Zyeremii 47 - Cebaara Bible 2010

Gee gi joo Filisitini ye kánmi na lè

¹ Wéle, Yawe syɛ́ɛnri di nan kanyaajoow Zyeremii na lè sáni Faraɔnw í ba too Gaza na lè, toro di nyɛ dee naa:

² Yawe wi syɛ́ɛnri naa joo níì jo: «Wéle, lònɛʔɛgɛ i yìrigí solomɔkulo ma, ki n baa pye àmɛɛ lòcoologo nyɛ, gee gi yáriri tɔ́ngi lè. Ki i tári ní di yáriri myɛ tɔ́ngi, ní kěyi ní yi syɛ́ɛnbèle. Nǎnbèle i yákpogèle wáa, tári syɛ̀ɛnnɛ myɛ i cɛ́ɛn,

³ wi fànnɛʔɛgɛ syɔ́ɔnyi fèriye kàfulogo kéele na, ní wi kapɛɛnkpumɔn-wòtorobèle tìnmɛ na, ní wi sàkoyi fúlomɔ na. Tofɔbèle ní o wéle be pìíbèle ma í, àmɛɛ kɔ́yi fànʔa kwɔ́ɔ lè.

⁴ Níì cán cángi i maa, gee ni Filisitini ye myɛ a kálagi lè. Bele myɛ be nyɛ lè Tiiri ní Siidɔn dɛ̀ɛmɛfɔbèle, poro a tɔ̀nɔ́ kálagi yiri yaà. Yawe a Filisitini ye kálagi, pe lè Kafitɔri lǒgi nínge tátɛɛlɛ wozanbèlē.

⁵ Nyǔnyi n baa kùnu Gaza ni. Asikalɔn nyɔ́ɔgi n tɔ́n. A yele tɛɛfiigi wozanbèlē doò, làla jòorí yele a kòro bàā yeyɛɛ kɔnɔgi nya?

⁶ ‹Ee! Yawe ŋɔséew sán mɔ a kári bi sa láʔa sìnŋɔn-sìndaa ni? Lúru mi jée mɔ kpafogi ni, yére sági, mí pyèri.›

⁷ Kanmìí na wi a ŋɔ́ndaa bi sɛ́ɛ? Ncan Yawe n gi joo n gbàn wi ma waa syée Asikalɔn ma, ní sólomi lɔ̀ʔɔ nyɔ́ɔ ma. Nɛɛ bee wi wi tórigo.»