Zyeremii 35 - Cebaara Bible 2010

Zyeremii ní Erekabi narigi wòolo

¹ Yawe syɛ́ɛnri di nan Zyeremii na lè Zyozyasi jáaw Yehoyakimi lǎli ni, wi lè Zyuda fànʔafɔw, wi n jo:

² «Da syée Erekabi narigi wòolo ma mi sa joo ní be ní. Mɔ a be kɔ́ri bi kári Yawe kpáagi ma ye sa jée kpaafungaa ni, mí sa dùvɛɛn kaan be ma mí be pye pe wi gbaa.»

³ A mii si wɔ́ɔ baa Yaazanya kɔ́ri wi lè Zyeremii jáaw, Zyeremii wi lè Habasinya jáaw, n fàra wi senyɛnbèle, ní wi jáabèle myɛ na, gee bee n jo Erekabi narigi wòolo myɛ,

⁴ a mii be kɔ́ri n kári Yawe kpáagi ma, n sáà jée ní be ní Hanan jáabèle kpaafungo ni, wi lè Yigidaliyahu jáaw, wi pye lè Kolocɔlɔɔ syɔ́ɔnw, syɛɛnkpolobèle kpaafungo taana, Syalumi jáaw Maaseyahu, wi pye lè kpaaweeli kɔ̀rɔsiifɔlɔ, woro kpaafungi ǹjoʔo ma.

⁵ A mii sáà dùvɛɛn kasànnyɛngéle tɛ́ʔɛ syɛ́ɛnbèle taana pe nyɛ lè Erekabi kpáagi wòolo, ní yagbaagéle ní, níì be pye: «Ye dùvɛɛnw gbaa!»

⁶ Kàjáa a be mii yari: «Wolo o dùvɛɛn gbo í. Níì cán wolo tóow Yonadabi wi lè Erekabi jáaw, wi n gee naa joo n gbàn wolo ma níì jo: ‹Yele a kɔ́ dùvɛɛn gbaa nyáana í, yele ní yele pìíbèle.

⁷ Yele si a wɔ́ɔ kɔ́ kpaaya faan í, yele a kɔ́ yaliire faala lùgu í, yele a kɔ́ ɛrɛzɛn tírire cɔ́rɔ í, ti tàa a kɔ́ pye yele ma í. Kàjáa fànikpaaya ni yele a pye yele sìíw myɛ ni, koro ga pye yele í kòro sìi na bi mɔn tásaligi na, gee na yele nyɛ lè nibɔɔnnɔ.›

⁸ Gee myɛ wolo tóow Yonadabi joo n gbàn wolo ma lè wi lè Erekabi jáaw, wolo i lúro wi ma. Wolo sìíw myɛ ni wolo o dùvɛɛn gbo í, wolo ní wolo cébèle, ní wolo pìíbèle be lè nǎnbèle, ní cébèle.

⁹ Wolo o kpaaya faanri ni tɛ̀ɛ́n yi ni í, ɛrɛzɛn tírire o nyɛ wolo ma í, wàlá seye í, wàlá yalii-lùgu-tára í.

¹⁰ Fànikpaaya ni wolo nyɛ, gee myɛ wolo tóow Yonadabi joo n gbàn wolo ma lè koro wolo lóʔo ní i gi kpéʔele.

¹¹ Lǎli ni Babilɔni fànʔafɔw Nebukadinezari lúgu n pan tári naa kánma na lè, a wolo gi joo níì jo: ‹Yaa maa wo kári Zyerusalɛmi ma, wo fàn Kalide ye kapɛɛnkpumɔnbèle, ní Sirii ye Kapɛɛnkpumɔnbèle na,› kánmi bee na wolo baa tɛ́ɛn Zyerusalɛmi ni.»

¹² Lǎli bee ni a Yawe syɛ́ɛnri nan Zyeremii na, ti n jo:

¹³ «Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Da syée mi sa gi joo Zyuda nǎnbèle, ní Zyerusalɛmi ye ma, mí be pye: Yele a tamani cò ì, li lè bi yére mii syɛ́ɛnri ni ì?› Yawe wi jo nya.

¹⁴ ‹Pe n Erekabi jáaw Yonadabi syɛ́ɛnri cò, woro wee wi da gi joo n gbàn wi jáabèle ma lè níì jo pe a kɔ́ dùvɛɛn gbaa í, pe ga wɔ́ɔ̀ wàa gbaa í, fwɔɔ n baa nan níjanʔa na. Pe n be tóow syɛ́ɛnrɛ lóʔo, dee wi joo n gbàn lè. Mii si na, mii n joo ní yele ní sìnyére ni, yele si ga lóʔo mii ma í.

¹⁵ Mii n mii falipyebèle myɛ tun yele ma, pe lè kanyaajoobèle, mii n be tun yele ma sìnyére ni pe ba gi joo yele ma si jo: Yele myɛ nibin nibin n yɛlɛ bi láʔa yele kobeeyi na sáā maa. Ye yele nàʔami fàli, yele a kɔ́ yeyɛɛ bwɔɔ kolocɔlɔbèle pèle na bàā kpɔ̀ʔɔrɔli kpéʔele be ma í, ye kòro kánmi bee na tári ni mii kaan yele ma lè, ní yele tóolɛɛbèle ma lè wɔ́ɔgēle. Kàjáa yele ga líiyi cáan í, yele ga lóʔo mii ma í.

¹⁶ Kányɛʔɛ na Yonadabi wi lè Erekabi jáaw, woro jáabèle n be tóow syɛ́ɛnrɛ cò, dee wi joo n gbàn be ma lè, syɛ́ɛnbèle naa si o lúro mii ma í.›

¹⁷ Koro na, Yawe wi lè Kolocɔlɔw, wi nyɛ lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Wéle, wɔʔɔyee myɛ kéele mii joo lè Zyuda ye, ní Zyerusalɛmi ye myɛ kánmi na lè, mii a yi yaʔa yi too be na. Níì cán mii n joo ní be ní, pe ga lóʔo í, mii n be yeri, pe ga syɔɔ í.› »

¹⁸ A Zyeremii Erekabi narigi wòolo pye: «Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Amɛɛ yele yele tóow Yonadabi syɛ́ɛnri lóʔo, dee wi joo n gbàn lè, níì kérigèle myɛ cò, ní i ke myɛ kpéʔele, gele wi joo n gbàn yele ma lè,

¹⁹ gee bee kéele na, Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, wi n syɛ́ɛnri naa joo níì jo: Erekabi jáaw Yonadabi a tée fɔ̀n yòdaʔaya ni, yee yi a ra yèré mii yɛ́ʔɛ ma lè í.› »