Zyeremii 4 - Cebaara Bible 2010

¹ Yawe n jo: «Isirayɛli, mɔ ga lúru ni maa, mii má gi yɛlɛ mɔ í lúru pan. Mɔ ga mɔ yanɔnʔɔyi láa n núngo yaà mii yɛ́ʔɛ ma, mɔ si ní o curugu ni máari í,

² mɔ ga ni kɛ̀ɛ́ níì jo: ‹Yawe woweew mɛ́ʔɛ na› ní funviire, ní kányɛʔɛ, ní sínnɛ ni, lǎli bee ni syɛɛnfeleyi a ra dùbaw kpéʔele yiyɛɛ ma wi ni, yi a ra yiyɛɛ gbɔ́ʔɔgi wi ni.»

³ Níì cán Yawe wi syɛ́ɛnri naa joo Zyuda nǎnbèle, ní Zyerusalɛmi ye ma níì jo: «Ye sefɔngɔ cáan yeyɛɛ ma. Yele a kɔ́ ra lùguri lúru wúuri nínge ni í.

⁴ Ki n yɛlɛ ye yeyɛɛ kɛ́nɛ Yawe ma, ye yele fúnyi kɛ́nɛ, Zyuda nǎnbèle, ní Zyerusalɛmi ye, koro ga pye mii fundanʔari a kɔ́ folo yiri àmɛɛ naà nyɛ, gee gi nyín lè í, bi pye wàa a gbǎn gi fígi í, yele péemi kapyere kéele na.

Wɔʔɔgɔ supiiwáara Zyuda ni

⁵ «Ye gee naa jáari Zyuda ni, ye gi joo ye tɛ̀ɛn Zyerusalɛmi ni! Yé jo: ‹Ye tòmaagi wìi tári ni!› Ye yákpogèle wáa gbanʔama, ye gi joo yé jo: ‹Ye yeyɛɛ gbóʔoro, wo kári wo sa jée kèniriyi ni!›

⁶ Ye dìrapo yìrige Siyɔn kàbangi na, yaa fé, yele a kɔ́ yére í! Níì cán mii n wɔʔɔgɔ yìrige solomɔkulo ma ki i maa, kálagigbɔ́ɔlɔ lii.»

⁷ Càaraw n ye n yiri wi tɛɛlàragi ni, syɛɛnfeleyi kálagifɔlɔ i nyɛ n kwɔ́ɔ tánʔani na, wi n yiri n kwɔ́ɔ wi tɛɛkòrogi ni bi mɔ tári kálagi. Mɔ keyi a pye kataya, syɛ̀ɛnnɛ a ní pye yi ni í.

⁸ Koro na ye gɔ̀nvaʔaya le buroyo, ye pye kùu káyaʔa na yaa nyaan yaa peele. Níì cán Yawe fundanʔari káfugbanga a tée láʔa wolo na í.

⁹ Yawe n jo: «Cángi bee na fànʔafɔw ní syɛɛnkpolobèle báriga a kwɔ́ɔ, sáriga-wòlobèle a curugo, kanyaajoobèle fúnyo a nyáʔami.»

¹⁰ A mii jo: «Ee! Kàfɔw Yawe! Mɔ n tɔ̀nɔ n dígi syɛ́ɛnbèle naa, ní Zyerusalɛmi ni, àmɛɛ mɔ da gi joo lè níì jo: ‹Yele a yɛɛ̀nyingi taa!› A ŋɔséew baa nan fwɔɔ wolo sìíw na.»

Gàlagíw fɔ̀ɔlɔ n cáan n yiri kàbanyi myɛ na

¹¹ Lǎli bee ni pe a gi joo syɛ́ɛnbèle naa ní Zyerusalɛmi ma si jo: «Káfalafuugo i yìrigí fìími tára dǎndamaya kólogo ma ni funu ni maa mii syɛ́ɛnbèle calipile kánma na, ki o nyɛ bi yaliire fɛɛ wàlá bi yaliipyá sámaga í.

¹² Báriga káfalaga gi yìrigí yaà beè ni maa fwɔɔ n baa nan mii na. Tɔ́ɔliw ni mii a kútii joo ní be ní.»

¹³ Wi wéle, wi i maa àmɛɛ fàfaanya nyɛ lè! Wi kapɛɛnkpumɔn-wòtorobèle i nyɛ àmɛɛ káfala-sìnjinnɛ nyɛ lè, wi syɔ́ɔnyi n cólogo n sɔ̀lɔ nyɔ́ɔbèle na. Wɔʔɔlɔ i nyɛ wolo na, níì cán wolo n kálagi!

¹⁴ Péemi pɛ́ɛ mi yirige mɔ fúngi ni, Zyerusalɛmi, koro ga pye mɔ í syɔɔ! Làla jòorí mɔ a kwɔ́ɔ nya wodɛ́ɛɔn ní mɔ fúngi sɔ̀ngubeere ni?

¹⁵ Níì cán joomɔ i yìrigí yaà fwɔɔ Dan ma, fwɔɔ yaà Efirayimi nyanbelegi ma, ni wɔʔɔgɔ kéele nyuu ni gi jáari.

¹⁶ Ye syɛɛnfeleyi sɔ̀ngi ye taa gee naa na, ye gi jáari Zyerusalɛmi kánmi na ye jo: Kàsiitun-nyɛ́nbèle n yìri táleelire ma ni maa. Pe i yákpogèle wáa Zyuda kěyi kánma na.

¹⁷ Pe i Zyerusalɛmi máari àmɛɛ seʔe kpaàwelebéle nyɛ lè, níì cán ki n mii cée, Yawe wi jo nya.

¹⁸ Koro gi nyɛ mɔ tánʔaganmi ní mɔ kapyegèle tɔ̀nɔ, mɔ péemi bi nyɛ bee bee. Gee bee tɔ̀nɔ́ i nyɛ yasorogo, ki tɔ̀nɔ́ i jǐn fwɔɔ mɔ zɔnw ni.

Gàlagíw Zyeremii nyaagi ni nyuu ni yaari lè koro n yaama wáa wi na

¹⁹ Mii láayi! Mii láayi! Mii tɔ̀nɔ́ i wɔʔɔ mii fúngi ni! Mii zɔ̌nw i figiri, mii a gbǎn pyèri í. Níì cán mii i tòmaagi wìimɛ, ní kapɛɛnni yákpolo lúro.

²⁰ Pe i kálagila nyuu ni taari kálagila na, níì cán tári myɛ n kálagi. Mii fànikpaayi n pàla n kálagi làrinijanna ni, n mii tɛɛlàrayi fànibēle kálagi làla nibin ni.

²¹ Làla jòorí mii a kòro bàā dìrapow nyaagi si wɔ́ɔ kòro bàā tòmaagi wìimɛ lúro?

²² «Kányɛʔɛ na mii syɛ́ɛnbèle n dóli, pe ga mii cán í. Jaafɔ-labalaya yii, pe n fɔ̀n cánna ni. Kapeʔe pyele sícilimɛ yagana bi nyɛ be ma, kàjáa pe ga kacànna pyeganma cán í.»

²³ Mii n tári wéle, n gi nyaa ti i nyɛ sìnzamaga ni, yafyɛn ga pye yaà í. Nyɛ̀ʔɛgèle kàbaan ma, ke gbɛ̀ɛ́nmi ga pye yaà í.

²⁴ A mii nyanbeleyi wéle, n gi nyaa a yi i cɛ̀lɛ́, a dǎndamayi myɛ i cúngu.

²⁵ A mii i wéle, n gi nyaa syɔɔn ga níì pye yaà í. A nyɛ̀ʔɛni féjɛɛngèlē myɛ fàn.

²⁶ A mii i wéle, n gi nyaa a tíiri séye kàri fìimɛ tára, a di kěyi myɛ kálagi Yawe yɛ́ʔɛ ma, wi fundanʔari káfugbanga yɛ́ʔɛ ma.

²⁷ Níì cán Yawe n jo: «Tári myɛ a kálagi, kàjáa mii a di kálagi kwɔ́ɔ péw í.

²⁸ Gee bee kéele na tári a pye kùu káyaʔa na, nyɛ̀ʔɛgèle ge lè ǹjogi ni, ke a pye yébilimɛ. Níì cán mii wi gi jo, koro mii kɔ̀rirɔ n tímana, ki pyeli si a ní ba wári mii na í, mii a ní lúru bi gi sàa í.»

Siyɔn i nyɛ syɛɛnkpoobèle yɛ́ʔɛ ma

²⁹ Kěgi myɛ i fé syɔ́ɔnyi fɔ̀ɔlɔ, ní sedeŋɔɔbèle kàfulogo na. Pe i jǐn kɔliyi ni, pe i lúru fálayi na. Kěgi myɛ n yaʔa, syɛ̀ɛnnɛ ní o nyɛ gi ni í.

³⁰ A mɔ, wogalagiɔ, nyàʔá mɔ a kpéʔele? Alí mɔ ga fàninyɛɛn-súruo le, àlí mɔ ga miyɛɛ vère ní tɛɛ̀ fèrere yárira ní, níì káliw taʔa mɔ nyapiigèle na, mɔ a miyɛɛ zámaga bi nyɔɔ gbanzan. Nǎnbèle bele mɔ kéeli da dɛ́nɛ lè, pe i mɔ faari, mɔ siikwɔɔri be caa.

³¹ Mii i yákpowáara lúro, mɔ a jo cɔlɔɔ yákpowáara dii, wee wi nyɛ seeli na lè, wɔʔɔgɔ yákpowáara, mɔ a jo wee wi nyɛ pìiselio seele na lè. Calipili Siyɔn yákpoli lii. Li i cɛ́ɛn, li i kɔ́yi sáanri níì jo: «Wɔʔɔgɔ i mii na, mii i tuun syɛɛnkpoobèle kúruyo láara ni.»