Zyeremii 7 - Cebaara Bible 2010

Nyɔɔwara na kpɔʔɔrɔli

¹ Yawe n syɛ́ɛnri naa joo Zyeremii ma níì jo:

² «Yére Yawe kpɔ̀ʔɔrɔli kpaʔa kpaaweele na, mí syɛ́ɛnri naa joo yaà mí jo: ‹Ye Yawe syɛ́ɛnri lóʔo, yele Zyuda ye myɛw ye sɔ̀lɔ́ ni jǐn kpaaweegèle naa ni bi sa ra tíri da tuun Yawe yɛ́ʔɛ ma lè!

³ Nyɛ̀ʔɛni Sùlasiibéle Kafɔlɔ Yawe wi lè Isirayɛli Kolocɔlɔw, woro wi syɛ́ɛnri naa joo níì jo: Ye yele kóloyi, ní yele nàʔami fàli, mii si yele yaʔa yele í kòro tɛ́ɛgi naa ni.

⁴ Yele a kɔ́ yeyɛɛ daʔa jànvaa syɛ́ɛnrɛ na í si jo: Nɛɛ naa Yawe kpɔ̀ʔɔrɔli kpaʔa nyɛ, Yawe kpɔ̀ʔɔrɔli kpaʔa! Yawe kpɔ̀ʔɔrɔli kpaʔa!

⁵ Yele ga yele kóloyi, ní yele nàʔami fàli kányɛʔɛ na, yele ga ni síngi yeyɛɛ ma kányɛʔɛ na,

⁶ yele ga pye yele o fǎngi gbàngí nibɔnw ní círiw, ní lɔgucew na í, yele ga pye yele o tɛɛlɛ fun sìsyaanw ŋuu tɛ́ɛgi naa ni í, yele ga pye yele ga yeyɛɛ daʔa kolocɔlɔbèle pèle nikwɔɔlɔ na í, n wɔʔɔgɔ caa n kaan yeyɛɛ ma í,

⁷ lǎli bee ni mii a yele yaʔa yele í kòro tɛ́ɛgi naa ni, tári ni, dee mii kaan yele tóolɛɛbèle ma lè di pye be worò làla o làla kwɔ́ɔmɔ fun.

⁸ Kàjáa wéle, yele n yeyɛɛ daʔa jànvaa syɛ́ɛnrɛ na, dee di lè ti o yafyɛn nyɔɔgi í.

⁹ Nyàʔá! Yele i yúu ní wɔ́ɔ i syɛ́ɛnbèle kúu, ní i nyɛ kanɔnʔɔbyebèlē, ní i jànvaa kàliyi kɛ̀ɛ́, ní i nùndaanni yáriga sórogi Baali ma, níì yeyɛɛ daʔa kolocɔlɔbèle pèle nikwɔɔlɔ na, bele be lè yele ga be cán í!

¹⁰ Koro kàdoʔo ma ní i maa n ba ni yèré mii yɛ́ʔɛ ma kpáagi naa ni, gee na mii mɛ́ɛgi nyɛ lè, ní i gi nyuu níì jo: Wolo n syɔɔ. Koro nyúngi gi nyɛ jàngó yele í da yanɔnʔɔyi bee myɛ kpéʔele!

¹¹ Kpáagi naa na mii mɛ́ɛgi nyɛ lè, ki o nyɛ yele nyɛ́nɛ na kàyuu-fànʔafɔɔlɔ tɛɛlàraga ì? Anbée mii tiimaa gi nyaagi, Yawe wi jo nya.

¹² Koro na yaa syée mii tɛ́ɛgi Silo ma, beè mii da sélì mii mɛ́ɛgi yaʔa a gi kòro lè, ye sa gi wéle, gee mii kpéʔele gi na lè mii syɛ́ɛnbèle Isirayɛli ye péemi kéele na.

¹³ Tɔ́ɔliw ni doò, àmɛɛ yele kapyeri bee myɛ kpéʔele lè, Yawe wi jo nya, ní àmɛɛ mii joo ní yele ní lè sìnyére ni, yele si ga lóʔo í, ní àmɛɛ mii yele yeri lè, yele si ga syɔɔ í,

¹⁴ mii a keele tɛ́ʔɛ kpáagi na, gee na mii mɛ́ɛgi nyɛ lè, koro gee na yele yeyɛɛ daʔa lè, ní tɛ́ɛgee mii kaan yele ní yele tóolɛɛbèle ma lè, mii a gi pye bi yɛlɛ ní gee ní mii da tɛ́ʔɛ Silo na lè.

¹⁵ Mii a yele yirige niyɛɛ yɛ́ʔɛ ma bi wáa léelige àmɛɛ mii yele senyɛnbèle wáa lè, pe lè Efirayimi yòdaʔayi myɛw.›

Nyɛ́ɛrigi gi lè Kolocɔlɔɔ a gi lóʔo í

¹⁶ «Mɔ si na, mɔ a kɔ́ ra nyɛ́ɛri bàā kaangi syɛ́ɛnbèle naa ma í, mɔ a kɔ́ ra yákpolo wáa wàlá bàā nyɛ́ɛrigɛ kpéʔele be kéeli na í, mɔ a kɔ́ ra nyɛ́ɛri mii yɛ́ʔɛ ma be kéeli na í. Níì cán mii a lóʔo mɔ ma í.

¹⁷ Gee be kpéʔele Zyuda kěyi, ní Zyerusalɛmi kàlari-kóloyi ni lè mɔ o gi nyaagi ì?

¹⁸ Jaafɔbèle i kàjeri caa, tofɔbèle si i náagi nii, cébèle si i míimi pírigi bi kàgbalaya sámaga nyɛ̀ʔɛni fànʔafɔjaa ma, si sáriga-yólogow wòlo kolocɔlɔ-nibɔnbèle ma, jàngó bi mii fúngi tanʔa.

¹⁹ Mii fúngi lé be taanri? Yawe wi jo nya. Koro o nyɛ pe tiimaa kéele na ì, pe tiimaa fɛ̀ɛrɛ kéele na ì?

²⁰ Gee bee na Kàfɔw Yawe syɛ́ɛnri naa joo níì jo: ‹Wéle, mii fundanʔari, ní mii fundanʔagbɔɔri a too tɛ́ɛgi naa na, syɛ́ɛnbèle, ní yaweeri, ní sìnbirigi tíire, ní tári yasanra na. Ti a ra có bànvigi ni.›

Syɛɛnfelegi gi lè ki o lúro gi Kolocɔlɔw ma í

²¹ «Yawe wi lè Nyɛ̀ʔɛni Sùlasiibéle Kafɔlɔ, wi lè Isirayɛli Kolocɔlɔw, woro wi syɛ́ɛnri naa joo níì jo: ‹Ye yele sáriga-sórigow fàra yele sárigaw na, yáā wi káari káa.

²² Níì cán lǎli ni mii yele tóolɛɛbèle yirige Ezyipiti tári ni lè, mii ga yarigaa faala joo, wàlá n làlwa kéele joo be ma sáriga-sórigoo ní sáriga-wòloro kéele na í.

²³ Kàjáa syɛ́ɛnree mii joo n gbàn be ma lè toro di nyɛ dee naa, mii n jo: Ye mii jóomi lóʔo, koro ga pye mii í pye yele Kolocɔlɔw, yele si pye mii syɛ́ɛnbèle. Kóloyee ni mii jo yele í da táanri lè, yaa táanri yee bee myɛ ni, jàngó yele í pye dùba pìibēle.

²⁴ Kàjáa pe ga lóʔo í, pe ga líiyi cáan í, fwɔɔ a be peyɛɛ daʔa láliiw, ní be funbeeyi kasɔngurɔ na. Pe n lúru kàdoʔo ma, pe ga kári yɛʔɛ ma í.

²⁵ Nlaa cángee na yele tóolɛɛbèle yiri lè Ezyipiti tári ni n baa nan níjanʔa na, mii falipyebèle myɛ pe lè kanyaajoobèle, mii n be tun yele ma canʔa o canʔa sìnyére ni.

²⁶ Kàjáa pe ga lóʔo mii ma í, pe ga líiyi cáan í, pe n be nyùngbaabèle kpee, pe n kapeele pye n sɔ̀lɔ pe toolɛɛbèle na.›

²⁷ Mɔ a syɛ́ɛnri bee myɛ joo be ma, kàjáa pe a lóʔo mɔ ma í, mɔ a yákpoli wáa be kurugo, kàjáa pe a syɔɔ mɔ ma í.

²⁸ Koro na gi joo be ma mí be pye: ‹Syɛɛnfelegaa gi nyɛ gee naa, gee gi lè ki o Yawe gi Kolocɔlɔw jóomɔ lúro í, ki wɔ́ɔ o caa bi fɔ̀lɔ tamana na í. Kányɛɛgi ní o beè í, ki n kwɔ́ɔ n láʔa pe nyɔ́ɔyi na.›

Kpóobeeli jǐnlɔgɔ

²⁹ «Mɔ njoori di yaʔa lè, di cɛnɛ, mí di wáa. Da funbɛɛnrɛ ŋúnugo ŋúu dǎndama-wɔlɔgɔyi ǹjoyo ni! Níì cán Yawe n lǎli naa syɛ̀ɛnnɛ faʔa, níì be ŋɔrigɔ n wáa, poro bele be wi fúngi kaan a gi tanʔa lè gbanʔama.

³⁰ Níì cán Zyuda syɛ́ɛnbèle n gi kpéʔele, gee gi pee mii nyɛ́nɛ na lè, Yawe wi jo nya. Pe n be yanɔnʔɔyi tɛ́ʔɛ kpáagi ni, gee na mii mɛ́ɛgi nyɛ lè, koro ga pye bi gi nɔ́nʔɔ.

³¹ Pe n sáriga-wòlo-tɛ́ɛyɛ faan Tofɛti ni, Bɛn-Hinɔmi jǐnlɔgi ni, bàā be nànbiigèle ní be calipiigèle sórogi náagi ni, gee gi lè mii da gi joo be ma í, ki sɔ̀ngurɔ da wɔ́ɔ̀ jée mii ni í.

³² Gee bee na wéle, canyaa i maa, yee ni lè syɔɔn a ní gi joo si jo: Tofɛti ní Bɛn-Hinɔmi jǐnlɔgɔ í, fwɔɔ kpóobeeli jǐnlɔgɔ. Pe a ra kúbèle tɔ́ngi Tofɛti ni, tɛ́ɛgi fɔ̀ngɔ kéele na, Yawe wi jo nya.

³³ Syɛ́ɛnbèle naa kúcere a pye nyɛ̀ʔɛni féjɛɛnrɛ ní tári yaweere liile. Wàa faala a taa bàā di fúuro í.

³⁴ Mii a mugurumi, ní fundaanri ŋúnuyo, ní cefɔɔn fɔ́lɔ, ní cefɔnw ŋúnuyo kwɔ́ɔ Zyuda kěyi, ní Zyerusalɛmi kàlari-kóloyi ni. Níì cán tári a pye kataya.»