Zyeremii 5 - Cebaara Bible 2010

Kěgee gi nyìn námaraw na lè

¹ «Ye fàn ye màʔa Zyerusalɛmi kàlari-kóloyi ni ye gi wéle, ye yíbege kpéʔele, ye caa ye wéle kadàlayi na, kapye nàɔn nibin i yaà yi ni, kapye wàa nibin i yaà, wee wi kasinnɛ kpéʔele lè, wee wi kányɛɛgi caa lè, mii a Zyerusalɛmi kùsulugi syɔɔ.

² Alí pe ga ni gi nyuu níì jo: ‹Yawe woweew mɛ́ʔɛ na!› Jànvaa kàliga be kɛ̀ɛ́.»

³ Kányɛɛgi ban mɔ nyapiigèle caa bi nyaa ì, Yawe? Mɔ n be kpúmɔn, ki ga yafyɛn pye be na í. Mɔ n naà taʔa be na, pe ga fɔ̀lɔ tamani na í. Pe n be yɛ́ɛyi waʔa n sɔ̀lɔ fálaya na, pe ga fɔ̀lɔ n kàri í.

⁴ Mii maa ni gi nyuu níì jo: «Wobiigèle kèle gɛɛ, ke i cúromɔ naʔama náari, níì cán pe ga Yawe kólogi cán í, ki lè pe Kolocɔlɔw làlwa kèlē.

⁵ Koro na mii a kári wogbolobèle ma bi sa joo ní be ní. Níì cán bele bee na, poro n Yawe kólogi cán, ki lè pe Kolocɔlɔw làlwa kèlē.» Kàjáa bele bee maa wɔ́ɔ̀ pínɛ n zúuw kabi, níì yapwɔɔri cɛnɛ.

⁶ Koro na kɔligi càaraɔ tuun be na, tɛɛfiiyi gbàʔā i be sulugu sulugu. Sèdew i làrá be kěyi taana ni be sigi, bele myɛ pe ga ni yirigi yi ni lè, pe a sulugu sulugu. Níì cán be céemi kèlē n nɛʔɛ. Kàa n fàra pe námara kérigèle na.

⁷ «Mɛ̀ɛ́ mii a mɔ kusulugi syɔɔ bi sɛ́ɛ? Mɔ piibèle n mii yaʔa, ní i kɛ̀ɛ́ yariyaa na, yee yi lè yi o nyɛ Kolocɔlɔɔ í. Mii maa be tín yáriri na, pe si i kanɔnʔɔri kpéʔele. Pe i kpóʔoro saʔa nànjaacew kpaʔa ni.

⁸ Syɔɔn-còoloyo yii, yee yi lìi n kpólo lè. Pe myɛ nibin nibin i yákpogèle wáa be syɛɛnnyɛnbèle càbala kurugo.

⁹ Mii si kòro lé kàa sìnbye ni kapyeri bee kánma na?» Yawe wi jo nya. «Mii a kòro lé mii a gɔ̀lɔ́w wòlo syɛɛnfelegi bee félege na í?

¹⁰ Ye lúgu gi tɛɛsùluyi na, ye kálagila kpéʔele, kàjáa yele a kɔ́ di kálagi bi kwɔ́ɔ í! Ye gi káganyi láʔala, níì cán yi o nyɛ Yawe wóyo í.

¹¹ Kányɛʔɛ na Isirayɛli kpáagi ní Zyuda kpáagi wòolo n tɔ̀nɔ n mii jànváa,» Yawe wi jo nya.

Kérigèle ge nyɛ yaʔali kurugo lè

¹² Pe i jànvaa nyuu Yawe kéeli na, ní i gi nyuu níì jo: «Wi o beè í, wɔʔɔgɔ faala a tée nan wolo na í, wolo a tée ŋɔsée wàlá kateʔe nyaa í.

¹³ Kanyaajoobèle i nyɛ káfalaga yagana, wàa faala o nyuu be fúnyi ni í, gee be nyuu lè koro gi yɛlɛ bi be taa!»

¹⁴ Gee bee na Yawe syɛ́ɛnri naa joo, wi lè Kolocɔlɔɔ, wee wi nyɛ lè Nyɛ̀ʔɛni Sùlasiibéle Kafɔlɔ, wi n jo: «Amɛɛ yele syɛ́ɛnri naa félege joo lè, mii wi wee, mii a mii syɛ́ɛnri pye mɔ nyɔ́ɔgi ni àmɛɛ naà nyɛ lè, syɛɛnfelegi naa a pye kàjeri, dee náagi bee a sórigo lè mɛnɛ mɛnɛ.

¹⁵ Mii wi wee, mii a syɛɛnfelegaa yìrige tɛɛ̀leelige ni, gi pan yele kánmi na, Isirayɛli kpáagi wòolo,» Yawe wi jo nya. «Fànnɛʔɛgɛ syɛɛnfelege gii, syɛɛnfelegaa gii, gee gi tée i yaà lè booma ni, syɛɛnfelegaa gii, gee gi lè mɔ ga gi syɛ́ɛnri cán í, gee syɛɛnjóoro di lè mɔ a di kɔ́rɔw cán í.

¹⁶ Ki segbogi i nyɛ àmɛɛ nyanmúgu-yaʔaga nyɛ lè. Pe myɛ i nyɛ nànniribēle.

¹⁷ Ki a mɔ yaliilaari ní mɔ búruw lìi, ki a mɔ nanbiigèle ní mɔ calipiigèle lìi, ki a mɔ yaweeyiligèle ní mɔ yaweekpologèle lìi, ki a mɔ ɛrɛzɛn tíriri ní mɔ děsyaantiiri lìi, ki a mɔ keniriyi kálagi ní ŋɔséew ní, yee na mɔ mɔ sɔngumi taʔa lè.

¹⁸ Kàjáa, àlí cányi bee ni, mii a yele kálagi kwɔ́ɔ péw í.» Yawe wi jo nya.

¹⁹ «Lǎli ni pe ga gi joo lè níì jo: ‹Nyàʔá na Yawe wolo Kolocɔlɔw gee naa myɛ kpéʔele wolo na?› Mɔ a be pye, wi n jo: ‹Amɛɛ yele mii yaʔa lè ní i báara kolocɔlɔɔ-nibɔnbèle pèle ma yele tári ni, kánmi bee na yele a sa ra báara nibɔnbèle pèle ma táraa ni, dee di lè ti o nyɛ yele wóri í.›

Yawe fǎngi sìnjánma kadoʔo

²⁰ «Ye gee naa jáari Zyakɔbi kpáagi wòolo ma. Ye gi yaʔa gi lóʔo Zyuda ni, ye jo:

²¹ Ye gee naa lóʔo, syɛɛnfele-labalaga, ní funvɔ̀nbēle! Nyapiigèlē i be na, pe si o nyaagi í, líiweegéle i be na pe si o lúro í.

²² Yawe n jo: Yele a fyáa mii na ì? Yele a ra cɛ̀lɛ́ mii yɛ́ʔɛ ma ì, mii wee wi táminyɔɔw kaan sólomi lɔ̀ʔɔ ma lè wi pye gi tɛɛ̀laʔali, bàngwɔɔ tɛɛ̀laʔala lee li lè ki a gbǎn li kána í? Ki kùnguruyi i fúugu, kàjáa yi i nyɛ fànʔa fun. Yi i fúlo, kàjáa yi a gbǎn li kána í.

²³ Kàjáa syɛ́ɛnbèle naa fúnyo n gbàn, pe i nyɛ niceebéle. Pe i núngu ni syée.

²⁴ Pe o gi nyuu peyɛɛ fúnyi ni kánmi naa na í si jo: ‹Ye tíi waa fɛ̀ɛgí Yawe na, wi lè wolo Kolocɔlɔw, woro wee wi zěgi kaangi lè ki lǎli ni, ki lè zěseligi, ní zěsangi, ní wɔ́ɔ̀ cégboogèle yaʔa wolo yaliilaari kéele na.›

²⁵ Yele kolomi kèlē ke gi myɛ nyáʔami, yele kapeegèle ge yele bɔ̀nɔ yacanri bee ni.

²⁶ Níì cán syɛɛnpeebéle i nyɛ mii syɛ́ɛnbèle ni. Pe n làra ni sige àmɛɛ parà levɔlɔ nyɛ lè. Pe i karinyanya nii ni nǎnbèle có.

²⁷ Amɛɛ gòdege gáà nyìn féjɛɛnrɛ na lè, ànbée be kpáayi nyìn yanɔʔɔrɔ-mí-syɔɔri na. Kánmi bee na pe baa pye séefɔɔlɔ ní lɔrɔfɔɔlɔ.

²⁸ Pe n sìnmɛ le, pe yɛ́ɛyi i daragi, pe kapeeyi n sɔ̀lɔ gi tɛɛ̀yéregi na. Pe o kútii nyuu kányɛɛgi na í, pe o círio kútii nyuu kányɛɛgi na jàngó wi tànʔa taa í. Pe o foomɔfɔbèle kútii nyuu kányɛɛgi na í.

²⁹ Mii si kòro lé kàa sìnbye ni kérigèle bee kánma na?» Yawe wi jo nya. «Mii a kòro lé mii a gɔ̀lɔ́w wòlo syɛɛnfelegi bee félege na í?

³⁰ Kapeegi gi lè yanɔnʔɔgɔ, ki i kpéʔele tári ni.

³¹ Kanyaajoobèle i kérigèle nyaagi ni nyuu ní jànvaa ní. Sáriga-wòlobèle i be có ni yaari peyɛɛ fǎngi láara ni, á gi mii syɛ́ɛnbèle dɛ́nɛ gi pye nya! Nyàʔá si yele a kpéʔele tári nyɛ̀ʔɛnaw kéele na?