Zyozuwe 13 - Cebaara Bible 2010

Tátɛɛyi yi kòro pe yi jáa lè

¹ Zyozuwe maa baa lɛɛ gbanʔama. Lǎli bee ni a Yawe wi pye: «Mɔ wi lɛɛ n kwɔ́ɔ wee gbanʔama, á tánɛʔɛrɛ si sèʔê kòro, dee di yɛlɛ di syɔɔ lè.

² Táree di sèʔê kòro lè toro di nyɛ dee naa: Filisitini ye tɛ́nɛmi myɛ, ní Gesyuri ye tári myɛ,

³ nlaa Syihɔri lógi na gi fóo ni sɔ̀lɔ́ lè Ezyipiti yɛ́ʔɛ ma fwɔɔ n sáà nan Ekurɔn láʔagologi na solomɔkulo kàbangi na. Tári bee di córo Kanaan ye wóri, gee bee n jo dee Filisitini ye fànʔafɔbèle kagunɔ da ni kàragí lè pe lè Gaza wów, ní Asidɔdi wów, ní Asikalɔn wów, ní Gati wów, ní Ekurɔn wów n fàra Avii ye na.

⁴ Wòrogulo kàbangi tára myɛ i nyɛ Kanaan ye wóro, gee bee n jo nlaa Meyara na ki lè Siidɔn ye wógi fwɔɔ n sáà nan Afɛki na, ki lè Amɔri ye tári láʔagologo.

⁵ Gibilii ye tári, ní Liban canʔafolomɔ kabangi myɛ, nlaa Baali-Gadi tári ma yaà nyanbelegi tìgimɛ ni ki lè Hɛrimɔn, níì kári fwɔɔ n sáà nan Lebo-Hamati na,

⁶ ní nyanbeleyi kúlo syɛ̀ɛnnɛ myɛ, nlaa yaà Liban na fwɔɔ n sáà nan Misirefɔti-Mayɛn na, gee bee n jo Siidɔn ye myɛw. Mii a be nɛnɛ yirige yaà Isirayɛli ye yɛ́ʔɛ ma. Ki si n yɛlɛ mɔ í dee bee myɛ kaan Isirayɛli ye ma kɔrigɔ ní gɔ̌nwáari ní bi yɛlɛ ní gi ní àmɛɛ mii gi joo n gbàn mɔ ma lè.

⁷ Koro na ki n yɛlɛ mi tári naa lɛɛ tɔ́ɔliw ni syɛɛnfeleyi kpanjɛrɛ ní Manase syɛɛnfelegi tíla na.»

Zyuridɛn canʔafolomɔ tári lɛɛlɛ kéele

⁸ Syɛɛnfelegi tílawee, ní Wurubɛn ye, ní Gadi ye maa be kɔ́rigi lɛɛlɛ taa n kwɔ́ɔ, lee Mowizi da kaan be ma lè Zyuridɛn canʔafolomɔ ma. Mowizi wi lè Yawe falipyew, woro wi gi lɛɛ be na kánmi naa na:

⁹ Nlaa yaà Aroyɛɛri na wi lè Arinɔn lòcoologi nyɔ́ɔ na, ní kěgi na ki nyɛ lè jǐnlɔgi nínge ni, ní Medeba ǹjoʔomaw myɛ fwɔɔ n sáà nan Dibɔn na,

¹⁰ ní Amɔri ye fànʔafɔw Sihɔn kěyi myɛ fwɔɔ n sáà nan Amɔn ye tári láʔagologo na. Hɛsyibɔn ni Sihɔn da pye wodɛ́ɛɔn ní fǎngi na.

¹¹ Galaadi tɛ́nɛmi bi lè Gesyuri ye, ní Maaka ye wómi, a be poro myɛ syɔɔ n fàra nyanbelegi na ki lè Hɛrimɔn ní Basyan myɛw fwɔɔ n sáà nan Salika na,

¹² gee bee n jo Ogi fǎngi tɛ́nɛmɛ myɛw Basyan ni. Ogi maa tɛ́ɛn fǎngi na Asyitarɔti, ní Edireyi ni. Erefa ye wogorowaa wi da pye. Mowizi maa fànʔafɔbèle bee kpóo níì be tári syɔɔ n taa.

¹³ Kàjáa Isirayɛli ye da Gesyuri ye ní Maaka ye yirige yaà í. Gesyuri ye ní Maaka ye sèʔé i nyɛ wodɛ́ɛnbéle ní Isirayɛli ye níngi ni fwɔɔ n baa nan níjanʔa na.

¹⁴ Levii syɛɛnfelegi yagana gi nyɛ kɔrigɔ ga kaan gi ma í. Sárigawee náagi sórogi ni kwóo Yawe yɛ́ʔɛ ma wi lè Isirayɛli ye Kolocɔlɔw, woro wi pye be kɔ́rigi àmɛɛ Yawe da gi joo be ma lè.

¹⁵ Mowizi maa lɛɛlɛ kaan Wurubɛn ye syɛɛnfelegi ma n yɛlɛ ní be túluyi ní.

¹⁶ Tásaligi pe da taa lè ki maa séli Aroyɛɛri na Arinɔn lòcoologi nyɔ́ɔ na, ní kěgi na gi nyɛ lè jǐnlɔgi nínge ni, ní Medeba taana tɛɛ̀fála-falagi myɛ.

¹⁷ Hɛsyibɔn ní gi tɛɛ̀fála-falagi kèye myɛ yi lè Dibɔn, ní Bamɔti-Baali, ní Bɛti-Baali-Meyɔn,

¹⁸ ní Yahasi, ní Kedemɔti, ní Mefaati,

¹⁹ ní Kiiriyatayimi, ní Sibima, ní Serɛti-Hasyahari ki lè jǐnlɔgi nyanbelege na,

²⁰ ní Bɛti-Peyɔɔri, ní Pisiga kòlodìgimi ní Bɛti-Hayesyimoti,

²¹ gee bee n jo kěyi myɛ yi nyɛ lè tɛɛ̀fála-falayi na n fàra Amɔri ye fànʔafɔw Sihɔn fǎngi tɛ́nɛmɛ myɛ na, woro wee wi pye fǎngi na lè Hɛsyibɔn ni. Mowizi maa baa wi ní Madyan kùndigibèle kpóo, be pye lè Evii, ní Erekɛmi, ní Suuri, ní Huri, ní Ereba. Bele bee maa pye kùndigibéle, bele Sihɔn da ni kàragí lè. Pe maa pye wodɛ́ɛnbéle ní tári bee ni.

²² Bele Isirayɛli ye da kpóo lè ní ŋɔséew ní, Beyɔɔri jáaw Balaami wi pye lè kanyaaw, woro maa wɔ́ɔ̀ pye bele bee wàa.

²³ Wurubɛn ye canʔajeemɛ láʔagologi gi pye Zyuridɛnw. Kěyi ní yi kèpiigèle be nyɛ́nɛ lè, yoro yi pye Wurubɛn ye kɔ́rigi n yɛlɛ ní be túluyi ní.

²⁴ Mowizi maa lɛɛlɛ kaan Gadi syɛɛnfelegi ma, gee bee n jo Gadi ye ma, n yɛlɛ ní be túluyi ní.

²⁵ Tári pe da taa lè toro di pye Yayezɛɛri, ní Galaadi kěyi myɛ, ní Amɔn ye tári tíla ní fwɔɔ n sáà nan Aroyɛɛri na wi nyɛ lè Araba zǐnmi na.

²⁶ Ti n séli Hɛsyibɔn na níì kári fwɔɔ n sáà nan Aramati Misipe ní Betonimi na, ní níì séli Mahanayimi na n kári fwɔɔ n sáà nan Debiiri láʔagologi na,

²⁷ ní jǐnlɔgi Bɛti-Harami, ní Bɛti-Nimira, ní Sukɔti, ní Safɔn, gee bee n jo Hɛsyibɔn fànʔafɔw Sihɔn fǎngi tɛ́nɛzanma. Zyuridɛnw wi pye tári tɛɛ̀laʔala níì kári fwɔɔ n sáà nan Kinerɛti lòkpɔɔgi tɛɛ̀laʔala na Zyuridɛnw canʔafolomɔ ma.

²⁸ Kěyi ní yi kèpiigèle ke da pye Gadi ye kɔ́rigi n yɛlɛ ní be túluyi ní.

²⁹ Mowizi maa lɛɛlaa kaan Manase syɛɛnfelegi tíla ma, gee bee n jo Manase syɛɛnfelegi tíla yòdaʔaya ma n yɛlɛ ní be túluyi ní.

³⁰ Tári pe da taa lè ti maa séli Mahanayimi na, gee bee n jo Basyan myɛw wi lè Basyan fànʔafɔw Ogi fǎngi tɛ́nɛmɛ myɛw n fàra Yayiiri kěyi myɛ togoye taanri na yi pye lè Basyan tɛ́nɛmi ni,

³¹ n fàra Galaadi tílaw na, ní kěyee ní yi nyɛ lè Asyitarɔti, ní Edireyi, Ogi fǎngi kèkpoloyaa yi pye Basyan ni. Tɛ́ɛgi bee gi pye Manase jáaw Makiiri yòdaʔagi wóʔo. Ki n pye Makiiri yòdaʔagi tíla wóʔo n yɛlɛ ní be túluyi ní.

³² Kɔ́rigi bee si Mowizi da lɛɛ n wi yaʔa Mowabi tɛɛfiiyi na Zyuridɛn jeligɔgee na Zyeriko canʔafolomɔ ma,

³³ Mowizi da kɔrigɔ kaan Levii syɛɛnfelegi ma í. Yawe wi lè Isirayɛli ye Kolocɔlɔw, woro wi pye be kɔ́rigi n yɛlɛ ní gi ní àmɛɛ wi da gi joo be ma lè.