Zyeremii 43 - Cebaara Bible 2010

Pe n Zyeremii kɔ́ri fànʔa na n kári Ezyipiti ma

¹ Lǎli ni Zyeremii kwɔ́ɔ Yawe be Kolocɔlɔw syɛ́ɛnrɛ myɛ joolo na syɛ́ɛnbèle myɛ ma lè, syɛ́ɛnri bee myɛ Yawe be Kolocɔlɔw da wi tun wi ba joo be ma lè,

² Azariya wi lè Hosyaya jáaw, ní Yohanan wi lè Kareya jáaw, ní nɛ̀ɛgbɔʔɔgɔ nanbèle bee myɛ Zyeremii yari: «Gee mɔ joo lè jànvaa wii. Yawe wolo Kolocɔlɔw ga mɔ tun mɔ í ba gi joo wolo ma si jo: ‹Yele a kɔ́ kári Ezyipiti ma bi sa tɛ́ɛn yaà í.›

³ Kàjáa Neriya jáaw Baruki wi mɔ sɔ́ɔn wolo na jàngó bi wolo le Kalide ye kɔ́yi ni koro ga pye be wolo kpóo wàlá bi wolo cò bi kári Babilɔni ma.»

⁴ Yohanan wi lè Kareya jáaw, ní kapɛɛnkpumɔn-kùndigibèle myɛ n fàra syɛ́ɛnbèle myɛ na, pe wàa ga Yawe jóomi lóʔo si kòro Zyuda tári ni í.

⁵ A Kareya jáaw Yohanan, ní kapɛɛnkpumɔn-kùndigibèle myɛ Zyuda wogorobèle myɛ kɔ́ri n kári, poro bele pe da cariga n kári syɛɛnfeleyi myɛ nínge ni lè, ní kɔ́ɔ̀ lúru n pan bi ba tɛ́ɛn Zyuda tári ni,

⁶ pe lè nǎnbèle, ní cébèle, ní pìíbèle, ní fànʔafɔw jàala be lè cébèle, ní syɛ́ɛnbèle bele myɛ gáridibèle kùndigi Nebuzaradan da yaʔa ní Gedaliya ní, wi lè Ahikami jáaw, Ahikami wi lè Syafan jáaw, n wɔ́ɔ̀ fàra kanyaajoow Zyeremii ní Baruki na wi lè Neriya jáaw.

⁷ A be kári Ezyipiti tári ma, níì cán pe ga Yawe jóomi lóʔo í, a be kári n sáà nan Takipanɛsi na.

Zyeremii n Ezyipiti kálagili kéele joo

⁸ A Yawe syɛ́ɛnri nan Zyeremii na Takipanɛsi ni, wi n jo:

⁹ «Kàdɛnɛgboloyo láa Zyuda nǎnbèle nyɛ́nɛ na mi yi tɔ́n cóori ni, jùfaaw wéʔe ni gi nyɛ lè Faraɔnw fànʔafɔgbaʔa kpaanweele na Takipanɛsi ni.

¹⁰ Mɔ a be pye: ‹Yawe wi lè Nyɛ̀ʔɛni Sùlasiibéle Kafɔlɔ woro wi syɛ́ɛnri naa joo wi lè Isirayɛli Kolocɔlɔw, níì jo: Wéle, mii n tun be sa Babilɔni fànʔafɔw Nebukadinezari caa bi pan wi lè mii falipyew. Mii a ba wi fàngoli taʔa kàdɛnɛyi naa na mii làriga lè, wi a ba wi fànigi sánʔa cáan yi na.

¹¹ Wi a pan si ba Ezyipiti tári kpúmɔn: Bele be nyɛ lè kùúw wòolo, kùúw a kári ní be ní, bele be nyɛ lè púlori wòolo, poro a kári púlori na, ŋɔséew wòolo a kaan ŋɔséew ma.

¹² Mii a náagi le Ezyipiti kolocɔlɔbèle kpɔ̀ʔɔrɔlɔ kpaaya na. Nebukadinezari a yi sórigo si be kolocɔlɔbèle cò bi kári púlori na. Wi a Ezyipiti tári tɛ́ʔɛ bi wiyɛɛ mígi àmɛɛ bànaʔaɔ wi búrogi téeri ni wiyɛɛ míri lè, si yiri yaà beè yɛɛ̀nyinge na.

¹³ Wi a cángi kpɔ̀ʔɔrɔlɔ gàángéle kabagi Ezyipiti tári ni, si Ezyipiti kolocɔlɔbèle kpɔ̀ʔɔrɔlɔ kpaaya sórigo ní naà ní.› »