Zyowɛli 3 - Cebaara Bible 2010

Yawe a wi Pǐli yàli pe myɛ na

¹ «Gee bee kàdoʔo ma, mii a mii Pǐli yàli syɛ́ɛnbèle myɛ na. Yele nànbiigèle, ní yele calipiigèle a ba ra kérigèle nyaagi da nyuu, yele wólɛɛbèle a ba ra ŋúnɔyi ŋúnɔ, yele wojáribèle sáā yanyaayi nyaagi.

² Alí cányi bee ni, mii a mii Pǐli yàli mii falipyenǎnbèle, ní mii falipyecebèle na.

³ Mii a kakpoloyo tɛ̀ɛn, yee yi a pye lè nyɛ̀ʔɛni ní tári na, yi a pye sìsyaan, ní naà, ní wíritɔnɔyɔ.

⁴ Cángi a ba kàri yébilimɛ, yégi si kàri sìsyaan, sáni Yawe cángi í nan lè, cángi bee gi lè cângbɔʔɔ, ní fyáara wóʔo.

⁵ Lǎli bee ni syɔ́ɔnwee faala wi ga Yawe mɛ́ɛgi yeri lè wee bee a syɔɔ, níì cán wozyɔɔbèlē a pye Siyɔn nyanbelegi na, ní Zyerusalɛmi ni àmɛɛ Yawe gi joo lè, bele Yawe a yeri lè pe a pye bele nínge ni be kòro sìi na lè.