéle i nyɛ be ma.»

¹⁷ A Zyozuwe gi joo Zyozɛfu kpáagi wòolo ma, pe lè Efirayimi ye, ní Manase ye, níì jo: «Yele i nyɛ syɛɛnnɛʔɛmɛ, a yele fǎngi wɔ́ɔ̀ nɛʔɛ, yele lɛɛli ga yɛlɛ li pye nibin yagana í.

¹⁸ Kàjáa nyanbeleyi kúlo a pye yele wólo àlí àmɛɛ li wírē nyɛ lè kɔligɔ tɛ́ʔɛ, yele a gi jaa si tɔ̀nɔ taa gi ni. Yele a Kanaan ye nɛnɛ yirige yaà, àlí tunmɔrɔ kapɛɛnkpumɔn-wòtorobéle wírē nyɛ be ma lè, á be fǎngi wɔ́ɔ̀ nɛʔɛ.»