Zyeremii 52 - Cebaara Bible 2010

Nebukadinezari n Sedesyasi cò

¹ Yɛ̀ʔɛlɛ toko ní nibin Sedesyasi da taa lǎli ni wi baa pye lè fànʔafɔlɔ. Yɛ̀ʔɛlɛ kɛɛ ní nibin wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Hamutali wi pye lè Libina ye Zyeremii jáaw.

² A wi i gi kpéʔele gee gi pee Yawe nyɛ́nɛ na lè. Gee Yehoyakimi da ni kpéʔele lè koro wonijangi wi da ni kpéʔele.

³ Kérigèle bee n kpéʔele Zyerusalɛmi, ní Zyuda ye na Yawe fundanʔari kéele na fwɔɔ n taa a wi kɔ́ baa be nɛnɛ n núngo wiyɛɛ yɛ́ʔɛ ma. Sedesyasi si maa baa Babilɔni fànʔafɔw cée.

⁴ Sedesyasi fǎngi yɛ̀ʔɛlɛ kpanjɛrɛ wólo na, yɛ́ɛli yeye kɛɛ wóʔo ki canya kɛɛ wógi na, a Babilɔni fànʔafɔw Nebukadinezari ní wi kapɛɛnkpumɔnbèle myɛ pan Zyerusalɛmi kánmi na ní baa tɛ́ɛn gi taana níì tɛɛ̀lúgugéle sámaga gi kánmi na.

⁵ A be tɛ́ɛn kěgi taana n baa nan fànʔafɔw Sedesyasi fǎngi yɛ̀ʔɛlɛ kɛɛ ní nibin wóli na.

⁶ Yeye sicɛrɛ wógi canya kpanjɛrɛ wóʔo na, koro n gi taa kateegi maa tɔ̀nɔ n gbàn kěgi ni, yaliire faala si da níì pye yaà tári syɛ̀ɛnnɛ ma í,

⁷ a be weʔe fùru kěgi tò na. A fànʔafɔw yiri ni fé yébiligi ni woro ní syɛ́ɛnbèle myɛ be pye lè kapɛɛnkpumɔnbèle n kpàánweeli kólogo láa ni syée gúnyi siin lariga ni fànʔafɔw nángwɔɔ taana. Koro n gi taa Kalide ye maa kěgi le nínge. A be Araba kólogi láa ni syée.

⁸ Kàjáa Kalide ye kapɛɛnkpumɔnbèle maa fànʔafɔw Sedesyasi kɔ́ri n láa, ní sáà wi nɛnɛ n taa Zyeriko tɛɛfiigi na. A wi kapɛɛnkpumɔnbèle myɛ fàn n cariga n léeli wi na.

⁹ A be fànʔafɔw Sedesyasi cò n kári Babilɔni fànʔafɔw ma Iribila ma, Hamati tári ni, a wi sáà kútiiw kúun yaà beè wi na.

¹⁰ A Babilɔni fànʔafɔw be pye a be Sedesyasi jáabèle kɔnɔgi wi nyɛnɛ na, ní wɔ́ɔ̀ be pye a be Zyuda syɛɛnkpolobèle kɔnɔgi Iribila ni.

¹¹ Koro kàdoʔo ma a wi be pye a be Sedesyasi nyapiigèle jabagi níì kanyɛɛnrɛ nyɔ̀ʔɔmɔ le wi na n kári Babilɔni ma, ní sáà wi le kàsow ni yaà beè n taa n baa nan wi cânguugi na.

Nebuzaradan n kwɔ́ɔ Zyerusalɛmi kálagili na

¹² Yɛ́ɛli yeye kagunɔ wóʔo, ki canya kɛɛ wógi na, koro n pye Babilɔni fànʔafɔw Nebukadinezari fǎngi yɛ̀ʔɛlɛ kɛɛ ní kpanjɛrɛ wólo, Nebuzaradan wi pye lè gáridibèle kùndigi, ní i nyɛ Babilɔni fànʔafɔw fáli ni, a woro pan Zyerusalɛmi ma.

¹³ A wi baa Yawe kpáagi ní fànʔafɔw kpaʔa, ní Zyerusalɛmi kpáayi myɛ sórigo. Wi maa naà le kùndigibèle kpaaya myɛ na.

¹⁴ Kalide ye kapɛɛnkpumɔnbèle myɛ pe da pye ní gáridibèle kùndigi ní lè, a poro tǒw myɛ cáan, wee wi da Zyerusalɛmi màʔa lè.

¹⁵ Syɛ́ɛnbèle fɔ̀ngɔfɔɔlɔ, ní syɛɛnsanbèle pe da kòro kěgi ni lè n fàra bele na pe da yiri n peyɛɛ gaan Babilɔni fànʔafɔw ma lè, ní fáliw kacanzanbèlē, Nebuzaradan wi lè gáridibèle kùndigi, a woro bele bee cò n kári.

¹⁶ Kàjáa Nebuzaradan wi lè gáridibèle kùndigi, wi maa tári fɔ̀ngɔfɔbèle pèle yaʔa be kòro yaà bàā ɛrɛzɛn séyi kɔ̀rɔsíi si wɔ́ɔ ra fála.

¹⁷ Kanyɛɛnri gàángéle ge pye Yawe kpáagi ni lè, n fàra yataʔayi na yi pye yaà lè, ní kanyɛɛnri pɛ́ʔɛ, a Kalide ye toro kabagi kabagi n kári ní kanyɛɛnri myɛ ní Babilɔni ma.

¹⁸ A be nɛ̀ʔɛdaʔayi, ní cɔ́ɔngi yakoliyo ní ŋɔ́gèle, ní nyari-nyarili pɛ́ɛgéle ní yagbaagèle láa n fàra kanyɛɛnri yárira myɛ na dee ní pe da ni fáliw kpéʔele lè.

¹⁹ A gáridibèle kùndigi níì tásaayi, ní nùndaanni yasorigoro yalegéle, ní nyari-nyarili pɛ́ɛgéle, ní cɔ́ɔngi yaleye, ní fètindaʔagèle, ní yagbaagèle, ní kpàtɛɛbèle láa, gee bee n jo dee myɛ di pye lè tɛ́ɛw, ní wálifiiw wóro.

²⁰ Kanyɛɛnri gàángéle siin fànʔafɔw Salomɔn da sámaga lè, n fàra pɛɛkpɔɔgi, ní kanyɛɛnri nìye kɛɛ ní siin na yi pye lè gi yataʔagi, Yawe kpáagi kéele na, yáriri bee kanyɛɛnrɛ cúlobéle nyɔ́ɔ ga cán í.

²¹ Gàángèle bee si na, ke tɔnɔganmi maa pye: Làa nibin mɛ́tiribéle kpanjɛrɛ, mɛ́tiribéle kɔrɔni mɛ́ɛnnɛ si i li máari ni kpàrá, weeye maa pye ge na, ke nyɔɔwari kpɔ́ʔɔganma si i nyɛ santimɛtiribéle kɔrɔtaanri.

²² A be kanyɛɛnrɛ faan n pye ke ǹjoyi yataʔaya, yataʔayi bee kàa nibin tɔnɔganma maa pye mɛ́tiribéle siin ní tíla, cɔ̀ɔwaa félege, ní girenadi niwirige si i nyɛ gi na n gi màʔa. Dee bee myɛ maa sámaga ní kanyɛɛnrɛ ní. Dee bee félege ti wɔ́ɔ̀ pye gàánni siin wólo na ní li girenadiw ní.

²³ Girenadi niwiriye togoye sicɛrɛ ní kpɔrigɔ ní kɔrɔni kɔrɔni maa pye cɔ̀ɔ́bèle lɛ̀ʔɛgēle ni, a ti myɛ binɛw pye dabata-daa n be màʔa.

²⁴ A gáridibèle kùndigi Seraya taa n cò, wi pye lè sáriga-wòlobèle kàfɔlɔ, ní wi taʔara wów wi lè Sofonii, n fàra kpaaweeli kɔ̀rɔsiifɔɔlɔ taanri na.

²⁵ A wi wɔ́ɔ̀ wàa nibin taa n cò yaà kěgi ni, wee be wòlo lè, wi maa pye kapɛɛnkpumɔnbèle nyúngo na, n fàra fànʔafɔw kpaʔa wóbèle pèle kɔrɔsiin na, poro bele be taa n cò yaà kěgi ni lè, n níì fàra kapɛɛnkpumɔbèle kàfɔlɔ sɛ́bɛkaɔn na, woro wee má pe da sùlasiibèle mɛ́ɛsɛbɛrɛ fáli kaan lè. Zyuda nǎnbèle pèle togoye taanri maa pye yaà kěgi fúngo ni, a wi poro cò.

²⁶ A gáridibèle kùndigi Nebuzaradan be cò n kári Iribila ma, Babilɔni fànʔafɔw ma.

²⁷ A Babilɔni fànʔafɔw sáà be kpúmɔn n kpóo yaà Iribila ma, Hamati tári ni. Kánmi bee na be Zyuda ye cò n yirige be tári ni n kári léelige.

²⁸ Syɛ́ɛnbèle bele Babilɔni fànʔafɔw Nebukadinezari da cò n kári lè, poro nyɔ́ɔgi gi nyɛ gee naa: Yɛ́ɛgèle kɔrɔsiin wólo na, Zyuda ye selebinnɛ ní saala kagunɔ ní toko ní taanri wi cò n kári,

²⁹ Nebukadinezari fǎngi yɛ̀ʔɛlɛ kɛɛ ní kɔrɔtaanri wólo na, a wi syɛ̀ɛnnɛ saala sicɛrɛ ní toko ní kpɔrigɔ ní siin cò Zyerusalɛmi ni n kári,

³⁰ Nebukadinezari fǎngi yɛ̀ʔɛlɛ toko ní taanri wólo na, Nebuzaradan wi pye lè gáridibèle kùndigi a woro Zyefubéle saala taanri ní togoye kɔrɔsiin ní kagunɔ cò n kári, a pe myɛ binɛw pye syɛ̀ɛnnɛ selebingéle siin ní saala taanri.

Babilɔni fànʔafɔw n Yehoyakɛn yirige kàsow ni

³¹ Zyuda fànʔafɔw Yehoyakɛn cò-mí-kárili yɛ̀ʔɛlɛ toko ní kpɔrigɔ ní kɔrɔsiin wóli yeye kɛɛ ní siin wóʔo canya toko ní kagunɔ wógi na, a koro pye Babilɔni fànʔafɔw Eviili-Merodaki fǎngi yɛɛzelile, a wi Zyuda fànʔafɔw Yehoyakɛn lúrugo n télege wi kpɔ́ʔɔri ni níì wi yirige kàsow ni.

³² A wi i nyuu ní wi ní ní funjànga ní. Fànʔafɔbèle bele pe da pye yaà ní wi ní Babilɔni ni lè, a wi wi kpɔ́ʔɔ n sɔ̀lɔ poro na.

³³ A wi Yehoyakɛn kàsoburoyi wòlo wi na níì wi yaʔa a wi i líi ní woro ní wi sìíw làla myɛ ni.

³⁴ A Babilɔni fànʔafɔw i wi màkonyɔɔ-yáriri kaangi wi ma canʔa o canʔa, fwɔɔ n baa nan wi cânguugi na, wi sìíw làla myɛ ni.