Zyozuwe 10 - Cebaara Bible 2010

Pe n Amɔri ye fànʔafɔbèle jáa

¹ Adoni-Sedɛki wi pye lè Zyerusalɛmi fànʔafɔw, wi maa gi lóʔo àmɛɛ Zyozuwe fànʔa taa Ayi na lè, níì gi syɛ́ɛnbèle myɛ kálagi n kwɔ́ɔ lè. Gee wi kpéʔele Zyeriko ní wi fànʔafɔw na lè, koro wonijangi wi wɔ́ɔ̀ kpéʔele Ayi ní wi fànʔafɔw na. A wi wɔ́ɔ̀ gi lóʔo Gabaɔn ye n kári n sáà bɛ̀ɛlɛ caa Isirayɛli ye ma níì kòro be níngi ni.

² Lǎli bee ni a gi pye wi ní wi syɛ́ɛnbèle ma fyáakpɔɔrɔ. Níì cán Gabaɔn maa pye kèkpɔʔɔ àmɛɛ fàngaʔa nyɛ lè. Alí ki maa kpɔ́ʔɔ Ayi na, ki nǎnbèle myɛ si i nyɛ kapɛɛnkpumɔn-sànbalibéle.

³ Koro na Zyerusalɛmi fànʔafɔw Adoni-Sedɛki tun Heburɔn fànʔafɔw Hohami, ní Yarimuti fànʔafɔw Pireyami, ní Lakiisyi fànʔafɔw Yafya, ní Egulɔn fànʔafɔw Debiiri ma n be nyɛ́ɛri níì jo:

⁴ «Yaa maa ye ba mii dɛ̀ɛmɛ wo Gabaɔn jaa, níì cán pe n sáà bɛ̀ɛlɛ lége poro ní Zyozuwe ní Isirayɛli ye níngi ni.»

⁵ A Amɔri ye fànʔafɔbèle kagunɔ peyɛɛ gbóʔoro, pe lè Zyerusalɛmi fànʔafɔw, ní Heburɔn fànʔafɔw, ní Yarimuti fànʔafɔw, ní Lakiisyi fànʔafɔw, ní Egulɔn fànʔafɔw, n kári ní be kapɛɛnkpumɔnbèle myɛ ní n sáà tɛ́ɛn Gabaɔn taana bi kapɛɛnni kpúmɔn ní wi ní.

⁶ A Gabaɔn syɛ́ɛnbèle tun a be sáà gi joo Zyozuwe ma Giiligali ma, beè wi pye lè wodɛ́ɛɔn ní, níì wi pye: «Mɔ a kɔ́ mɔ púlobèle yaʔa í. Da maa kelekele mi ba wolo syɔɔ, ba wolo dɛ̀ɛmɛ. Níì cán Amɔri ye fànʔafɔbèle be nyɛ lè nyanbeleyi kúlo ní, pe n peyɛɛ gbóʔoro n pan ba too wolo na.»

⁷ A Zyozuwe yiri Giiligali ni n kári, woro ní wi kapɛɛnkpumɔnbèle, ní wi kapɛɛnkpumɔn-sànbalibèle myɛ ní.

⁸ A Yawe Zyozuwe pye: «Mɔ a kɔ́ ra fɛ̀ɛgí be na í. Níì cán mii n be le mɔ kɔ́yi ni. Pe wàa a gbǎn fànʔa taa bi yére mɔ sige í.»

⁹ A Zyozuwe baa pàla n nan be na, níì cán wi maa yìri Giiligali ma n yébiligi myɛ pye tánʔani na.

¹⁰ A Yawe be cariga peyɛɛ na Isirayɛli ye yɛ́ʔɛ ma. A be tɔ̀nɔ n pèle saʔa kpóo be ni Gabaɔn ni, níì be nɛnɛ n sɔ̀lɔ kólogi ni ki lúru ni syée Bɛti-Horɔn ma lè, ní i be kúu ni syée fwɔɔ n sáà nan Azeka, ní Makeda na.

¹¹ Lǎli ni be pye ni fé Isirayɛli ye yɛ́ɛgi na ni tíri Bɛti-Horɔn tìgimi ni lè, a Yawe i zěsolo-kùnguru-kpóloyo yìrigí nyɛ̀ʔɛni na ni be wábagi ni kúu ni syée fwɔɔ n sáà nan Azeka na. Bele be kùu zěsolo-kùnguriyi báriga ni lè, a poro nɛʔɛ n sɔ̀lɔ bele na Isirayɛli ye kpóo ní ŋɔséebèle ní lè.

¹² Cángee na Yawe Amɔri ye le Isirayɛli ye kɔ́yi ni lè, lǎli bee ni a Zyozuwe gee naa nyɛ́ɛri Yawe ma Isirayɛli ye nyɛ́nɛ na níì jo: «Cángi, ki n yɛlɛ mi yére Gabaɔn nyúngi ni. Yégi, ki n yɛlɛ mi yére Ayalɔn jǐnlɔgi ǹjoʔo ni.»

¹³ A cángi yére a yégi wɔ́ɔ̀ yére fwɔɔ bi taa Isirayɛli syɛɛnfelegi í gi gɔ̀lɔ́w wòlo ki nigoobèle na. Kéeli bee n sɛ́bɛ Wozinw sɛ́bɛ ni. Lǎli ni cángi tɛ́ɛn nyùngo ni lè, a gi yére beè n canbogo félege kwɔ́ɔ. Ki ga sɛ̀ʔɛrɛ n kári canʔajeemɛ ma í.

¹⁴ Cángi bee félege da kɔ́ɔ̀ pye í, ki felege si ga ní wɔ́ɔ̀ pye í, gee ni Yawe lóʔo syɔɔn ma kánmi bee na lè. Yawe wi da ni kapɛɛnni kpúmɔn ni kaangi Isirayɛli ye ma.

¹⁵ Koro kàdoʔo ma a Zyozuwe ní Isirayɛli ye myɛ lúru n kári tɛɛkòrogi ma ki lè Giiligali ma.

Zyozuwe n fànʔafɔbèle kagunɔ kpóo

¹⁶ Fànʔafɔbèle bee kagunɔ si maa fàn n sáà làra Makeda fálaweegi ni.

¹⁷ A be sáà gi joo Zyozuwe ma níì jo: «Fànʔafɔbèle kagunɔ i yaà wolarabéle ní fálaweegi ni Makeda ma.»

¹⁸ A Zyozuwe be yari: «Ye sa kàdɛnɛgboloyo kòlogo ye tɔ́n fálaweegi nyɔ́ɔ na, yé nǎnbèle pèle télege yaà paa be kpáaw wéle.

¹⁹ Yele si na, yele a kɔ́ yére í. Ye taʔa yele nigoobèle na yaa nɛnɛ, yaa be ceri. Yele a kɔ́ be yaʔa be jée be kěyi ni í, níì cán Yawe wi lè yele Kolocɔlɔw, wi n be le yele kɔ́yi ni.»

²⁰ A Zyozuwe ní Isirayɛli ye tɔ̀nɔ n be kpóo saʔa n tɔ̀nɔ n be kálagi, fwɔɔ bele be fàn n syɔɔ be ni lè n sáà jée kèniriyi ni.

²¹ A syɛ́ɛnmi myɛ lúru n pan wonyinbéle ní Zyozuwe ma tɛɛkòrogi ma ki nyɛ lè Makeda taana. Syɔɔn faala ga níì soro n yére bi syɛɛnrɛ joo wáa Isirayɛli ye na í.

²² Koro kàdoʔo ma a Zyozuwe jo: «Ye sa fálaweegi nyɔ́ɔ múgu yé fànʔafɔbèle bee kagunɔ yirige fálaweegi ni yaa maa mii ma.»

²³ Kánmi bee na pe gi kpéʔele n sáà fànʔafɔbèle bee kagunɔ yirige fálaweegi ni n pan wi ma. Poro be nyɛ Zyerusalɛmi fànʔafɔw, ní Heburɔn fànʔafɔw, ní Yarimuti fànʔafɔw, n fàra Lakiisyi fànʔafɔw, ní Egulɔn fànʔafɔw na.

²⁴ Lǎli ni be fànʔafɔbèle bee yirige n pan Zyozuwe ma lè, a Zyozuwe Isirayɛli nǎnbèle myɛ yeri ní baa gi joo kapɛɛnkpumɔnbèle kàfɔɔlɔ ma, bele pe da kári ní wi ní lè, níì be pye: «Ye nùuni naa ye ba yele tɔ́lɔyi taʔala fànʔafɔbèle naa yatiiye na.» A be nùuni yaà n sáà be tɔ́lɔyi taʔala be yátiiyi na.

²⁵ A Zyozuwe be pye: «Yele a kɔ́ ra fɛ̀ɛgí í, zɔ̀nviige a kɔ́ ra yele kɔɔn í, ki n yɛlɛ ye soro yé lòmaana le. Níì cán yele nigoobèle bele ní yele a kapɛɛnni kpúmɔn lè, Yawe a be pye bele naa pyeganma na.»

²⁶ Koro kàdoʔo ma a Zyozuwe be kpóo níì be cɔ̀rɔ tiiye kagunɔ na, a pe woguubèle kòro tíiyi na fwɔɔ n baa nan cângwɔɔgi nyɔ́ɔ na.

²⁷ Lǎli ni cángi baa jée lè, a Zyozuwe gi joo n gbàn be ma pe be tìrige tíiyi na. A pe be tìrige n sáà wáa fálaweegi ni, gee ni pe da làra lè, níì kàdɛnɛgboloyo tɔ́n fálaweegi nyɔ́ɔ na. Yi i yaà fwɔɔ n baa nan níjanʔa na.

Zyozuwe n wòrogulo kàbangi kèye jáa

²⁸ Cángi bee wonijanga na Zyozuwe fànʔa taa Makeda na, níì ŋɔséew tɛ́ʔɛ n gi jaa, níì gi fànʔafɔw kpóo n fàra gi syɛ́ɛnbèle myɛ na, wi ga pe wàa faala yaʔa a wi syɔɔ í. Gee wi kpéʔele Zyeriko fànʔafɔw na lè, koro wonijangi wi kpéʔele Makeda fànʔafɔw na.

²⁹ A Zyozuwe ní Isirayɛli ye myɛw yiri Makeda ni n kári Libina ma n sáà too Libina na.

³⁰ A Yawe wɔ́ɔ̀ ki ní gi fànʔafɔw le Isirayɛli ye kɔ́yi ni, a be ŋɔséew tɛ́ʔɛ n gi jaa. Syɛ́ɛnbèle myɛ be pye gi ni lè pe ga pe wàa faala yaʔa a wi syɔɔ í. Gee be kpéʔele Zyeriko fànʔafɔw na lè, a be koro wonijangi kpéʔele gi fànʔafɔw na.

³¹ A Zyozuwe ní Isirayɛli ye myɛ yiri Libina ni n kári Lakiisyi ma n sáà tɛ́ɛn gi taana níì too gi na.

³² A Yawe Lakiisyi le Isirayɛli ye kɔ́yi ni, a be fànʔa taa gi na canziin wógi na. A be ŋɔséew tɛ́ʔɛ n gi syɛ́ɛnbèle myɛ kpóo àmɛɛ ki da wɔ́ɔ̀ pye Libina ye na lè.

³³ Lǎli bee ni Horami wi lè Gezɛɛri fànʔafɔw, a woro kári sa Lakiisyi ye dɛ̀ɛmɛ. A Zyozuwe wi ní wi syɛ́ɛnbèle myɛ kpóo. Pe wàa nibin ga syɔɔ í.

³⁴ A Zyozuwe yiri Lakiisyi ni ní Isirayɛli ye myɛ ní n kári Egulɔn ma n sáà tɛ́ɛn gi taana níì too gi na,

³⁵ A be fànʔa taa gi na cángi bee wonijanga, ní ŋɔséew ní. Wi n gi syɛ́ɛnbèle myɛ kpóo péw cángi bee wonijanga àmɛɛ wi da gi kpéʔele Lakiisyi na lè.

³⁶ A Zyozuwe ní Isirayɛli ye myɛw yiri Egulɔn ni n kári Heburɔn ma n sáà too gi na.

³⁷ A be fànʔa taa gi na níì gi fànʔafɔw ní gi syɛ́ɛnbèle myɛ kpóo ní ŋɔséew ní, n fàra gi tɛ́nɛmi kèye syɛ̀ɛnnɛ myɛ na. Gee wi kpéʔele Egulɔn na lè, koro wonijangi wi wɔ́ɔ̀ kpéʔele yaà beè. Wi ga syɔɔn faala yaʔa a wi syɔɔ í. Wi maa tɔ̀nɔ n kěgi jaa níì gi syɛ́ɛnbèle myɛ kpóo péw.

³⁸ A Zyozuwe ní Isirayɛli ye myɛ pínɛ n lúru n pan Debiiri ma n baa too gi na.

³⁹ A wi fànʔa taa ki ní gi fànʔafɔw, ní gi tɛ́nɛmi kèye myɛ na. Wi maa kěgi jaa níì gi syɛ́ɛnbèle myɛ kpóo ní ŋɔséew ní. Wi ga pe wàa faala yaʔa a wi syɔɔ í. Gee wi kpéʔele Heburɔn ní Libina ní yi fànʔafɔbèle na lè, koro wonijangi wi kpéʔele Debiiri fànʔafɔw na.

⁴⁰ Zyozuwe maa tɔ̀nɔ n tári bee myɛ jáa, gee bee n jo ti nyanbeleyi kúlo, ní di wòrogulo kàbangi, ní di tɛɛfiigi, ní di nyanbeleyi tìgimɛ n fàra di fànʔafɔbèle myɛ na. Wi ga syɔɔn faala yaʔa a wi syɔɔ í. Yala o yala li ŋɔ́ngi lè, a wi ke myɛ kálagi péw n yɛlɛ ní gee ní Yawe Isirayɛli ye Kolocɔlɔw da joo n gbàn lè.

⁴¹ A Zyozuwe be kálagi n séli Kadɛsyi-Barineya na fwɔɔ n sáà nan Gaza na, ní Gosyɛn tɛ́nɛmi myɛ na n fàra Gabaɔn na.

⁴² A Zyozuwe fànʔafɔbèle bee myɛ jáa làrinijanni ni n fàra be tátɛɛyi na, níì cán Yawe wi lè Isirayɛli ye Kolocɔlɔw, wi maa ni kapɛɛnni kpúmɔn ni kaangi Isirayɛli ye ma.

⁴³ A Zyozuwe ní Isirayɛli ye myɛ lúru n kári tɛɛkòrogi ma Giiligali ma.