Zyeremii 49 - Cebaara Bible 2010

Amɔn ye kéeli

¹ Dee di joo Amɔn ye kéeli na lè. Yawe wi syɛ́ɛnri naa joo níì jo: «Nànbile o nyɛ Isirayɛli ma ì? Kɔriliio o nyɛ wi ma ì? Nyàʔá na Gadi pye Milikɔmi wóʔo, á wi syɛ́ɛnbèle tɛ́ɛn wi kěyi ni?

² Koro na wéle, canyaa i maa,» Yawe wi jo nya, «yee ni mii a kapɛɛnnɛ yákpolo yaʔa li lóʔo lè Araba kěgi kánma na, ki lè Amɔn ye wóʔo, ki a kàri gurubɛɛtooro. Kěyee gi kàragí lè, naà a yi sórigo. Lǎli bee ni Isirayɛli a ní gi nɛnɛ syɔɔ, gee pe da nɛnɛ n syɔɔ wi ma lè,» Yawe wi jo nya.

³ «Hɛsyibɔn, da cɛ́ɛn, níì cán Ayi n kálagi! Araba calipiigèle, yaa sùpiigèle wáa, ye gɔ̀nvaʔaya le buroyo, yaa kùugo nyɛnigɛ kpéʔele, yáā fé yaa máari tǒbèle sɔ́lɔgɔmɔ ni! Níì cán Milikɔmi n cò ni syée n fàra wi sáriga-wòlobèle, ní wi syɛɛnkpolobèle na.

⁴ Nyàʔá na mɔ miyɛɛ gbɔ́ʔɔgi mɔ jinlɔyi kéele na, mɔ jinlɔgi ni yaliicànra taagi lè calipii-niceele? Mɔ n miyɛɛ daʔa mɔ lɔ́ri tɛɛkɔnyɔ na níì jo: ‹Wìí wi a pan mii kánmi na?› »

⁵ Kàfɔw Yawe wi lè Nyɛ̀ʔɛni Sùlasiibéle Kafɔlɔ, wi n jo: «Wéle, mii a fyáakpɔɔrɔ yìrige kàbanyi myɛ na bi ba cáan mɔ na, ti a yìri tɛ́ɛyi myɛ ni yi mɔ màʔa lè. Yele a nɛnɛ tórigo ye myɛ nibin nibin yeyɛɛ zìnmɛ na, syɔɔn faala a taa bi fànvɔbèle lúrugo í.

⁶ Kàjáa koro kàdoʔo ma Amɔn ye wóbèle be cò n kári lè, mii a be lúrugo be pan,» Yawe wi jo nya.

Edɔmi kéeli

⁷ Dee di joo Edɔmi kéeli na lè: Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Sícilimɛ ní o nyɛ Teman ni ì? A Láliiw kwɔ́ɔ lé wi sícilibèle ma? A be sícilimi kálagi lé?

⁸ Yele Dedan ye, ye kolo ye lúru yaa fé, ye sa tɛ́ɛn fálaweeyi ni! Níì cán mii a kálagili cáan Ezau na, lǎli ni mii a ba keele tɛ́ʔɛ wi na lè.

⁹ Ɛrɛzɛncɛnɛbéle ga pan mɔ ma, pe a ɛrɛzɛn jɔnjɔngɔ yaʔa í, kàyuubēle ga pan yébiligi ni, pe a kálagili kpéʔele bi yɛlɛ ní gi ní àmɛɛ ki be dɛ́nɛ lè.

¹⁰ Níì cán mii wi a Ezau waragi, mii a wi tɛɛlaragèle myɛ yirige kàfugi na, wi a ní gbǎn làra í. Wi yòdaʔayi, ní wi senyɛnbèle, ní wi tɛ́ɛnnyɛnbèle a kaan kálagili ma. Wi a ní pye yaà í.

¹¹ Mɔ círibèle wáa mi yaʔa, mii wi a be yaʔa sìi na, mɔ lɔgucebèle si peyɛɛ daʔa mii na.»

¹² Níì cán Yawe wi syɛ́ɛnri naa joo níì jo: «Wéle, bele be lè kútiiw da too be na pe yagbaagi gbaa í pe n yɛlɛ bi gi gbaa. A mɔ, mɔ í kòro lé wɔʔɔli sìndaa ni? Mɔ a kòro wɔʔɔli sìndaa ni í. Mɔ n yɛlɛ bi gbaa gi na.

¹³ Níì cán mii n kàli niyɛɛ tiimaa na,» Yawe wi jo nya, «níì jo Bosira a pye tɛɛ̀kalagiga, ní kataanra yáriga, ní kataʔa, ní dánga yáriga, wi kěyi myɛ si pye gurubɛɛrɛ bi kòro nya kwɔ́ɔmɔ fun.»

¹⁴ Mii n syɛɛnrɛ lóʔo Yawe ma, a tunduɔn wɔ́ɔ̀ tórigo syɛɛnfeleyi nínge ni n yi pye: «Ye yeyɛɛ gbóʔoro, ye pan gi kánmi na! Ye yìri ye kapɛɛnni kpúmɔn!»

¹⁵ «Níì cán wéle, mii n mɔ kàriga wobile syɛɛnfeleyi nínge ni, ní yafaʔala syɔɔn ye níngi ni.

¹⁶ Fyáakpɔɔri mɔ da ni wáa lè, ní mɔ fúngi kpɔ́ɔmɔ n mɔ pùuni, mɔ wee wi kòró fálaweeyi ni lè, dǎndamayi ǹjoyo si i nyɛ mɔ wóyo. Mɔ ga mɔ zyaari tɛ́ʔɛ yaà ǹjoʔo ma àmɛɛ nyɔɔ̀ wóro nyɛ lè, mii a mɔ tìrige bi cáan naa,» Yawe wi jo nya.

¹⁷ «Edɔmi a pye tɛɛ̀kalagiga. Bele myɛ pe ga ni sɔ̀lɔ́ wi taana lè, pe a ra káama sáā féfeegèle wíi wi kpàliyi myɛ kéele na.

¹⁸ Wi a pye àmɛɛ Sodɔmi, ní Gomɔri, ní yi taana kěyi nyɛ lè, yee yi kálagi lè,» Yawe wi jo nya, «syɔɔn faala a ní tɛ́ɛn yaà í. Yala o yala li nyɛ lè syɔɔn, li a ní tìrige yaà í.

¹⁹ Wéle, àmɛɛ càaraɔ nyɛ, wee wi yirigi Zyuridɛn tɛɛ̀tɔ́nyi ni lè ni syée tɛɛkòrogi ma, gee gi nyɔɔ lè. Mii a Edɔmi yaʔa wi fàn bi núngo yaà làla nibin ni, si wi télege yaà, wee mii nyɛ́nɛ n wòlo lè. Níì cán wìí wi nyɛ mii félege? Wìí wi a gbǎn mii yeri kútii na? Bànaʔawìí wi nyɛ bi gbǎn soro yére mii yɛ́ʔɛ ma?»

²⁰ Koro na ye gi lóʔo, gee Yawe tímana n kwɔ́ɔ Edɔmi kánmi na lè, ní kérigèle wi kɔ̀rirɔ n tímana Teman syɛ́ɛnbèle kánma na lè! Pe a tɔ̀nɔ́ be kɔ́ri kári àmɛɛ yaweeyiligēle piibéle nyɛ lè, pe a tɔ̀nɔ́ be kpáayi pye tɛɛ̀kalagiya.

²¹ Tári n cúngo pe tooli kàfulogo báriga ni. Yákpolaa lii, lee kàfulogo gi lúro lè yaà fwɔɔ Nyɛ́nɛri solomɔ lɔ́ʔɔ ma.

²² Wéle, wàa i lúru, wi i yìrigí, wi i wi fókaanyi sáanri ni Bosira tɔ́ngi àmɛɛ nyɔɔ̀ nyɛ lè. Edɔmi nànniribèle fúnyo si i nyɛ cángi bee na àmɛɛ cɔlɔɔ wóʔo nyɛ, wee wi nyɛ seeli na lè.

Damasi kéeli

²³ Dee di joo Damasi kéeli na lè: «Hamati, ní Aripadi n curugo. Níì cán pe n syɛɛnpɛɛnrɛ lóʔo. Pe i cɛ̀lɛ́ n pye àmɛɛ sólomi lɔ̀ʔɔ nyɛ lè sìnyére ni.

²⁴ Damasi bárigaw n kwɔ́ɔ, wi n kolo n lúru bàā fé, cúngoli n fànʔa taa wi na, fúngi wɔʔɔgɔ, ní káagala n too wi na, àmɛɛ cɔlɔɔ nyɛ, wee wi nyɛ pyà seele na lè.

²⁵ Ee! Mii sòololi kàʔa ga wáa n yaʔa ì, ki lè mii fundaanri kèkpɔʔɔ?

²⁶ Wi nìgɔcaribèle a wɔ́ɔ ra tuun wi kadàlayi na, kapɛɛnkpumɔn-nǎnbèle myɛ si kùu cángi bee na,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

²⁷ «Mii a náagi le Damasi tǒw na, ki a Bɛn-Hadadi fànʔafɔ-gbaayi sórigo.»

Arabu-syɛɛnfeleyi kéele

²⁸ Kedaari, ní Hasɔɔri fǎnyee na Babilɔni fànʔafɔw Nebukadinezari fànʔa taa lè, syɛ́ɛnri naa n joo yee bee kéele na, ki n jo: Yawe wi syɛ́ɛnri naa joo níì jo: «Ye yìri ye lúgu ye kári Kedaari kurugo. Ye canʔafolomɔ piibèle myɛ kálagi.

²⁹ Pe fànikpaayi, ní be yaweeri n yɛlɛ pe di láa kári, pe be fàniw, ní be yayigeleri, ní fàlibaayi koli bi kári, páā yákpolo wáa be kéeli na si jo: ‹Fyáakpɔɔrɔ, kàbanyi myɛ na!›

³⁰ Yaa fé! Yaa syée kelekele, ye sa tɛ́ɛn nyanbeweeyi fúnyo ni, Hasɔɔri ye!» Yawe wi jo nya. «Níì cán Babilɔni fànʔafɔw Nebukadinezari n keelaa tímana yele kánmi na, wi n kérigèle kèle tímana yele kánmi na.

³¹ Ye yìri! Ye lúgu syɛɛnfelegi kánma na gi tɛ́ɛn lè sági yɛɛ̀nyinge na, ki nyɛ lè wodɛ́nʔɛ ní fyáara fun,» Yawe wi jo nya. «Kɔ̀riyɔ wàlá yasɔʔɔyɔ o nyɛ gi na í, ki n tɛ́ɛn ki nibin.

³² Pe fàlibaayi a cò bi kári, pe yaweenɛʔɛri si wɔ́ɔ pye yakoliro. Bele pe be bàʔajɔɔw cɛnɛ lè, mii a be fɛɛ ní ségbanna ní bi wáa káfalagi kàbanya myɛ na, mii a be wɔʔɔgi yaʔa ki yìri kàbanyi myɛ na,» Yawe wi jo nya.

³³ «Hasɔɔri a pye gbàáyi tɛɛlaraga, ní tɛɛ̀kalagiga bi kòro nya làla o làla. Syɔɔn faala a ní tɛ́ɛn yaà í. Yala o yala li lè syɔɔn, li a ní tɛ́ɛn yaà í.»

Elami kéeli

³⁴ Wéle, Yawe syɛ́ɛnri di nan kanyaajoow Zyeremii na lè Elami kéeli na Zyuda fànʔafɔw Sedesyasi fǎngi sélimɛ na, ti n jo:

³⁵ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Wéle, mii a Elami sedegi kabi, ki lè wi séew yaselige.

³⁶ Mii a káfalaya sicɛrɛ yaʔa yi pan Elami ma, yee yi a yìri lè nyɛ̀ʔɛni kàbanya sicɛrɛ ma, mii a be fɛɛ ségbanna na bi kaan káfalayi bee myɛ ma. syɛɛnfelegaa a pye yaà, gee gi lè Elami wonɛnɛ-mí-yirigebèle a nan gi na í.

³⁷ Mii a Elami ye yaʔa paa cɛ̀lɛ́ pe nigoobèle yɛ́ʔɛ ma, ní bele yɛ́ʔɛ ma pe be sìikwɔɔri caa lè. Mii a wɔʔɔgɔ yaʔa gi nan be na mii fundanʔari káfugbanga báriga ni,» Yawe wi jo nya. «Mii a ŋɔséew tórigo be kurugo fwɔɔ bi taa mii í be kwɔ́ɔ.

³⁸ Mii a mii fàngoli tɛ́ʔɛ Elami ni, mii si a fànʔafɔw ní syɛɛnkpolobèle kpóo,» Yawe wi jo nya.

³⁹ «Kàjáa canzanyi ni Elami wóbèle be cò n kári lè, mii a be lúrugo be pan,» Yawe wi jo nya.