Zyeremii 50 - Cebaara Bible 2010

Babilɔni tooli ní Isirayɛli ye wɔ́rɔri kéele

¹ Syɛ́ɛnree Yawe joo lè Babilɔni kéeli na, Kalide ye tári kéele na, kanyaajoow Zyeremii ma a wi joo lè, toro di dee naa:

² «Ye gi jáari syɛɛnfeleyi nínge ni, ye gi yaʔa pe gi lóʔo, ye dirapo yìrige! Ye gi yaʔa pe gi lóʔo, ye a kɔ́ gi làriga í! Ye jo: ‹Pe n fànʔa taa Babilɔni na! Fɛ̀ɛrɛ n Bɛli taa. Fyáakpɔɔrɔ n Merodaki cò. Fɛ̀ɛrɛ n wi ǹdedanyi taa, fyáakpɔɔrɔ n wi yasunyi cò.›

³ Níì cán syɛɛnfelegaa n yìri solomɔkulo ma ni lúru ni syée wi kánmi na. Ki a wi tári kàriga tɛɛ̀kalagiga, syɛ̀ɛnnɛ a ní pye di ni í. Nǎnbèle ní yaweeri n fàn, ti n kwɔ́ɔ gi ni.

⁴ Cányi bee, ní lǎli bee ni,» Yawe wi jo nya, «Isirayɛli pìíbèle ní Zyuda pìíbèle a lúru pínɛ pan. Pe a ra táanri sáā nyaan, pe a ra Yawe be Kolocɔlɔw caa.

⁵ Pe a Siyɔn kéeli yíbe, pe a wàli bi fala kàbangi bee na, si jo: Yaa maa wo ba pwɔɔ Yawe na ní bàngwɔɔ joogaanna ní, lee li lè li a fɛ̀ʔɛ syɔɔn ni nyáana í.

⁶ Mii syɛ́ɛnbèle maa pye bàpuunibēle batogo. Pe nàʔafɔbèle maa ni be pùuní, ni be curugu ni máari nyanbeleyi na, a be i nyanbeleyi ní dǎndamayi sɔ̀lɔ́ ni máari níì fɛ̀ʔɛ be tɛɛkòrogi na.

⁷ Bele myɛ pe da ni be nyaagi lè, pe maa ni be káa, pe kàsiitun-nyɛnbèle si i gi nyuu níì jo: ‹Wolo ga kolo í. Ncan pe n kapeele pye Yawe na, wi lè sínni tɛɛkòrogo, Yawe na wi lè pe toolɛɛbèle sɔ̀ngumɔ tɛɛtaʔaga.›

⁸ Ye fàn ye yiri Babilɔni ni, ye yiri Kalide ye tári ni, yé pye àmɛɛ sikepɔɔlɔ nyɛ lè yaweeyiligēle yɛ́ʔɛ na!

⁹ Wéle, mii a syɛɛnfeleye yìrige, yee yi kpólo lè, yi a kpóʔoro bi yìri yaà solomɔkulo ma bi lúgu pan Babilɔni kánmi na. Yi a kapɛɛnnɛ sámaga wi kánmi na, yi a wi syɔɔ taa. Yi ŋaaŋɔɔnyi i nyɛ àmɛɛ kapɛɛnkpumɔn-sícilio wóyo nyɛ lè, wee wi lè wi o lúrugu ni maa ní kɔwaaya ní í.

¹⁰ Kalide tári a kaan kolili ma. Bele myɛ pe ga ni di yáriri koo lè, pe a tín,» Yawe wi jo nya.

¹¹ «Ɔnhɔ́ɔ̀n, yaa fundaanra kpéʔele, yaa muguri, yele bele ye mii kɔ́rigi koli lè! Ɔnhɔ́ɔ̀n, yaa yegi àmɛɛ náapyaʔa yegi lè nyàápungo ni. Yaa fúlo àmɛɛ fànnɛʔɛgɛ syɔ́ɔnyɔ nyɛ lè!

¹² Fɛ̀ɛkpɔɔrɔ n yele nɔ́ɔw taa. Wee wi yele see lè wi nyúngi n jùngu, wi wéle wee syɛɛnfeleyi myɛ kàdotɔɔn, fìimɛ tára dii, waama tára, ní tɛɛwaʔa gii.»

¹³ Yawe fúngi yìrile báriga ni, syɛ̀ɛnnɛ a ní tɛ́ɛn di ni í, ti myɛ bìnɛw a pye tɛɛ̀kalagiga. Syɔ́ɔnwee faala wi ga ni sɔ̀lɔ́ Babilɔni taana lè, ki a pye wi ma funwɔɔrɔ, wáā féfeeli wíi wi kálagili kèlē myɛ kéele na.

¹⁴ «Ye yeyɛɛ zámaga kapɛɛnni kánma na, ye Babilɔni màʔa, yele bele myɛ ye nyɛ lè sedeyi fɔ̀ɔlɔ! Yaa wi ŋɔɔgi, ye a kɔ́ ŋáayi kɔn yaʔa í! Níì cán wi n kapeele pye Yawe na.

¹⁵ Yaa kapɛɛnnɛ yákpolo wáa wi kánmi na kàbanyi myɛ na! Wi i kɔ́yi sáanri. Wi kàpɔɔnbèle n too. Wi tǒbèle n kálagi. Níì cán kapeegèle gɔ̀lɔ́-wòloro canʔa gi nan Yawe ma. Ye gɔ̀lɔ́w wòlo wi na! Gee wi pye lè, ye koro félege pye wi na!

¹⁶ Wee wi lùguri lúru lè, ye wi ceri ye yirige yaà Babilɔni ni, ní wee wi báara ní kɔnigɔ ní lè yaliiri làrilaala ni! Syɔɔn o syɔɔn n yɛlɛ bi lúru da fé kpóoli ŋɔsée yɛ́ʔɛ na bàā syée wi syɛ́ɛnbèle ma, syɔɔn o syɔɔn n yɛlɛ bàā fé da syée wi tára ma.

¹⁷ Isirayɛli i nyɛ bàpuunio, wee càarabèle nɛnɛ lè. Asirii fànʔafɔw wi wí káa wozeliw. Wee si wi pye lè wozanw n wi kaceleyi kabagi, woro wi nyɛ Babilɔni fànʔafɔw Nebukadinezari.»

¹⁸ Gee bee na Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: «Wéle, mii a keele tɛ́ʔɛ Babilɔni fànʔafɔw ní wi tári na, àmɛɛ mii keele tɛ́ʔɛ Asirii fànʔafɔw na lè.

¹⁹ Mii a Isirayɛli lúrugo pan wi tɛɛnaʔagi ma, wi a ba ra líi Karimɛli nyanbeleyi na, ní Basyan ni, wi a ra tíngi Efirayimi nyanbeleyi, ní Galaadi ni.

²⁰ Cányi bee, ní lǎli bee ni,» Yawe wi jo nya, «pe a ra Isirayɛli kolomi tɛ́ɛlɛ caa, li si a ní nyaa í, ní Zyuda kapeeli, li si a ní nyaa í. Níì cán wozanbèle mii ga yaʔa lè, mii a be kùsulugi syɔɔ.

²¹ Lúgu mi kári Meratayimi tári kánma na, lúgu mi kári Pekɔdi syɛ́ɛnbèle kánma na! Pe kálagi péw, mɔ a kɔ́ wàa yaʔa í,» Yawe wi jo nya. «Gee mii joo n gbàn mɔ ma lè, ki myɛ kpéʔele!

²² Kapɛɛnnɛ yákpogéle i nyɛ tári ni! Kálagigbɔɔlɔ lii!

²³ Hàán! Ti n tɔ́nʔɔnɔ n cɛnɛ cɛnɛ, tári myɛ màrito! Hàán! Babilɔni n baa pye tɛɛ̀kalagiga tári syɛɛnfeleye nínge ni!

²⁴ Mii n karinyanga le mɔ na, a mɔ cò, Babilɔni, mɔ si ga gi cán í. Lǎli ni pe mɔ nyaa lè, a pe fala n mɔ cò. Níì cán mɔ n sígi Yawe na.»

²⁵ Yawe n wi kapɛɛnkpumɔn-yáriri tɛɛkɔngɔ múgu níì wi fundanʔagbɔɔri kapɛɛnkpumɔn-yárira yirige yaà. Níì cán fali n pye yaà Kàfɔw Yawe ma Kalide ye tári ni, wi lè Nyɛ̀ʔɛni Sùlasiibéle Kafɔlɔ.

²⁶ Ye yìri yaà kàbanyi myɛ na yaa maa wi kánmi na, ye wi gbòdungèle múgu, ye yáriri wòlo yaà ye kpoʔolo àmɛɛ yaliipwɔɔgéle gbooyo nyɛ lè, yé di kálagi péw, yafyɛn a kɔ́ kòro yaà wi ni í.

²⁷ Ye wi náapegèle myɛ kpóo, ke n yɛlɛ bi tìgi kaàkpoo-tɛ́ɛgi ma. Wɔʔɔli a pye ge na! Níì cán ke cángi n nan, ki lè ge cângbumɔngi.

²⁸ Ye fànvɔbèle yákpogéle lóʔo, poro bele be fàn n syɔɔ n yiri Babilɔni tári ni lè n ba ni Yawe wolo Kolocɔlɔw gɔ̀lɔ́-wòloro kéele jáari Siyɔn ni, ti lè wi kpɔ̀ʔɔrɔli kpaʔa gɔ̀lɔ́-wòloro.

²⁹ Ye sedeyi fɔ̀ɔlɔ yeri Babilɔni kánmi na, poro bele myɛ be sedeyi ŋɔɔn lè! Ye tɛ́ɛn ye wi màʔa, wàa faala ga yɛlɛ bi syɔɔ í, ye wi sàra bi yɛlɛ ní wi kapyegèle ní, gee myɛ wi kpéʔele lè ye koro kpéʔele wi na! Níì cán wi n wiyɛɛ gbéʔele nɛ̀ɛgbɔʔɔgɔfɔlɔ Yawe kánmi na, Isirayɛli Wojanw kánma na.

³⁰ «Koro na wi nìgɔcaribèle a ra tuun wi kàlari-kóloyi ni, wi kapɛɛnkpumɔn-nǎnbèle myɛ a kùu cángi bee,» Yawe wi jo nya.

³¹ «Wéle, mɔ ní mii cáan, nɛ̀ɛgbɔʔɔgɔfɔlɔ,» Kàfɔw wi jo nya, wi lè Nyɛ̀ʔɛni Sùlasiibéle Kafɔlɔ. «Níì cán mɔ cángi n nan, gee ni mii a mɔ wɔʔɔ lè.

³² Nɛ̀ɛgbɔʔɔgɔfɔw a kpírige too, syɔɔn faala si a wi yìrige í. Mii a náagi le wi kěyi na, tɛ́ɛyi myɛ yi wi màʔa lè, ki a yi sórigo.»

³³ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Isirayɛli ye, ní Zyuda ye n fɔ̀rɔgɔ taa. Bele myɛ pe be cò n kári lè pulobèlē, pe n be cò n yaʔa yaà, níì cée pe ga fɔ̀lɔ bi be yaʔa í.

³⁴ Kàjáa pe nyùnzyɔɔw i nyɛ fànnɛʔɛgɛfɔlɔ, woro wee mɛ́ʔɛ gi nyɛ lè Yawe, wi lè Nyɛ̀ʔɛni Sùlasiibéle Kafɔlɔ. Wi a be kéeli láa, jàngó bi ŋɔ́ndaala kaan tári ma, si Babilɔni ye yaʔa be cúngo.

Yawe katimanani Babilɔni kánmi na

³⁵ «Ŋɔséew, Kalide ye kánmi na!» Yawe wi jo nya, «ní Babilɔni syɛ́ɛnbèle kánma na, ní wi syɛɛnkpolobèle, ní wi sícilibèle kánma na!

³⁶ Ŋɔséew, bele kánma na be nyɔ́ɔyi kpúmɔn lè! Pe kàri nicurobéle! Ŋɔséew, wi nànniribèle kánma na! Zɔ̀nviikɔnirɔ í be taa!

³⁷ Ŋɔséew, wi syɔ́ɔnyi ní wi kapɛɛnkpumɔn-wòtorobèle kánma na! Ní kapɛɛnkpumɔn-nibɔnbèle myɛ kánma na pe nyɛ wi níngi ni lè! Pe kàri càbala! Ŋɔséew, wi lɔ́ri tɛɛkɔnyɔ kánma na! Pe yi fuguri!

³⁸ Waama, wi lǒyi kánma na! Yi waʔa! Níì cán yasunyo tára dii. Pe fyáakpɔɔrɔ yáriyi n cúromɔ wáa be na.

³⁹ Koro na fìími tára woolo a pínɛ pye yaà ní sìnbirigi yaweere ní. Sòʔolobèle a ba be tɛɛkòrogi sámaga yaà, syɛ̀ɛnnɛ a ní tée tɛ́ɛn yaà í. Yìrile o yìrile wòolo, wàa a ní tée tɛ́ɛn yaà í.

⁴⁰ Ki a pye àmɛɛ Sodɔmi, ní Gomɔri, ní yi taana kěyi pye lè, yoro yee Kolocɔlɔɔ da kálagi lè,» Yawe wi jo nya, «syɔɔn a ní tée kòro yaà í. Yala o yala li lè syɔɔn, li a ní tɛ́ɛn yaà í.

⁴¹ Syɛɛnfelegaa wéle, gee gi yìri solomɔkulo ma ni maa lè, syɛɛnfele-nɛʔɛgɛ, ní séekpɔɔɔ fanʔafɔɔlɔ, bele be yìri yaà tári láʔagéle ma lè.

⁴² Pe i sedeyi, ní tàbaabèle yìrigí ǹjoʔo ma. Pe n pee n sɔ̀lɔ, ní i nyɛ nyínimɛ fun. Pe yákpogèle kàfulogo i nyɛ àmɛɛ sólomi lɔ̀ʔɔ wóʔo nyɛ lè. Pe n lúgu syɔɔnyɔ na, níì peyɛɛ zámaga àmɛɛ nàɔn nibin nyɛ lè bi kapɛɛnni kpúmɔn mɔ kánmi na, calipili Babilɔni!

⁴³ Babilɔni fànʔafɔw n syɛ́ɛnri lóʔo, a wi kɔ́yi fànʔa kwɔ́ɔ. Funjurugori n too wi na, ki n pye wɔʔɔgɔ, àmɛɛ cɔlɔɔ wóʔo nyɛ, wee wi nyɛ pyà seele na lè.

⁴⁴ Wéle, àmɛɛ càaraɔ nyɛ, wee wi yirigi Zyuridɛnw tɛɛ̀tɔ́nyɔ ni lè ni syée tɛɛkòrogi ma, gee gi lè ki a gbǎn kálagi í. Mii a be yaʔa be fàn bi núngo yaà làla nibin ni, si wi télege yaà, wee mii nyɛ́nɛ n wòlo lè. Níì cán wìí wi nyɛ mii félege? Wìí wi a gbǎn keele cɔɔnriganma tɛ̀ɛn mii na? Bànaʔawìí wi nyɛ bi gbǎn soro yére mii yɛ́ʔɛ ma?»

⁴⁵ Koro na ye gi lóʔo, gee Yawe tímana n kwɔ́ɔ Babilɔni kánmi na lè, ní kérigèle wi kɔ̀rirɔ n tímana Kalide ye tári kánma na lè! Pe a tɔ̀nɔ́ be kɔ́ri kári àmɛɛ yaweeyiligēle piibéle nyɛ lè, pe a tɔ̀nɔ́ be kpáayi pye tɛɛ̀kalagiya.

⁴⁶ Tári n cúngo Babilɔni jáali kàfulogo báriga ni, a yákpowáara lóʔo syɛɛnfeleyi nínge ni.