Zyozuwe 1 - Cebaara Bible 2010

Yawe n Zyozuwe kínige Isirayɛli ye yɛ́ɛgi na

¹ Mowizi wi pye lè Yawe falipyew, woro kùúli kàdoʔo ma, a Yawe gi joo Nun jáaw Zyozuwe ma, woro wee wi pye lè Mowizi dɛ̀ɛmɛfɔw níì wi pye:

² «Mii falipyew Mowizi n kùu. Ki n yɛlɛ mi yìri tɔ́ɔliw ni mɔ ní syɛ́ɛnbèle naa myɛ ní mi Zyuridɛnw naa jeli mi jée tári ni, dee mii a kaan yele Isirayɛli ye ma lè.

³ Yele ga yele yédaagèle taʔa tɛʔɛ o tɛʔɛ ni, mii a gi kaan yele ma bi yɛlɛ ní gi ní àmɛɛ mii gi joo Mowizi ma lè.

⁴ Yele tári láʔagoloyo a séli fìími tára na bi fala Liban ma wi yaà lè wee, si kári fwɔɔ bi sa nan cabikpɔɔgi na ki lè Ufurati cábigi, gee bee n joo Hɛti ye tári myɛw fwɔɔ bi kári sa nan Sólomi Lòkpɔʔɔ na canʔajeemɛ ma.

⁵ Mɔ siiw canya myɛ ni syɔɔn faala a gbǎn fànʔa taa bi yére mɔ sige í. Mii i nyɛ ní mɔ ní àmɛɛ mii da pye ní Mowizi ní lè. Mii a tée mɔ yaʔa í, mii a tée mɔ cáan yaʔa í.

⁶ Ki n yɛlɛ mi nìrimɛ le, mí lòmaana le, níì cán mɔ bárigaw ni syɛ́ɛnbèle naa a tári kɔ́rigɔ lìi, dee kéele na mii da kàli be toolɛɛbèle ma níì jo mii a di kaan be ma lè.

⁷ Mɔ mi tɛ́nɛ mi nìrimɛ le, mí wɔ́ɔ lòmaana le gbanʔama. Làlwawee myɛ mii falipyew Mowizi kaan mɔ ma lè, wi sámaga mi cò, máā táanri wi na. Mɔ a kɔ́ wàli bi láʔa wi na bi kári kàliige ma wàlá kàmɔnɔ ma í, koro ga pye tɛʔɛ o tɛʔɛ ni mɔ ga kári lè ki sa tɛ́nɛ mɔ na.

⁸ Làlwaw naa sɛ́bɛ syɛ́ɛnrɛ ga yɛlɛ bi fɔ̀n mɔ nyɔ́ɔgi na í. Ki n yɛlɛ mɔ í da sɔ̀ngí di na canʔa ní yébilige, koro ga pye kérigèle myɛ ge sɛ́bɛ lè wi ni, mɔ í ge sámaga cò, sáā táanri ge na. Níì cán koro ki a gi yaʔa mɔ kólogi í ra tàán, mɔ kérigèle sáā nyɔɔgi.

⁹ Mii ban wi gi joo n gbàn mɔ ma ì níì jo ki n yɛlɛ mi nìrimɛ le, mí lòmaana le ì? Mɔ a kɔ́ ra fɛ̀ɛgí í. Zɔ̀nviige ga yɛlɛ kaa mɔ kɔɔn í, níì cán tɛʔɛ o tɛʔɛ ni mɔ ga kári lè, mii Yawe mɔ Kolocɔlɔw i nyɛ ní mɔ ní.»

Zyozuwe i Zyuridɛnw jelile kéele cɔɔnri

¹⁰ A Zyozuwe syɛ́ɛnri naa joo n gbàn syɛ́ɛnmi yɛɛ̀kinibéle ma níì jo:

¹¹ «Ye nyaari ye sɔ̀lɔ ye gi joo Isirayɛli syɛ́ɛnbèle myɛ ma tɛɛkòrogi ni yé be pye: ‹Ki n yɛlɛ ye kôdanʔaliile sámaga, níì cán canya taanri ga kwɔ́ɔ níjanʔa kàdoʔo ma, yele a Zyuridɛnw jeli bi kári sa tári syɔɔ taa, dee Yawe yele Kolocɔlɔw a kaan yele ma lè.› »

¹² Koro kàdoʔo ma a Zyozuwe gi joo Wurubɛn ye, ní Gadi ye, ní Manase syɛɛnfelegi tíla ma níì jo:

¹³ «Gee Yawe falipyew Mowizi da joo n gbàn yele ma lè ki n yɛlɛ ye sɔ̀ngi ye taa gi na àmɛɛ wi da gi joo lè níì jo: ‹Yawe yele Kolocɔlɔw n yele ŋɔ́n n daa níì tári naa kaan yele ma.›

¹⁴ Táree Mowizi kaan yele ma Zyuridɛn jeligi naa na lè, yele cébèle, ní yele pìiyilibèle, ní yele yaweeri a kòro naa di ni. Yele nǎnbèle myɛ si ye nyɛ bi gbǎn kapɛɛnnɛ kpúmɔn lè, ye yele kapɛɛnkpumɔn-yáriri láa ye kíni yele senyɛnbèle yɛ́ʔɛ na ye Zyuridɛnw jeli ye sa be dɛ̀ɛmɛ,

¹⁵ fwɔɔ bi taa Yawe í sa ŋɔ́ndaala kaan yele senyɛnbèle ma àmɛɛ wi li kaan yele ma lè, pé wɔ́ɔ tári fáliga taa, dee Yawe yele Kolocɔlɔw a kaan be ma lè. Koro kàdoʔo ma tári di lè yele wóri, toro dee Yawe falipyew Mowizi kaan yele ma lè Zyuridɛn jeligi naa na canʔafolomɔ ma, yele a náa lúru pan ba tɛ́ɛn di ni.»

¹⁶ A be Zyozuwe yari: «Gee myɛ mɔ joo n gbàn wolo ma lè, wolo a gi kpéʔele. Mɔ ga wolo tun tɛ́ɛgee faala ni lè, wolo a kári yaà.

¹⁷ Wolo a ra lúro mɔ ma àmɛɛ wolo da ni lúro Mowizi ma kérigèle myɛ ni lè. Ki n yɛlɛ Yawe mɔ Kolocɔlɔw í tɛ́nɛ pye ní mɔ ní àmɛɛ wi da pye ní Mowizi ní kánmee na lè.

¹⁸ Syɔ́ɔnwee faala ga mɔ kajoogèle cée lè, wi ga fɔ̀lɔ ni mɔ syɛ́ɛnri lúro í, gee bee n jo gee myɛ mɔ ga joo n gbàn wi ma lè wi ga fɔ̀lɔ n gi lóʔo í, wi a kpóo wii. Ki n yɛlɛ mi tɛ́nɛ mi nìrimɛ le, mí lòmaana le.»