Zyeremii 41 - Cebaara Bible 2010

¹ Yɛ́ɛli yeye kɔrɔsiin wóʔo na, Isimayɛli wi lè Netanya jáaw, Netanya wi lè Elisyama jáaw, ní i nyɛ fànʔafɔ-dúlugi wówaa, a woro pan ní fànʔafɔw syɛɛnkpolobèle pèle ní, n fàra nànbēle kɛɛ na, Ahikami jáaw Gedaliya ma, Misipa ma, a pe bàā pínɛ n lìi yaà Misipa ma.

² Lǎli bee ni a Netanya jáaw Isimayɛli yìri ní nǎnbèle kɛɛ ní n fàra wiyɛɛ na n Gedaliya kpúmɔn ní ŋɔsée ní, Gedaliya wi lè Ahikami jáaw, Ahikami wi lè Syafan jáaw. Kánmi bee na wi wi kpóo, woro wee Babilɔni fànʔafɔw da télege tári nyúngo na lè.

³ A Isimayɛli ní wɔ́ɔ̀ Zyuda ye myɛ kpóo, bele pe da pye yaà ní Gedaliya ní Misipa ni lè n fàra Kalide ye kapɛɛnkpumɔn-nǎnbèle bele na pe da pye yaà lè.

Isimayɛli n kùsɛɛbéle togoye sicɛrɛ kpóo

⁴ Gedaliya kpóoli kàdoʔo ma canziin wógi na, koro n gi taa syɔɔn faala da kɔ́ɔ̀ yafyɛn cán gi ni í,

⁵ a nànbēle togoye sicɛrɛ yìri Sisyɛmi, ní Silo, ní Samarii ma n pan, pe bàʔajɔɔbèle maa pye wogunubéle ní, pe búroyi si i nyɛ wozuluguyo ní, á be peyɛɛ kɔnɔgi kɔnɔgi. Míimɛ sáriga, ní nùndanʔa yáriga maa pye be kɔ́yi ni bi ba wòlo sáriga Yawe kpáagi ni.

⁶ Isimayɛli wi lè Netanya jáaw, a wi yiri Misipa ni n be fàra. Wi maa ni táanri ní i nyaan. Lǎli ni wi nan be na lè, a wi be pye: «Yaa maa wo kári Ahikami jáaw Gedaliya tɛ́ʔɛ ma.»

⁷ Kàjáa lǎli ni be nan kěgi nínge na lè, a Netanya jáaw Isimayɛli be kɔnɔgi níì be wáa lǒgi wéʔe ni, nǎnbèle bele pe da pye ní wi ní lè, poro dɛ̀ɛmɛni báriga ni.

⁸ Pèle kɛɛ si maa pye syɛ́ɛnbèle bee ni, bele be gi joo lè Isimayɛli ma níì jo: «Mɔ a kɔ́ wolo kpóo í, níì cán lìile i nyɛ wolo ma séyi ni wolarigala ní, li i nyɛ bile, ní orizye, ní sìnmɛ, ní sárigā.» Lǎli bee ni a wi bele bee yaʔa wi ga be kpóo ní be senyɛnbèle ní í.

⁹ Nǎnbèle bele pe da pye ní Gedaliya ní á Isimayɛli baa be kpóo lè, lǒgi wéʔe ni wi da be woguubèle myɛ wáa lè, koro fànʔafɔw Aza da sámaga Isirayɛli fànʔafɔw Bayesya kánmi na. Koro si Netanya jáaw Isimayɛli nyìn kúbèle na.

¹⁰ Bele myɛ pe da kòro Misipa ni lè, a Isimayɛli be cò ni syée pulobèlē: fànʔafɔw jàala pe lè cébèle, ní syɛ́ɛnbèle wozanbèlē myɛ pe da kòro Misipa ni lè, bele gáridibèle kùndigi Nebuzaradan da kàlifáa Ahikami jáaw Gedaliya ma lè, Netanya jáaw Isimayɛli maa be cò n kári pulobèlē, níì kári bi sa pye ní Amɔn ye ní.

Isimayɛli wojobèle syɔɔlɔ kéele

¹¹ Yohanan wi lè Kareya jáaw, ní kapɛɛnkpumɔn-kùndigibèle bele myɛ be pye ní wi ní lè, a poro kapeeyi myɛ kéele lóʔo, yee Netanya jáaw Isimayɛli kpéʔele lè.

¹² A be sáà nǎnbèle myɛ kɔ́ri n kári sa too Netanya jáaw Isimayɛli na. A be sáà wi nɛnɛ n taa Gabaɔn lòkpɔɔgi taana.

¹³ Syɛ́ɛnbèle myɛ be pye ní Isimayɛli ní lè, lǎli ni be Kareya jáaw Yohanan ní kapɛɛnkpumɔn-kùndigibèle myɛ wéle n nyaa ní wi ní lè, a be fala ni fundaanra kpéʔele.

¹⁴ Syɛ́ɛnbèle myɛ si Isimayɛli da cò lè Misipa ni ni syée pulobèlē, a poro kolo n lúru n pan n baa pínɛ ní Kareya jáaw Yohanan ní.

¹⁵ Kàjáa Netanya jáaw Isimayɛli maa fàn Yohanan yɛ́ɛgi na n syɔɔ, woro ní nànbēle kɔrɔtaanri ní, n kári Amɔn ye ma.

¹⁶ Yohanan wi lè Kareya jáaw, n fàra kapɛɛnkpumɔn-kùndigibèle myɛ na be pye ní wi ní lè, a poro syɛɛnsanbèle myɛ kɔ́ri yaà, bele Netanya jáaw Isimayɛli da cò Misipa ni lè, woro wee wi da Ahikami jáaw Gedaliya kpóo lè níì kapɛɛnkpumɔn-nǎnbèle, ní cébèle, ní pìíbèle cò, n fàra nǎnbèle na be wòlo lè, a pe be kɔ́ri yaà Gabaɔn ma n lúru ni maa.

¹⁷ A be kólogi láa ni syée, ní sáà tìrige Kimihami nibɔndirige-tɛ́ɛgi ni Bɛtilehɛmi taana, koro kàdoʔo ma si kári Ezyipiti ma

¹⁸ bi léeli Kalide ye na, poro bele na pe da ni fɛ̀ɛgí lè, níì cán Netanya jáaw Isimayɛli maa Ahikami jáaw Gedaliya kpóo, woro wee Babilɔni fànʔafɔw da télege lè tári nyúngo na.