Zyowɛli 1 - Cebaara Bible 2010

¹ Yawe syɛ́ɛnri di nan Petuwɛli jáaw Zyowɛli na lè, toro di dee naa.

Yaweepiiri gàlagí ní Wáami kéele

² Ye dee naa lóʔo, yele wolɛɛbèle! Ye líiyi cáan, yele tári syɛ̀ɛnnɛ myɛw! A gee bee félege kɔ́ɔ̀ kpéʔele lè yele lǎli, wàlá yele tóobèle làla ni?

³ Ye gi joo ye tɛ̀ɛn yele pìíbèle na, yele pìíbèle si gi joo bi tɛ̀ɛn poro pìíbèle na, poro pìíbèle si gi joo bi tɛ̀ɛn yìrilee syɛ̀ɛnnɛ na be maa lè!

⁴ Gee múndɔɔw yaʔa lè, kúdow n gi lìi. Gee kúdow yaʔa lè, kákerebèle n gi lìi. Gee kákerebèle yaʔa lè, kábàrari n gi lìi.

⁵ Ye yìri ŋúnɔmi na, yele singbaadinbèle, yaa nyaan! Yele dùvɛɛngbaabèle myɛw, yaa nyaan yaa peele, níì cán ɛrɛzɛn lógi n láʔa yele ma nyɔ́ɔyi na!

⁶ Níì cán syɛɛnfelegaa n pan mii tári kanma na, ki fǎngi n kpɔ́ʔɔ, á gi nɛʔɛ n pye córomɔ fun. Ki gǎngèle i nyɛ àmɛɛ càarabɔlɔ gànʔana nyɛ lè, ki gǎnzéebèle si i nyɛ àmɛɛ càarajaa wòolo nyɛ lè.

⁷ Ki n baa mii ɛrɛzɛn ségi pye tɛɛ̀kalagiga. Ki n baa gi gbàn mii děsyaantiiri na, ki n di waragi péw, ki n di kpúmɔn n cáan. Ɛrɛzɛn ségi káganbiire n fílige.

⁸ Da nyaan maa peele àmɛɛ nàngeele sinján pìcaa gáà gɔ̀nvaʔaga le lè burogo ni nyaan wi cárimi nìyilio kùugo kéele na!

⁹ Míimi yakaanya, ní sáriga-yólogow n kwɔ́ɔ Yawe kpáagi ni. Sáriga-wòlobèle be lè Yawe falipyebèle, pe i nyɛ kùu káyaʔa na.

¹⁰ Pe n séyi kálagi, tásaligi i nyɛ kùu káyaʔa na. Níì cán pe n bilew kálagi, dùvɛɛnfɔnw n kwɔ́ɔ, a sǐnmi kólogo.

¹¹ Tèfalabèle báriga n kwɔ́ɔ, ɛrɛzɛn séyi fɔ̀ɔlɔ i nyaan ni peele bilew ní orizyew kéele na, níì cán séyi yaliilaara ní o beè í.

¹² Ɛrɛzɛn tíriri n fána, děsyaantiiri n waʔa. Girenadi tíiri, ní sɛʔɛtiiri, ní pɔ́mi tíiri, gee bee n joo séyi tíire myɛ n waʔa. Fundaanri n kwɔ́ɔ syɔɔn ye níngi ni.

Yerile súnw lele, ní nyɛ́ɛrigbɔʔɔ kéele Yawe ma

¹³ Sáriga-wòlobèle, ye gɔ̀nvaʔaya le buroyo, yé pye kùu káyaʔa na! Yele sáriga-wòlo-yafaangi falipyebèlē, yaa nyaan yaa peele! Mii Kolocɔlɔw falipyebèlē, yaa maa, ye syɔ́ɔn ní gɔ̀nvaʔayi búroyo ní yeyɛɛ na! Níì cán míimi yakanʔa, ní sáriga-yólogow n kólogo yele Kolocɔlɔw kpaʔa ni.

¹⁴ Ye súnlere lala yaʔa, ye kpóʔorojànna kéele jáari, ye wolɛɛbèle kpóʔoro, n fàra tári syɛ̀ɛnnɛ myɛ na, Yawe yele Kolocɔlɔw kpaʔa ni, yáā Yawe yiri wi yele syɔɔ!

Yawe fundanʔari canʔa kéele

¹⁵ Ee! Cángi naa félege! Níì cán Yawe cángi n nùuni, ki i maa àmɛɛ cangaa nyɛ, gee ni Séew Myɛ Kàfɔlɔ a kálagila kpéʔele lè.

¹⁶ Yaliiri n kwɔ́ɔ n yiri yaà wolo yɛ́ʔɛ ma, a mugurumi, ní fundaanri kwɔ́ɔ wolo Kolocɔlɔw kpaʔa ni.

¹⁷ Lùguri n fɔ́nʔɔ kágboogèle ni, gbòdungèle i nyɛ wowaagéle ní, yaliiri tɛɛ̀tɛʔɛyɛ kpaaya n too, níì cán bilew n kwɔ́ɔ.

¹⁸ Yaweeri i cɛ́ɛn! Yaweekpologèle gboogéle i curugu ni máari, níì cán ke ga nyàā taa í. Alí yaweeyiligèle gboogéle i káagi.

Kanyaajoow nyɛ́ɛrigɛ

¹⁹ Mɔ kurugo mii yákpoli wáa, Yawe! Níì cán náagi n fìími tára yaweenaʔa-tɛ́ɛyɛ sórigo, a naanyǐngi séyi tíire myɛ sórigo.

²⁰ Alí sìnbirigi yaweere i káagi mɔ kurugo, níì cán lókoloyi n waʔa, a náagi fìími tára yaweenaʔa-tɛ́ɛyɛ sórigo.