Zyozuwe 16 - Cebaara Bible 2010

Efirayimi ní Manase tálɛɛli

¹ Tɛ́ɛgee gi kaan Zyozɛfu jáabèle ma lè, ki maa séli yaà Zyuridɛnw na Zyeriko taana, Zyeriko lógi kàbaan na canʔafolomɔ ma. Níì láa yaà beè n sɔ̀lɔ fìími tára ni n fala Betɛli nyanbeleyi kúlo ma.

² A gi níì láa yaà Betɛli ma n sɔ̀lɔ Luzi ma n kári Atarɔti ma beè Arika ye da pye lè.

³ A gi níì tìgi n fala canʔajeemɛ ma, Yafilɛti ye láʔagologi kàbaan na, n kári fwɔɔ n sáà nan táàma Bɛti-Horɔn tásaligi na, níì kári n sáà nan Gezɛɛri na n sáà láʔa Sólomi Lòkpɔʔɔ na.

⁴ Koro gi pye Zyozɛfu jáabèle Manase ní Efirayimi kɔ́rigi.

⁵ Efirayimi yòdaʔayi láʔagologo gi nyɛ gee naa n yɛlɛ ní be túluyi ní. Pe tári canʔafolomɔ kabangi láʔagologo maa séli Atarɔti-Adaari na níì kári fwɔɔ n sáà nan ǹjoʔo ma Bɛti-Horɔn na.

⁶ Láʔagologi maa láa nɛɛ bee Sólomi Lòkpɔʔɔ na níì taʔa n fala Mikimetati ma solomɔkulo kàbangi na, ní níì wàli n fala canʔafolomɔ kabangi na n sɔ̀lɔ Taanati-Silo kàbangi na n kári fwɔɔ n sáà nan Yanowa na canʔafolomɔ ma.

⁷ A gi níì láa Yanowa ma n tìgi n fala Atarɔti ní Naarata ma, n sáà sígi Zyeriko na, níì kári n sáà nan Zyuridɛnw na.

⁸ A gi níì yìri Tapuwa ma n kári canʔajeemɛ ma fwɔɔ n sáà nan Kana lòcoologi na, ní níì kári fwɔɔ n sáà láʔa Sólomi Lòkpɔʔɔ na. Koro gi pye Efirayimi yòdaʔayi syɛɛnfelege kɔ́rigɔ n yɛlɛ ní be túluyi ní.

⁹ Pe maa kèyaa wòlo n fàra yi kèpiigèle na Manase yòdaʔayi kɔ́rigɔ ni n yaʔa Efirayimi yòdaʔayi ma.

¹⁰ Kanaan ye be pye wodɛ́ɛnbéle ní Gezɛɛri ni lè, pe ga bele bee nɛnɛ n yirige yaà í. Kanaan ye sèʔé i nyɛ wodɛ́ɛnbéle ní Efirayimi ye níngi ni àlí n baa nan níjanʔa na. Kàjáa pe n be kɔ́ri pe i pɔrɔtɔɔri fáli kpéʔele.