Zyeremii 8 - Cebaara Bible 2010

¹ Yawe n jo: «Lǎli bee ni pe a Zyuda fànʔafɔbèle kacere, ní wi syɛɛnkpolobèle kacere, ní sáriga-wòlobèle kacere, ní kanyaajoobèle kacere, ní Zyerusalɛmi ye kaceri waari bi wòlo be nyányi ni.

² Pe a be càli cángi yɛ́ʔɛ ma, ní yégi yɛ́ʔɛ ma, ní nyɛ̀ʔɛni ŋɔ́ripiigéle myɛ yɛ́ʔɛ ma, toro dee kéele li da be dɛ́nɛ lè, toro dee má pe da ni báara lè, toro dee na pe da peyɛɛ daʔa lè, níì kòro ni di caa, toro dee yɛ́ʔɛ má pe da ni tíri ni tuun ni kpɔ̀ʔɔrɔli kpéʔele lè. Kúceri a láa, pe a tɔ́n í. Pe a pye kariga tári na.

³ Kùúw a pɔ́rɔ sìíw na bele myɛ má pe ga kòro woweebèlē ní syɛɛnfelepeegi naa wozanbèlē ni lè, tɛ́ɛyi myɛ ni, beè mii a be nɛnɛ tórigo lè.» Nyɛ̀ʔɛni Sùlasiibéle Kafɔlɔ Yawe wi jo nya.

Nàʔámee kánma bi lè pi a gbǎn cán í

⁴ «Mɔ a be pye: ‹Yawe wi syɛ́ɛnri naa joo níì jo: A syɔɔn i tuun lé si kòro sìnyìri ni? Wàlá bi kolo lúru si ni kòro sìnban ni?

⁵ Nyàʔá na si Zyerusalɛmi syɛ́ɛnbèle naa kòro niceebéle ni syée nya? Pe n kòro n tan fáanagi na, pe n cée pe ga fɔ̀lɔ bi lúru pan í.

⁶ Mii n mii líiyi cáan, ní i lúro, pe o nyuu àmɛɛ gi yɛlɛ bi pye lè í. Wàa faala o kàdoʔo wáa wi peemɛ ma í, pe o gi nyuu si jo: Nyàʔá mii pye í? Pe myɛ n taʔa n fala be kàfyaali kurugo àmɛɛ syɔnʔɔ fùurí ni jǐn kapɛɛnnɛ ni lè.

⁷ Alí n karakpáa yaʔa ǹjogi ni, wi n wi nyǐngi cán, kàtolo ní zǎlɛɛlɛ, ní cɔ̀ɔrɔbile n ge làribangèle cán. Kàjáa mii syɛ́ɛnbèle ga Yawe làlwaw cán í.›

Sícili-váanabèle

⁸ «Kanmìí na yele a gbǎn gi joo si jo: ‹Wolo n cìlige, Yawe làlwaw i nyɛ wòlo ma?› Kányɛʔɛ na, jànvaaw na sɛ́bɛkanbèle jànvaa-sɛ́bɛkaanna nyɛ fáliw na.

⁹ Fɛ̀ɛrɛ n sícilibèle taa, pe n curugo, pe n cò karinyanga na. Wéle, pe n Yawe syɛ́ɛnri faʔa. Sícilimìí si bi nyɛ be ma?

¹⁰ Koro na mii a be cébèle kaan pèle nikwɔɔlɔ ma, si be séyi kaan bele má pe a yi nɛnɛ syɔɔ be ma lè. Níì cán n séli wobiigèle na n sáà nan wogbolobèle na, pe myɛ i nyɛ tɔ̀nɔcaari kurugo. N séli kanyaajoobèle na n sáà nan be sáriga-wòlobèle na, pe myɛ i námaraw kpéʔele.

¹¹ Pe i mii cálipili kpàliga sámagi kɔ̀nʔɔrɔ ni li lè mii syɛ́ɛnbèle. Pe i gi nyuu níì jo: ‹Yɛɛ̀nyinge! Yɛɛ̀nyinge!› Bi gi taa yɛɛ̀nyinge o yaà í.

¹² Fɛ̀ɛrɛ maa yɛlɛ ti be taa yanɔnʔɔri kéele na be kpéʔele lè, kàjáa fɛ̀ɛrɛ ga téè be taa í, pe ga níì fɛ̀ɛrɛ cán í. Koro na pe a pínɛ da tuun ní bele ní be tuun lè, mii ga yìri be kurugo lǎlee ni lè, pe a kpírige too, Yawe wi jo nya.

Kolocɔlɔɔ fúnbɛɛnri, ní syɛ́ɛnbèle fúnbɛɛnrɛ

¹³ «Mii a yaliilaari kéele kwɔ́ɔ nya, Yawe wi jo nya. Ɛrɛzɛn a ní kòro ɛrɛzɛntírigi na í, děsyanʔa a ní pye děsyaantiigi na í, wári a kúlɔlɔ. Mii a be kaan sɔ̀lɔfɔɔlɔ ma.»

¹⁴ Nyàʔá na wo kòro nya wodɛ́ɛnbéle ní? Ye yeyɛɛ gbóʔoro, yáā maa wo kári wo sa jée kèniriyi ni wo kùu yaà. Níì cán Yawe wolo Kolocɔlɔw n wolo kaan kùúw ma, wi i tɔnmɔ lɔ́ʔɔ kaangi wolo ma a wo i gbo. Níì cán wolo n kapeele pye Yawe na.

¹⁵ Wolo maa wo sɔ̀ngumi taʔa yɛɛ̀nyingi taala na, kàjáa yacanga faala o yaà í. N wo sɔ̀ngumi taʔa pɔʔɔlɔ lala na, kàjáa wéle, fyáakpɔɔrɔ dii!

¹⁶ Wi syɔ́ɔnyi fúlomɔ i lúro Dan kàbangi na, yi kàfulogi i tári myɛ cɛ̀lɛ́. Yi i maa, yi i tári, ní di fúngi yárira líi, ní kěgi ní gi tɛ́ɛnfɔbèle.

¹⁷ «Níì cán wéle, mii a sɔɔnbeere wàbira tórigo yele kánmi na, yee yi lè fwɔɔgɔlɔ kéele a gbǎn gi nyɔɔ í. Yi a ra yele nɔngi,» Yawe wi jo nya.

Zyeremii fúngi wɔʔɔgɔ kéele

¹⁸ Mii maa ni caa bi mii fɔ̀rɔgbɔɔgi kpàraco. Mii zɔ̌nw i wɔʔɔ mii ni.

¹⁹ Mii calipili káyaʔa yákpolo li lee, li lè mii syɛ́ɛnbèle, lee li yìrigí táleelire ma lè, li n jo: «Yawe ní o nyɛ Siyɔn ni wii ì? Wi fànʔafɔw ní o nyɛ wi ni wii ì?» «Nyàʔá na be mii fúngi tanʔa ní be ǹdedanyi ní, yi lè gbanzan yanibɔnyi?»

²⁰ Yaliilaari n sɔ̀lɔ, wɔ̀ɔ́gi n kwɔ́ɔ, wolo si ga syɔɔ í!

²¹ Calipili li lè mii syɛ́ɛnbèle li kpàligi kéele n mii tɔ́nʔɔnɔ, mii i funbɛɛnrɛ na, fyáakpɔɔrɔ n mii cò.

²² Céyaa-sìnmɛ ní o nyɛ Galaadi ni ì? Lɔ̀ʔɔtɔrɔɔ ní o yaà ì? Nyàʔá na kàa o taari mii calipili pɔʔɔlɔ na í li lè mii syɛ́ɛnbèle?

²³ Ee! Mii nyúngi ga maa pye lɔ̀ʔɔ, mii nyapiigèle ga maa pye nyatinmɛ púloweele, mii a dée ra nyaan canʔa ní yébilige calipili kúbéle kéele na li lè mii syɛ́ɛnbèle.