Zyeremii 37 - Cebaara Bible 2010

Fànʔafɔw Sedesyasi n tun a be sáà Zyeremii yíbe

¹ Sedesyasi wi lè Zyozyasi jáaw, a woro tɛ́ɛn fǎngi na Konyahu sìndɛɛgi ni wi lè Yehoyakimi jáaw. Nebukadinezari wi lè Babilɔni fànʔafɔw, woro wi da wi télege fǎngi na Zyuda tári nyúngo na.

² Woro yoo, wi falipyebèle yoo, tári syɛ̀ɛnnɛ yoo, pe ga Yawe syɛ́ɛnri lóʔo í, toro dee wi kanyaajoow Zyeremii pye a wi joo lè í.

³ A fànʔafɔw Sedesyasi Syelemya jáaw Yehukali, ní sáriga-wòlow Maaseya jáaw Sofonii tun kanyaajoow Zyeremii ma, pe sa wi pye: «Da nyɛ́ɛri wolo kéeli na Yawe ma, wi lè wolo Kolocɔlɔw.»

⁴ Zyeremii si maa ni syée ní i lúrugu ni maa syɛ́ɛnbèle nínge ni. Pe da kɔ́ɔ̀ wi le kàsow ni í.

⁵ Faraɔnw kapɛɛnkpumɔnbéle maa yiri Ezyipiti ni ni maa, Kalide ye be pye wodɛ́ɛnbéle ní Zyerusalɛmi taana kapɛɛnni kánma na lè, a poro ga kéeli bee lóʔo, a be yìri Zyerusalɛmi taana n kári.

⁶ Lǎli bee ni a Yawe syɛ́ɛnri nan kanyaajoow Zyeremii na, ti n jo:

⁷ «Yawe wi lè Isirayɛli Kolocɔlɔw, wi n jo: ‹Ye sa gi joo Zyuda fànʔafɔw ma, woro wee wi yele tun ye ba mii yíbe lè, yé wi pye: Faraɔnw kapɛɛnkpumɔnbèle pe da yiri ba mɔ dɛ̀ɛmɛ lè, pe n kolo n lúru ni syée pe tári ma ti lè Ezyipiti.

⁸ Kalide ye a ní lúru pan, pe a ba too kěgi naa na, pe a gi syɔɔ taa si gi sórigo ní naà ní.›

⁹ Yawe wi syɛ́ɛnri naa joo níì jo: ‹Ye a kɔ́ ra yeyɛɛ váana í, si jo: Kalide ye a tɔ̀nɔ́ kári bi léeli wolo na.› Níì cán pe a kári í.

¹⁰ Alí yele ga Kalide ye kapɛɛnkpumɔnbèle myɛ kpúmɔn n cáan, poro bele be kapɛɛnni kpúmɔn ní yele ní lè, wàa ga pye wi ga níì kòro be ni, kapye nǎnbèle be kpàli lè poro ban í, pe a ní yìri pe myɛ nibin nibin bi yére be fànikpaayi ni bi kěgi naa sórigo ní naà ní.»

Zyeremii leli kéele kàsow ni

¹¹ Lǎli ni Kalide ye kapɛɛnkpumɔnbèle yìri lè n núngo Zyerusalɛmi taana Faraɔnw kapɛɛnkpumɔnbéle kéele na,

¹² Zyeremii maa ni caa bi yiri Zyerusalɛmi ni bi kári Bɛnzyamɛ tári ma bi sa wi kɔ́rigi lɛɛlɛ taa wi syɛ́ɛnbèle nínge ni.

¹³ Lǎli ni wi nan Bɛnzyamɛ kpàánweeli na lè, gáridibèle kàfɔlɔ be yiri lè Yiriya, wi lè Syelemya jáaw, Syelemya wi lè Hananya jáaw, woro maa pye yaà, a wi kanyaajoow Zyeremii cò, níì gi joo níì jo: «A mɔ syée sa miyɛɛ gaan wii Kalide ye ma.»

¹⁴ A Zyeremii wi yari: «Jànvaa wii, mii o syée sa niyɛɛ gaan Kalide ye ma wii í.» Kàjáa Yiriya ga lóʔo wi ma í, níì wi cò n kári syɛɛnkpolobèle ma.

¹⁵ A syɛɛnkpolobèle fúnyo tanʔa Zyeremii kurugo, a be wi kpúmɔn níì wi lè kàsow ni, sɛ́bɛkanw Zyonatan kpáagi ni. Níì cán pe maa gi sámaga kàsokpaʔa.

¹⁶ Kánmi bee na be Zyeremii le tɛɛgbɛdɛlɛ ni, tári fúngo ni, a wi kòro yaà n mɔn.

¹⁷ A fànʔafɔw Sedesyasi tun a be sáà wi yeri. A fànʔafɔw baa wi yíbe làrama ni wi fànʔafɔ-gbaagi ni, níì jo: «A Yawe syɛ́ɛnraa i yaà lé?» A Zyeremii wi yari: «Ɛɛn!» Ní níì jo: «Mɔ a le Babilɔni fànʔafɔw kɔ́yɔ ni.»

¹⁸ A Zyeremii níì fànʔafɔw Sedesyasi pye: «Nyàʔá kapeefelile mii kpéʔele mɔ na, wàlá mɔ falipyebèle na, wàlá syɛ́ɛnbèle naa na, á koro yele kaan a yele mii le kàsow ni?

¹⁹ Sán yele kanyaajoobèle nyɛ, bele pe da ni gi nyuu yele ma lè níì jo: ‹Babilɔni fànʔafɔw a pan yele kánmi na í, wàlá tári naa kánma na í?›

²⁰ Tɔ́ɔliw ni, ni kàfɔlɔ mɔ wi lè fànʔafɔw, mii i mɔ nyɛ́ɛri, ki n yɛlɛ mi lóʔo, ki n yɛlɛ mii nyɛ́ɛrigbɔɔgi í jée mɔ ni! Mɔ a ní kɔ́ mii lúrugo tórigo Zyonatan kpaʔa ma í, wi lè sɛ́bɛkanw, jàngó mii a kɔ́ kùu yaà í!»

²¹ Lǎli bee ni a fànʔafɔw Sedesyasi gi joo n gbàn níì jo pe Zyeremii yaʔa wi pye kàsokpaagi kàcoolo ni, páā búru nibin kaangi wi ma canʔa o canʔa, wee wi a yìri búrukpumɔnbèle kàlari-kólogo ma lè, fwɔɔ bi taa búruw myɛ í ba kwɔ́ɔ kěgi ni. Kánmi bee na Zyeremii kòro kàsokpaagi kàcoolo ni.