Zyeremii 6 - Cebaara Bible 2010

Kálagigbɔɔlɔ i nyuu Zyerusalɛmi kéeli na

¹ «Ye fàn ye yiri Zyerusalɛmi níngi ni, Bɛnzyamɛ syɛ́ɛnbèle, ye tòmaagi wìi Tekowa ni, ye dìrapo yìrige Bɛti-Hakerɛmi ni! Níì cán wɔʔɔlɔ, ní kálagigbɔɔlɔ n yìri solomɔkulo ma ni maa.

² Calipili Siyɔn wi lè wojanw, ní i nyɛ yɛɛ̀nyinge na, mii a wi kálagi.

³ Bànaʔabèle i táanri ni maa wi ma ní be bàtoyi ní. Pe n be fànikpaayi kóri wi kánmi na n wi màʔa n kpàra. Pe myɛ nibin nibin i be nyàálɛɛgéle káa.»

⁴ «Ye yeyɛɛ zámaga ye too wi na. Ye yìri! Ye waa lúru cânvulɛɛli làla ni! Wɔʔɔlɔ i wolo na, cángi i tíri n kwɔ́ɔ, cângwɔɔgi nyɔ́ɔ kànyingéle i tɔnɔgi ni syée.

⁵ Ye yìri! Ye waa lúru yébiligi ni! Wo wi kpaacanyi kálagi.»

⁶ Níì cán Yawe wi lè Nyɛ̀ʔɛni Sùlasiibéle Kafɔlɔ, wi n jo: «Ye tíiri kpúmɔn, ye tɛɛ̀lúguyo sámaga Zyerusalɛmi kánmi na! Kěgi naa n tɔ̀nɔ n yɛlɛ ní wɔʔɔlɔ ní. Gee myɛ gi nyɛ gi ni lè, koro gi nyɛ fǎngi gbànna.

⁷ Amɛɛ kɔ̀lɔ́ wi lǒgi púlo lè, kánmi bee na wi wi péemi púlo. Kàfulogaa nikwɔɔ o nyɛ wi ni kapye péemi ní gàlagíw wóʔo ban í. Yáami ní kpàliyi yi nyɛ mii yɛ́ʔɛ ma làla o làla kwɔ́ɔmɔ fun.

⁸ Zyerusalɛmi, ki n yɛlɛ mi fɔ̀lɔ tamani na, koro ga pye mii a kɔ́ láʔa mɔ na í, si mɔ kàriga fìimɛ tára, mɔ í pye syɔɔn fun í.»

Syɛɛnfelegi gi lè ki ga fɔ̀lɔ bi lóʔo í

⁹ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Pe a Isirayɛli wozanbèle caa àmɛɛ ɛrɛzɛnkɔ́rɔ nyɛ lè. Ní mi kɔ́gi taʔa wi na àmɛɛ ɛrɛzɛncɔɔɔ gi kpéʔele ɛrɛzɛn tírire na lè.»

¹⁰ Wìí ní mii a joo? Wìí mii a pye séera jàngó be lóʔo? Wéle, pe líiweegèle ga kɛ́nɛ í, pe fanʔa o nyɛ bi gbǎn lóʔo í. Wéle, Yawe syɛ́ɛnri n pye yafaʔala be ma, pe ga kanidaanna faala nyaa di ni í.

¹¹ Mii n nyìn Yawe fundanʔagbɔɔri na, mii n tɔ̀nɔ n fɔ̀rɔ gbanʔama ti cò-mí-yérigeli na. «Ti wo pìíbèle na kàlari-kóloyi ni, mí wɔ́ɔ gi kpéʔele kánmi bee na wojáribèle gboolo na. Níì cán nǎnw ní céw a cò bi kári, n fàra wolɛɛɔ, ní wee na wi tɔ̀nɔ n lɛɛ n tín lè.

¹² Pe kpáayi a kaan pèle nikwɔɔlɔ ma, n fàra séyi, ní cébèle na wɔ́ɔgēle, lǎli ni mii ga mii kɔ́gi sánʔa n taʔa tári syɛ̀ɛnnɛ na lè,» Yawe wi jo nya.

¹³ «Níì cán n séli wobiigèle na n sáà nan wogbolobèle na, pe myɛ fúnyo n kpólo taali kurugo. Nlaa kanyaajoobèle na n sáà nan sáriga-wòlobèle na, pe myɛ i námaraw kpéʔele.

¹⁴ Pe i mii syɛ́ɛnbèle kpàliya sámagi kɔ̀nʔɔrɔ ni ní i gi nyuu níì jo: ‹Yɛɛ̀nyinge! Yɛɛ̀nyinge!› Yɛɛ̀nyinge si o yaà í.

¹⁵ Fɛ̀ɛrɛ maa yɛlɛ ti be taa yanɔnʔɔri kéele na be kpéʔele lè, kàjáa fɛ̀ɛrɛ ga téè be taa í, pe ga níì fɛ̀ɛrɛ cán í. Koro na pe a pínɛ da tuun ní bele ní be tuun lè, mii ga yìri be kurugo lǎlee ni lè, pe a kpírige too,» Yawe wi jo nya.

¹⁶ Yawe wi syɛ́ɛnri naa joo níì jo: «Ye yére kóloyi na, yáā wéle. Ye yíbege kpéʔele kolɛɛyi kéele na. Gìí gi pye kojǎngi? Yaa táanri nya koro ni, yele sìíw si ŋɔ́ndaala taa. Kàjáa pe i syɛɛnlurugori kaangi níì jo: ‹Wolo a tánʔa gi ni í.›

¹⁷ Mii n kɔ̀rɔsiifɔɔlɔ yìrige yele ma, ye yákirii yaʔa tòmaagi wìimɛ na. Kàjáa pe i syɛɛnlurugori kaangi níì jo: ‹Wolo a yákirii yaʔa í.›

¹⁸ Koro na ye lóʔo syɛɛnfeleyi! Ní mɔ syɛɛnkpoʔolomɔ, gee ki a ba pye be na lè.

¹⁹ Tári, ki n yɛlɛ mi lóʔo! Mii wi wɔʔɔgi yaari ki i tuun syɛ́ɛnbèle naa na ki pye pe katimanari yasanra. Níì cán pe ga fɔ̀lɔ n mii syɛ́ɛnri lóʔo í. Gee gi mii làlwaw kéele kwɔ́ɔ lè, pe n wi yaʔa.

²⁰ Nyàʔá mii a pye ní nùndanʔa yárigi ní gi yìrigí Saba ma lè, ní táleelire nundanʔa nyàákanga ní? Yele sáriga-sórigow ga mii dɛ́nɛ í, yele sárigaw o nyɛ mii yanidaanmaga í.»

²¹ Koro na Yawe syɛ́ɛnri naa joo níì jo: «Wéle, mii a kàdɛnɛ-gbírigeye tɛ́ʔɛ syɛ́ɛnbèle naa yɛ́ʔɛ ma, yee na tofɔbèle ní jaafɔbèle, ní kètɛnɛnyɛnbèle, ní tàannyɛnbèle a pínɛ da kpírigi da tuun lè. Pe a ra kúu.»

Nigoow n yìri solomɔkulo ma ni maa

²² Yawe wi syɛ́ɛnri naa joo níì jo: «Syɛɛnfelegaa wéle, gee gi yìri solomɔkulo tári ma ni maa lè, syɛɛnfele-nɛʔɛgɛ, gee gi yìri yaà tári láʔagéle ma lè.

²³ Pe n sedeyi ní ŋáayi yìrige ǹjoʔo ma. Pe n pee n sɔ̀lɔ ní i nyɛ nyinimɛ fun. Pe yákpogèle kàfulogo i nyɛ àmɛɛ sólomi lɔ̀ʔɔ wóʔo nyɛ lè. Pe n lúgu syɔɔnyɔ na, níì peyɛɛ zámaga kapɛɛnni kánma na àmɛɛ nàɔn nibin nyɛ lè, mɔ kánmi na, calipili Siyɔn!»

²⁴ Wolo n kéeli bee lóʔo, a wolo kɔ́yi fànʔa kwɔ́ɔ, funjurugori n too wolo na, ki n pye wɔʔɔgɔ, àmɛɛ cɔlɔɔ wóʔo nyɛ, wee wi nyɛ seeli na lè.

²⁵ Yele a kɔ́ yiri sìnbirigi ni í, yele a kɔ́ ra syée kóloyi na í. Níì cán nigoow i yaà ní wi ŋɔséew ní, fyáakpɔɔrɔ i nyɛ kàbanyi myɛ na!

²⁶ Mii syɛ́ɛnbèle calipile, gɔ̀nvaʔaga le burogo, máā kòlogí cɔ́ɔngi ni, pye kùu káyaʔa na móō pìinibinge kuugo gii, máā nyaan maa peele gbanʔama! Níì cán kálagifɔw i maa ba pàla bi too wolo na.

Tunmɔrɔ, dee di lè ti fɔ́ɔnri a gbǎn yiri í

²⁷ «Mii n mɔ télege mɔ í pye wàa, wee wi a mii syɛ́ɛnbèle sɛʔɛ wéle lè, ní kènirige, koro ga pye mɔ í be cán si be tánʔaganmi sɛʔɛ cán.

²⁸ Pe myɛ i nyɛ niceebéle n sɔ̀lɔ ki dǎnw na, ní mɛ́ɛkalagibéle, pe i nyɛ àmɛɛ kanyɛɛnrɛ ní tunmɔrɔ nyɛ lè, pe myɛ n kálagi.

²⁹ Fuguruyi i sórogi. Tunmɔnyinni i kwóo náagi ni. Tunmɔgbalaw i di gbàlá gbanzan, di fɔ́ɔnri o láari í.

³⁰ Pe i be yiri wálifii-nibɛɛnmɛɔ, níì cán Yawe n be faʔa.»