Zyozuwe 11 - Cebaara Bible 2010

Kapɛɛnni kpúmɔnnɔ kéele Merɔmi lònyɔɔw na

¹ Yabɛn wi lè Hasɔɔri fànʔafɔw, a woro ga kéeli bee lóʔo, a wi tundunbéle tun Madɔn fànʔafɔw Yohabi ma, ní Syimurɔn fànʔafɔw, ní Akisyafi fànʔafɔw ma,

² n fàra fànʔafɔbèle bele na be pye lè solomɔkulo kàbangi na nyanbeleyi kúlo ni, ní Araba ni, Kinarɔti wòrogulo kàbangi na, ní jǐnlɔgi tára, ní Dɔɔri dǎndamayi na, canʔajeemɛ ma.

³ Wi maa wɔ́ɔ̀ tun Kanaan ye ma be pye lè canʔafolomɔ ní canʔajeemɛ kabangi na n fàra Amɔri ye, ní Hɛti ye, ní Perezi ye, ní Yebusi ye na be pye lè nyanbeleyi kúlo ni, n wɔ́ɔ̀ tun Hɛvi ye ma be pye lè wodɛ́ɛnbéle ní Hɛrimɔn nyanbelegi tìgimɛ ni Misipa tári ni.

⁴ A be yiri ni maa pe ní be kapɛɛnkpumɔnbèle myɛ ní. Pe maa nɛʔɛ àmɛɛ Sólomi Lɔ̀ʔɔ nyɔ́ɔ táminyɔɔ nyɛ lè. Syɔ́ɔnyi ní kapɛɛnkpumɔn-wòtorobèle maa nɛʔɛ be ma gbanʔama.

⁵ Fànʔafɔbèle bee myɛ maa bɛ̀ɛ nibin na ní baa tɛ́ɛn Merɔmi lógi nyɔ́ɔ na jàngó bi kapɛɛnni kpúmɔn ní Isirayɛli ye ní.

⁶ A Yawe Zyozuwe pye: «Mɔ a kɔ́ ra fɛ̀ɛgí be na í, níì cán nyɛ̀ʔɛna níbeena nyɔʔɔmɔ na, mii a be myɛ le Isirayɛli ye kɔ́yi ni. Pe a pye wogbumɔn-gbàlibēle ní, kùumɔ. Mɔ a be syɔ́ɔnyi tɔ́lɔyɔ kadoʔo ma kápangboloyo cɛnɛ, si be kapɛɛnkpumɔn-wòtorobèle sórigo ní naà ní.»

⁷ A Zyozuwe ní wi kapɛɛnkpumɔnbèle kári n sáà foo n jée be ni, Merɔmi lógi nyɔ́ɔ na n too be na.

⁸ A Yawe be le Isirayɛli ye kɔ́yi ni. A be fànʔa taa be na, níì be kɔ́ri n láa ni nɛnɛ ni syée fwɔɔ n sáà nan Siidɔn na ki lè kèkpɔɔgi, ní wɔ́ɔ sáà nan Misirefɔti-Mayɛn, ní Misipa jǐnlɔgi na canʔafolomɔ kabangi na. A pe be kálagi n kwɔ́ɔ. Pe ga wàa nibin yaʔa a wi syɔɔ í.

⁹ Gee Yawe da joo Zyozuwe ma lè, a wi koro kpéʔele be na. Wi n be syɔ́ɔnyi kàdoʔo ma tɔ́lɔyɔ kápangboloyo cɛnɛ, níì be kapɛɛnkpumɔn-wòtorobèle sórigo ní naà ní.

Hasɔɔri jáali kéele

¹⁰ A Zyozuwe ga lúru ni maa, a wi baa Hasɔɔri syɔɔ n taa, níì gi fànʔafɔw kpóo ní ŋɔséew ní. Booma ni Hasɔɔri wi da pye fǎnyi bee myɛ fàngaʔa.

¹¹ A be gi syɛ́ɛnbèle myɛ kpóo ní ŋɔséew ní. Pe ga pe wàa nibin yaʔa í, yala o yala li ŋɔ́ngi lè li làa ga kòro í, níì Hasɔɔri sórigo ní naà ní.

¹² A Zyozuwe wɔ́ɔ̀ fànʔa taa fànʔafɔbèle bee kèye myɛ, ní yi fànʔafɔbèle myɛ na. A wi be kpóo ní ŋɔséew ní. Wi n be kpóo péw àmɛɛ Yawe falipyew Mowizi da gi joo n gbàn lè.

¹³ Kèyi yi pye dǎndamayi na lè, Isirayɛli ye ga gi kàa sórigo í fwɔɔ Hasɔɔri yagana, koro gee Zyozuwe sórigo lè.

¹⁴ Isirayɛli ye si maa kěyi bee yarira koli n fàra yi yaweeri na n kòro ní di ní. Kàjáa pe maa syɛ́ɛnbèle myɛ kpóo n kwɔ́ɔ ní ŋɔséew ní. Yala o yala li ŋɔ́ngi lè pe ga li làa yaʔa í.

¹⁵ Gee Yawe da joo n gbàn wi falipyew Mowizi ma lè, Mowizi maa gee bee joo n gbàn Zyozuwe ma, a Zyozuwe gi foro. Gee myɛ Yawe da joo n gbàn Mowizi ma lè wi ga gi kàa faala yaʔa í.

Zyozuwe n tári syɔɔ n taa n kwɔ́ɔ

¹⁶ A Zyozuwe tári bee myɛ syɔɔ n taa, gee bee n jo ti nyanbeleyi kúlo, ní di wòrogulo kàbangi myɛ, ní Gosyɛn tári myɛ, ní tìgimi tára, ní Araba ní, n fàra Isirayɛli nyanbeleyi kúlo, ní li tìgimi tára na.

¹⁷ A wi fànʔa taa tári bee fànʔafɔɔlɔ myɛ na, níì be kpóo nlaa yaà nyanbewaagi na gi nyɛ lè Seyiiri kàbangi na fwɔɔ n sáà nan Baali-Gadi na, Liban jǐnlɔgi ni ki nyɛ lè nyanbelegi tìgimɛ ni ki lè Hɛrimɔn.

¹⁸ Zyozuwe maa mɔn kapɛɛnni na ní fànʔafɔbèle bee myɛ ní.

¹⁹ Hɛvi ye be pye lè Gabaɔn ni, kapye poro yagana ban í, kègaa faala woolo ga níì bɛ̀ɛlɛ lége poro ní Isirayɛli ye níngi ni í. A be wozanyi myɛ syɔɔ n taa kapɛɛnni báriga ni.

²⁰ Níì cán Yawe má be fúnyi gbànna da yìri jàngó paa kapɛɛnni kpúmɔn ní Isirayɛli ye ní, koro ga pye pe be kálagi kwɔ́ɔ péw. Nyinimɛ a kɔ́ taa be na í, fwɔɔ pe be myɛ kálagi bi kwɔ́ɔ bi yɛlɛ ní syɛ́ɛnri ní Yawe da joo n gbàn Mowizi ma lè.

²¹ Lǎli bee wonijanna ni a Zyozuwe kári n sáà Anaki ye kwɔ́ɔ n yirige yaà, poro bele be pye lè nyanbeleyi kúlo kèye ni, yi lè Heburɔn, ní Debiiri, ní Anabi, n fàra Zyuda nyanbeleyi kúlo myɛ, ní Isirayɛli nyanbeleyi kúlo myɛ na. A Zyozuwe pe ní be kěyi kálagi péw.

²² Anaki ye wówaa faala ga níì kòro Isirayɛli tári ni í, fwɔɔ Gaza, ní Gati, ní Asidɔdi ni pe pèle da kòro.

²³ A Zyozuwe tári myɛ syɔɔ n taa n yɛlɛ ní gee myɛ ní Yawe da joo Mowizi ma lè. A Zyozuwe di kaan Isirayɛli ye ma kɔrigɔ àmɛɛ wi di tíla be na lè syɛɛnfeleye syɛɛnfeleye. A tári ŋɔ́n n daa kapɛɛnni fɔ̀rɔgɔ na.