Zyonasi 3 - Cebaara Bible 2010

Zyonasi n sa ni nyuu Niniivi ni

¹ A Yawe syɛ́ɛnri nan Zyonasi na tɔziin, wi n jo:

² «Yìri maa syée Niniivi ma, ki lè kèkpɔɔgi, mi sa syɛ́ɛnri joo yaà, dee mii joo mɔ ma lè.»

³ A Zyonasi yìri n kári Niniivi ma n yɛlɛ ní Yawe syɛ́ɛnri ní. Niniivi si maa pye Kolocɔlɔɔ yɛ́ʔɛ ma kèkpɔʔɔ. Canya taanri tánʔana li da ni gi forogi.

⁴ A Zyonasi sáà jée kěgi ni níì canʔa nibin tánʔana kpéʔele gi ni, ní i yákpoli wáa ni gi nyuu níì jo: «Canya togoye siin níjanʔa kàdoʔo ma, Niniivi a kálagi.»

⁵ A Niniivi syɛ́ɛnbèle tága Kolocɔlɔɔ na. A be súnlere kéele jáari, níì gɔ̀nvaʔaya le búroyo n séli yaà wogbolobèle na n baa nan wobiigèle na.

⁶ A syɛ́ɛnri bee sáà nan Niniivi fànʔafɔw na. A wi yìri wi fàngoli na n wi burogbɔɔgi wòlo, níì gɔ̀nvaʔaga tɔ́n wiyɛɛ na n tɛ́ɛn cɔ́ɔngi ni.

⁷ A wi gi yaʔa a be yákpoli wáa n kéeli naa jáari Niniivi ni níì jo: «N yɛlɛ ní fànʔafɔw, ní wi syɛɛnkpolobèle kajoo-mí-cerile ní: Ki ga yɛlɛ syɛ́ɛnbèle, ní yaweeri, ti lè wogbolori, ní woyiliri í kɔ́ yarigaa faala laala wéle í. Pe a kɔ́ lìi í. Pe a kɔ́ lɔ̀ʔɔ gbaa í!

⁸ Gɔ̀nvaʔaya n yɛlɛ yi tɔ́n syɛ́ɛnbèle, ní yaweeri na, páā yákpogèle wáa ní fànʔa ní Kolocɔlɔɔ kurugo, syɔɔn o syɔɔn si láʔa wi tánʔaganbeemi, ní wi péemi kapyere na, dee wi tiimaa kɔ́yi kpéʔele lè.

⁹ Wìí wi gi cán kapye Kolocɔlɔɔ a wiyɛɛ fúngi kàriga í, kapye wi a wi fúngi kàriga bi wi fundanʔagbɔɔri yaʔa í, koro ga pye wolo a kɔ́ kùu í?»

¹⁰ A Kolocɔlɔɔ ga gi nyaa, gee pe da ni kpéʔele lè bi kàdoʔo wáa be tánʔaganbeemi ma, a Kolocɔlɔɔ wɔ́ɔ̀ kapeegi yaʔa, gee wi da tímana bi pye be na lè, wi ga gi kpéʔele í.