Zyeremii 9 - Cebaara Bible 2010

Syɛɛnfelegaa, gee jànvaaw syɔɔ n taa lè

¹ Pe ga maa kùsɛɛbèle tɛɛkòrogo félege kaan mii ma fìími tára ni, mii mǎà dée mii syɛ́ɛnbèle yaʔa, mii mǎà dée léeli be na! Níì cán pe myɛ i nyɛ kanɔnʔɔbyebèlē, syɛɛnco-mí-kaanbéle kabiga gii.

² «Pe nyíngèle n kíle n yaʔa àmɛɛ sedege nyɛ lè jànvaaw kéele na. Ki o nyɛ kányɛɛgi kéele na be fànʔa taa tári ni í. Níì cán pe i peemaa fàrá pàa na, mii si na, pe ga mii cán í,» Yawe wi jo nya.

³ «Syɔɔn o syɔɔn n yɛlɛ waa wiyɛɛ kɔ̀rɔsíi wi tàannyɛnnɛ na, wi a kɔ́ wiyɛɛ yaʔa wi senyɛnwaa faala na í. Níì cán senyɛnbèle myɛ i nyɛ námarafɔɔlɔ, tàannyɛnbèle myɛ i mɛ́ɛyi kálagi ni máari.

⁴ Pe i peyɛɛ jànváa, pe o kányɛʔɛ nyuu í, pe i be nyíngèle tɛ̀ɛ́ jànvaaw joolo na, pe i peyɛɛ vɔ̀rɔgí kakoloyi pyele na.

⁵ Mɔ tɛɛkòrogi i nyɛ námaraw nínge ni. Fáanagi báriga ni pe ga fɔ̀lɔ bi mii cán í,» Yawe wi jo nya.

⁶ Gee bee na Nyɛ̀ʔɛni Sùlasiibéle Kafɔlɔ Yawe syɛ́ɛnri naa joo níì jo: «Wéle! Mii a be gbàla si be sɛʔɛ bi wéle. Níì cán kanmìí na mii a gi pye mii syɛ́ɛnbèle kàbaan na?

⁷ Pe nyíngèle i nyɛ syɛɛnkpoo-ŋáaya, pe o yarigaa nyuu kapye námaraw ban í. Pe i bɛ̀ɛlɛ syɛ́ɛnrɛ nyuu be nyɔ́ɔyi ni pe syɛɛnnyɛnnɛ ma, kàjáa fúngi ni, pe i karinyanga nii wi na.

⁸ Amɛɛ be kapyeri bee kpéʔele lè, mii si kòro lé kàa sìnbye ni be na?» Yawe wi jo nya. «Mii a kòro lé gɔ̀lɔ́w sìnwòlo ni syɛɛnfelegi bee félege na?»

Nyɛnigi ní funbɛɛnri ŋúnuyo lala

⁹ Mii i nyaan ní i cɛ́ɛn nyanbeleyi kéele na, mii i funbɛɛnrɛ ŋúnugo ŋúu fìími tára yawee-nàʔa-tɛ́ɛyɛ kéele na. Níì cán yi n sógi, syɔɔn faala o sɔ̀lɔ́ yaà í, yaweere gboolo yákpolo ní o lúro yaà í. N séli nyɛ̀ʔɛni féjɛɛnrɛ na, n sáà nan yaweeri na, ti myɛ n yiri yaà n kári.

¹⁰ «Mii a Zyerusalɛmi pye gurubɛɛtooyo, ní gbàáyi tɛɛlaraga, mii a Zyuda kěyi kàriga tɛɛ̀kalagiya, syɛ̀ɛnnɛ fun.»

¹¹ Wìí wi nyɛ síciliw, wee wi kérigèle bee kɔ́rɔ cán lè? Wee má Yawe nyɔ́ɔgi joo lè, wi gi joo! Nyàʔá na tári pùuni n sógi n pye àmɛɛ fìimɛ tára nyɛ lè, beè lè syɔɔn faala ní o sɔ̀lɔ́ í?

¹² Yawe n jo: «Koro n taa àmɛɛ pe mii làlwaw cée lè, woro wee mii da tɛ́ʔɛ pe yɛʔɛ̀ ma lè, koro n wɔ́ɔ̀ taa àmɛɛ gi nyɛ lè pe ga mii jóomi lóʔo í, ní àmɛɛ gi nyɛ lè pe ga tánʔa n yɛlɛ ní mii jóomi ní í.

¹³ Fwɔɔ a be taʔa be fungbanyi kasɔngurɔ na, ní Baalibèle na wɔ́ɔgēle, bele be toolɛɛbèle da tɛ̀ɛn be na lè.»

¹⁴ Koro na Nyɛ̀ʔɛni Sùlasiibéle Kafɔlɔ Yawe, wi lè Isirayɛli Kolocɔlɔw, woro wi syɛ́ɛnri naa joo níì jo: «Wéle, mii a kòbi kaan syɛ́ɛnbèle naa ma pe lìíli, si tɔnmɔ lɔ́ʔɔ kaan be ma pe gbaa.

¹⁵ Mii a be cariga bi tórigo syɛɛnfeleyaa nínge ni, yee yi lè pe ga yi cán í, àmɛɛ be toolɛɛbèle pye lè, mii si ní ŋɔséew tórigo be kurugo, fwɔɔ bi taa mii í be kwɔ́ɔ péw.»

¹⁶ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Ye sɔ̀ngi! Ye nyɛnifɔ-càbala yeri be pan! Ye tun be sa cébèle caa, bele be gbàn lè paa maa!

¹⁷ Pe kɔlɔ̀ wári bi be cɛ́ɛnmi yìrige wolo kéeli na, nyatinmi sáā yirigi wolo nyapiigèle ni bàā ŋuu, lǒgi í da yirigi wolo nyapiikoriyi ni bàā ŋuu.

¹⁸ Kányɛʔɛ na sùpiiwáara i lúro Siyɔn ni. ‹Ee! Ki wéle àmɛɛ wolo too lè! Fɛ̀ɛ́ri n wolo tɔ́n, níì cán wolo n yɛlɛ bi yiri tári ni, ncan pe n wolo tɛɛkòroyi ŋɔrigɔ n cáan!› »

¹⁹ Koro na, cébèle, ki n yɛlɛ ye Yawe syɛ́ɛnri lóʔo, ye gi yaʔa ki jée yele líiweegèle ni, gee wi nyɔ́ɔgi nyuu lè! Yáā yele calipiigèle tama kùúgi nyɛniganma na. Ye myɛ nibin nibin sáā yeyɛɛ dama nyamɛɛwáari na.

²⁰ Níì cán kùúw n lúgu wolo fɛ̀nɛtiribèle na, wi n jée wolo fànʔafɔ-gbaayi ni, wi i pìíbèle cɛnɛ ni cáan kàlari-kóloyi ni, n fàra wojáribèle na, kadàlayi na.

²¹ Ki joo mí jo: «Syɛ́ɛnri naa Yawe joo níì jo: ‹Syɛ́ɛnbèle kúcere a too àmɛɛ kariga nyɛ lè séyi ni, ní àmɛɛ yaliipwɔɔlɔ nyɛ lè yaliilaaɔ kadoʔo ma, wàa o li lée í!› »

Sícilimi wodelemɛ bi nyɛ Yawe cánni

²² Yawe wi syɛ́ɛnri naa joo níì jo: «Síciliw a kɔ́ ra wiyɛɛ gbɔ́ʔɔgi wi sícilimi kéele na í, nànniriw a kɔ́ ra wiyɛɛ gbɔ́ʔɔgi wi nìrili kéele na í, lɔrɔfɔw a kɔ́ ra wiyɛɛ gbɔ́ʔɔgi wi lɔ́ri kéele na í.

²³ Kàjáa wàa ga ni caa bàā wiyɛɛ gbɔ́ʔɔgi, ki n yɛlɛ waa wiyɛɛ gbɔ́ʔɔgi àmɛɛ wi sícilimɛ taa lè n gbàn n mii cán, n gi cán ncan mii wi nyɛ Yawe, wee wi funjǎngi, ní kútiisinw, ní sínni kpéʔele tári na lè. Koro gi tɔ̀nɔ́ nyɛ mii kanidaanni,» Yawe wi jo nya.

Sàmina bele má pe peyɛɛ yiri lè kɛ́nɛfɔɔlɔ

²⁴ «Wéle, canyaa i maa,» Yawe wi jo nya, «yee ni mii a keele tɛ́ʔɛ kɛ́nɛkpeʔelebèle na, bele be lè kɛ́nɛkpeʔelebéle céri na yagana,

²⁵ gee bee n jo Ezyipiti ye, ní Zyuda ye, ní Edɔmi ye, ní Amɔn ye, ní Mowabi ye, ní bele myɛ be bàʔajɔɔw cɛnɛ lè, be nyɛ lè fìími tára ni. Níì cán syɛɛnfeleyi bee myɛ i nyɛ sìngɛnɛbéle, á Isirayɛli kpáagi wòolo si i nyɛ sìngɛnɛbéle fúnyi ni.»