Zyeremii 40 - Cebaara Bible 2010

Zyeremii n sáà tɛ́ɛn Misipa ni

¹ Yawe syɛ́ɛnri di nan Zyeremii na lè, lǎli ni gáridibèle kùndigi Nebuzaradan wi yirige Arama ni n tórigo lè. Lǎli ni wi Zyeremii láa lè, Zyeremii maa pye wobwɔɔɔ ní ní nyɔ̀ʔɔmɔ ní, Zyerusalɛmi ní Zyuda wóbèle bele ni pe da cò lè, poro bele pe da cò ni syée Babilɔni ma lè.

² A gáridibèle kùndigi Zyeremii yeri yaà, ní baa wi pye: «Yawe mɔ Kolocɔlɔw maa kapeegi naa kéele joo tɛ́ɛgi naa kánma na.

³ Yawe n gi yaʔa a gi baa pye. Wi n gi kpéʔele n foro, gee wi da joo lè, níì cán yele n kapeele pye Yawe na. Yele ga wi jóomi lóʔo í, koro na gee wi da joo lè, ki n nan yele na.

⁴ Tɔ́ɔliw ni wéle, mii wi nyɔ̀ʔɔmi sánʔana mɔ na wee níjanʔa, bee bi nyɛ mɔ kɔ́yi na lè. Ki ga mɔ dɛ́nɛ bàā syée Babilɔni ma ní mii ní, da maa, mii a ra mɔ kɔ̀rɔsíi. Bi kári ní mii ní Babilɔni ma, gee bee ga pye ki ga yɛlɛ mɔ ma í, mɔ a kɔ́ ra maa í. Wéle, tári myɛ i nyɛ mɔ yɛ́ʔɛ ma, da syée tɛ́ɛgee mɔ ga nyaa a gi nyɔɔ lè, níì yɛlɛ mɔ ma bi kári yaà.»

⁵ Zyeremii si da kɔ́ɔ̀ syɛɛnlurugoro kaan í, a wi níì wi pye: «Lúru maa syée Gedaliya ma, wi lè Ahikami jáaw, Ahikami wi lè Syafan jáaw, wee Babilɔni fànʔafɔw télege Zyuda kěyi nyúngo na lè, mí sa kòro ní wi ní syɛ́ɛnbèle nínge ni. Wàlá maa syée tɛ́ɛgee ni mɔ ga nyaa a gi yɛlɛ mɔ ma lè bàā syée yaà.» A gáridibèle kùndigi yaliire, ní kpɔʔɔrɔ kaan wi ma, níì wi lúrugo n tórigo.

⁶ A Zyeremii kári Gedaliya ma, wi lè Ahikami jáaw, Misipa ma, ní sáà kòro ní wi ní syɛ́ɛnbèle nínge ni pe da kòro tári ni lè.

Zyuda ye n peyɛɛ gbóʔoro n baa pye ní Gedaliya ní

⁷ Kapɛɛnkpumɔnbèle kàfɔɔlɔ myɛ pe da kòro sìnbirigi ni lè, a poro ní be nǎnbèle gi lóʔo Babilɔni fànʔafɔw n Gedaliya télege tári nyúngo na, wi lè Ahikami jáaw, níì nǎnbèle ní cébèle, ní pìíbèle, ní tári fɔ̀ngɔfɔɔlɔ kàlifáa wi ma, bele be lè pe da be cò n kári Babilɔni ma í.

⁸ A be kári Gedaliya ma Misipa ma, poro be pye: Isimayɛli wi lè Netanya jáaw, ní Yohanan, ní Zyonatan pe lè Kareya jáabèle, ní Seraya wi lè Tanhumɛti jáaw, ní Netofa ye Efayi jáabèle, ní Maaka ye Yezanyahu, poro ní nǎnbèle be pye ní be ní lè.

⁹ Gedaliya wi lè Ahikami jáaw, Ahikami wi lè Syafan jáaw, a woro baa kàli be ma, ní nǎnbèle bele ma be pye ní be ní lè, níì jo: «Yele a kɔ́ fyáa fáliw pyele na Kalide ye ma í, ye kòro tári ni yaa báara Babilɔni fànʔafɔw ma, yele a gi nyaa ki pɔ́rɔ yele ma.

¹⁰ Mii si na, wéle, mii a kòro Misipa ni, bi pye yɛ́ɛgi na Kalide wóbèle bele má pe a ra maa wolo ma lè. Yele si na, yaa dùvɛɛnw, ní gbɛ̀ɛ́ngi yasanra, ní sǐnmi yaliilaara kpéʔele, yaa di nii yele yaleyi ni, yé kòro yele kěyi ni, yee yele cò yeyɛɛ ma lè.»

¹¹ A gi wɔ́ɔ̀ pye Zyuda ye myɛ be pye Mowabi tári ni lè, Amɔn ye ma, ní Edɔmi ni, ní tátɛɛyi wozanya myɛ ni lè a poro gi lóʔo Babilɔni fànʔafɔw n pèle yaʔa a be kòro yaà Zyuda tári ni, níì Gedaliya télege be nyúngi na, wi lè Ahikami jáaw, Ahikami wi lè Syafan jáaw.

¹² A Zyefubèle myɛ yìri yaà tɛ́ɛyi myɛ ma, yee má pe da cariga n kári lè, a be lúru n pan Zyuda tári ma Gedaliya ma Misipa ma. Pe maa tɔ̀nɔ n dùvɛɛn saʔa ní yasannɛʔɛrɛ yaliilaara kpéʔele.

Gedaliya kpóoli kéele

¹³ Yohanan wi lè Kareya jáaw, ní kapɛɛnkpumɔnbèle kàfɔɔlɔ myɛ be pye sìnbirigi ni lè, a poro pan Gedaliya ma Misipa ma,

¹⁴ ní baa wi pye: «A mɔ gi cán lé Amɔn ye fànʔafɔw Baalisi n Netanya jáaw Isimayɛli tun wi ba mɔ kpóo?» Kàjáa Ahikami jáaw Gedaliya ga tága be syɛ́ɛnri na í.

¹⁵ A Kareya jáaw Yohanan si sáà gi joo Gedaliya ma Misipa ma làrama ni níì jo: «Ki yaʔa mii í sa Netanya jáaw Isimayɛli kpóo, syɔɔn faala a gi cán í. Nyàʔá na gi yɛlɛ wi kɔ ba mɔ kpóo, Zyuda wóbèle myɛ pe baa kpóʔoro mɔ taana lè, poro si cariga fala, Zyuda wogorobèle si pùuni kánmi bee na?»

¹⁶ A Ahikami jáaw Gedaliya Kareya jáaw Yohanan yari: «Mɔ a kɔ́ koro kpéʔele í, níì cán gee mɔ nyuu Isimayɛli kéeli na lè, ki i nyɛ jànvaa.»