Zyeremii 45 - Cebaara Bible 2010

Syɛ́ɛnri di joo Baruki ma lè

¹ Syɛ́ɛnree kanyaajoow Zyeremii joo Neriya jáaw Baruki ma, lǎli ni wi da ni syɛ́ɛnri naa sɛ́bɛ sɛ́bɛ ni lè, dee Zyeremii da ni nyuu wi si i di sɛ́bɛ lè, Zyozyasi jáaw Yehoyakimi fǎngi yɛɛsicɛrɛ wólo na, wi pye lè Zyuda fànʔafɔw. Wi n jo:

² «Yawe wi lè Isirayɛli Kolocɔlɔw, woro wi syɛ́ɛnri naa joo mɔ kéeli na Baruki, níì jo:

³ ‹Mɔ i gi nyuu níì jo: Wɔʔɔlɔ i mii na! Níì cán Yawe i wɔʔɔgaa fàrá mii yáami na. Mii fǎngi i kwóo mii ŋɔ́ngari báriga ni, mii o ŋɔ́ndaala taagi í.›

⁴ Mɔ a wi pye, ‹Yawe wi syɛ́ɛnri naa joo níì jo: Wéle, ncan gee mii faan lè, mii a gi kálagi, gee mii cɔ́rɔ lè, mii a gi kɔ́n. Gee bee n jo tári naa myɛw.

⁵ Yakpoloyo lé mɔ caa? Mɔ a kɔ́ ra yi caa í! Níì cán wéle, mii a wɔʔɔgɔ yaʔa gi too cere yáriri myɛ na, Yawe wi jo nya. Mii si a mɔ siiw kaan mɔ ma wi pye yataʔa tɛ́ɛyi myɛ ni, beè mɔ ga kári lè.› »