Zyowɛli 2 - Cebaara Bible 2010

Yawe cángi n nùuni

¹ Ye tòmaagi wìi Siyɔn ni! Yaa yákpolo wáa mii nyanbejǎngi na! Ki n yɛlɛ tári syɛ̀ɛnnɛ myɛ í da cɛ̀lɛ́! Níì cán Yawe cángi i maa, ncan ki n nùuni.

² Yébilige, ní yébiliwɔɔlɔ canʔa gii, fàfaanya ní nìgolowirige canʔa gii, ki i maa àmɛɛ nyǐnjerige nyɛ lè nyanbeleyi na. Syɛɛnfelegaa wéle, gee gi nɛʔɛ lè á gi fǎngi wɔ́ɔ̀ kpɔ́ʔɔ, gee gi lè ki felege da kɔ́ɔ̀ pye beè í, ki felege si a ní wɔ́ɔ pye nyáana yìrigèle gele ni ge maa lè í.

³ Naà i sórigolo kpéʔele ki yɛʔɛ̀ ma, naanyìnge si i nyɛ ki kàdoʔo ma, gee gi sórogi lè, tári maa pye ki yɛʔɛ̀ ma àmɛɛ Edɛn nángwɔɔ nyɛ lè, ki kàdoʔomaw si na, koro i nyɛ fìimɛ tɛɛ̀kalagiga, yafyɛn o syoo gi ma í!

⁴ Mɔ ga be nyaa, pe i nyɛ mɔ a jo syɔɔnyɔ yii, pe si i fé àmɛɛ syɔɔnfànbēle nyɛ lè.

⁵ Ki i nyɛ mɔ a jo kapɛɛnkpumɔn-wòtorobéle tinmɛ bii pe yegi lè nyanbeleye ǹjoyo ni. Mɔ a jo naanyìnge tìnmɛ bii, gee gi nyàásige sórogi lè. Mɔ a jo fànnɛʔɛgɛ syɛɛnfelege gii, gee gi sámaga n kwɔ́ɔ lè kapɛɛnnɛ kánma na.

⁶ Syɛɛnfeleyi i cɛ̀lɛ́ pe yɛʔɛ̀ ma, yɛɛcɔɔgèle myɛ kánma i fɛ̀ɛ́.

⁷ Pe i fé ni syée àmɛɛ nànniribēle nyɛ lè, pe i lúru tò na àmɛɛ kapɛɛnkpumɔnbéle nyɛ lè. Pe myɛ nibin nibin i syée zinmɛ na pe kóloyi ni, pe wàa o yirigi wi kologo ni í,

⁸ pe wàa o wi pínɛnyɛnnɛ ŋɔrɔgi í, pe myɛ nibin nibin n taʔa be kóloyi na. Pe i fùurí ni syée ni forogi kapɛɛnkpumɔn-yárira ni, taaniyi sìnjeri ni.

⁹ Pe i fùurí ni tɔ́ngi kěgi na, ni fé tǒw na ni lúru ni jǐn kpáayi ni, ni jǐn fɛ̀nɛtiribèle na àmɛɛ kàyuuo nyɛ lè.

¹⁰ Tári i cɛ̀lɛ́ pe yɛʔɛ̀ ma, a nyɛ̀ʔɛni cúngo, cángi, ní yégi i kàragí yébilimɛ, ŋɔripiigèle gbɛ̀ɛnmɛ i kwóo ni syée.

¹¹ Yawe i yákpolo wáa wi kapɛɛnkpumɔnbèle yɛ́ʔɛ ma. Níì cán wi kapɛɛnkpumɔnbèle kabiga n kpɔ́ʔɔ cama, a wi syɛ́ɛnri forofɔlɔ sée kpɔ́ʔɔ. Níì cán Yawe cángi i nyɛ cângbɔʔɔ, fyáakpɔɔrɔ canʔa tɔ̀nɔ́ gii, wìí wi a gbǎn gi sígi yérige?

Lǎli n nan bi lúru pan Yawe ma

¹² Yawe n jo: «Tɔ́ɔliw naa ni, ye lúru ye pan mii ma ní yele fúnyi myɛ ní, ní súnlere, ní nyatinmɛ, ní peelele ní!»

¹³ Ye yele fúnyi sulugu, yele búroyi ban yele yɛlɛ bi sulugu í, yé lúru ye pan Yawe yele Kolocɔlɔw ma. Níì cán wi i nyɛ funjàngafɔlɔ ní nyinidaaɔ, wi fúngi o taanri kelekele í, á wi nyínimi wɔ́ɔ̀ nɛʔɛ, wi i kàdoʔo wáa wɔʔɔgi kpéʔelele ma.

¹⁴ Wìí syɔ́ɔn wi gi cán kapye wi a ba lúru kàri si kàdoʔo wáa í, si dùbaw yaʔa wiyɛɛ kàdoʔo ma í, wi lè míimi yakanʔa, ní sáriga-yólogow Yawe yele Kolocɔlɔw ma?

Súnw lele ní Kolocɔlɔɔ nyɛ́ɛrigbɔɔgi làla

¹⁵ Ye tòmaagi wìi Siyɔn ni! Ye súnlere canʔa yaʔa kɔlɔ̀ na, ye kpóʔorojànna kéele jáari!

¹⁶ Ye syɛ́ɛnbèle kpóʔoro, ye kpóʔorojànna kpéʔele! Ye wolɛɛbèle kpóʔoro, ye pìíbèle kpóʔoro, àlí pìíbèle be ŋɔri lè! Cefɔnw fɔ́lɔ n yɛlɛ bi yiri wi kpaafungi ni, cefɔnw í yiri wi tɛɛ̀sinɛgi ni!

¹⁷ Yawe falipyebèle be lè sáriga-wòlobèle, ki n yɛlɛ paa nyaan kpáali ní sáriga-wòlo-yafaangi lariga ni, Páā gi nyuu si jo: «Yawe, mɔ syɛ́ɛnbèle syɔɔ! Mɔ a kɔ́ mɔ kɔ́rigi kaan faʔari ma í, ki pye syɛɛnfeleyi kàseewaa-yáriga í. Nyàʔá na gi yɛlɛ bi kɔ́ ra nyuu syɛɛnfeleyi nínge ni si jo: ‹Sán be Kolocɔlɔw nyɛ?› »

Yawe n syɛɛnlurugoro kaan wi syɛ́ɛnbèle ma

¹⁸ Yawe i yejaʔa kpéʔele wi tári kéele ma. Wi syɛ́ɛnbèle nyínimɛ n wi taa.

¹⁹ A Yawe syɛɛnlurugoro kaan, wi n gi joo wi syɛ́ɛnbèle ma níì jo: «Wéle, mii i bilew tórogi wee yele ma, ní dùvɛɛnfɔnw, ní sǐnmi, yele a ra di líi bàā tíngi. Mii si a ní faʔara yaʔa di too yele na syɛɛnfeleyi nínge ni í.

²⁰ Mii a solomɔkulo kàbangi nígoo léeli yele na, mii a wi nɛnɛ tórigo lɔ̀ʔɔ fun tára ma, dee di lè tɛɛ̀kalagiga, wi yɛʔɛ̀ ma wóbèle a nɛnɛ lége canʔafolomɔ kabangi solomɔ lɔ́ʔɔ ni, wi kàdoʔo ma wóbèle si nɛnɛ lége canʔajeemɛ kabangi solomɔ lɔ́ʔɔ ni. Wi fɔ́nʔɔmi núngo a ra yirigi, wi nùnbɛɛngi a ra yirigi, níì cán wi n kakpoloyo pye.»

²¹ Tára, mɔ a kɔ́ ra fɛ̀ɛgí í, da muguri máā fundaanra kpéʔele, níì cán Yawe wi kakpoloyi kpéʔele!

²² Sìnbirigi yaweere, ye a kɔ́ ra fɛ̀ɛgí í, níì cán fìími tára yaweenaʔa-tɛ́ɛyɛ ní i nyàápungo yirigi, níì cán tíiri i di yasanri sangi, děsyaantiiri, ní ɛrɛzɛn tíriri i di lɔnɛʔɛri kaangi.

²³ Yele Siyɔn pìíbèle, yaa muguri, yáā fundaanra kpéʔele Yawe ni, wi lè yele Kolocɔlɔw, níì cán wi n zěseligi kaan yele ma ki lǎli ni, wi i ki wozeligi ní gi wozangi cáan yele ma n yɛlɛ ní booma kánmi ní.

²⁴ Kàsyɔɔyi a nyìn yaliipyáw na, yaleyi í nyìn dùvɛɛnfɔnw, ní sǐnmi na.

²⁵ «Mii a ní yɛ́ɛgèle lúrugo kaan yele ma, gele mii kapɛɛnkpumɔn-nɛʔɛmi kálagi lè, poro bee mii da tórigo yele kurugo lè, pi lè kúdow, ní kákerebèle, ní kábàrari, ní múndɔɔw.

²⁶ Yele a ra líi bàā tíngi, sáā Yawe mɛ́ɛgi kpɔ̀ʔɔrɔ́, wi lè yele Kolocɔlɔw, woro wee wi kakpoloyo kpéʔele yele ma lè, mii syɛ́ɛnbèle a ní pye fɛ̀ɛrɛ wòolo ní nyáana í.

²⁷ Yele a gi cán bi cán mii i nyɛ Isirayɛli ye níngi ni, mii Yawe wi lè yele Kolocɔlɔw, ncan wàa ní o yaà í, mii syɛ́ɛnbèle a ní pye fɛ̀ɛrɛ wòolo ní nyáana í.»