Zyeremii 34 - Cebaara Bible 2010

Tundunro Sedesyasi kéeli na

¹ Yawe syɛ́ɛnri di nan Zyeremii na lè, lǎli ni Babilɔni fànʔafɔw Nebukadinezari pan ní wi kapɛɛnkpumɔnbèle myɛ ní lè, ní si i nyɛ tátɛɛyi fànya myɛ nyúngo na, á syɛɛnfeleyi myɛ si i kapɛɛnni kpúmɔn ní Zyerusalɛmi, ní gi tɛ́nɛmi kèye myɛ ní lè, toro di dee naa:

² «Yawe wi lè Isirayɛli Kolocɔlɔw, woro wi syɛ́ɛnri naa joo níì jo: ‹Da syée mi sa gi joo Sedesyasi ma wi lè Zyuda fànʔafɔw, mí wi pye: Yawe wi syɛ́ɛnri naa joo níì jo: Wéle, mii a kěgi naa le Babilɔni fànʔafɔw kɔ́yɔ ni, wi a gi sórigo ní naà ní.

³ Mɔ si na, mɔ a syɔɔ wi kɔ́gi ma í, pe a mɔ cò peemɛ ni bi le wi kɔ́gi ni, mɔ nyapiigèle a le Babilɔni fànʔafɔw wòʔolo ni, yele a yɛ́ɛyi le yeyɛɛ ni wáā nyuu ní mɔ ní, mɔ si kári Babilɔni ma.

⁴ Ki n yɛlɛ mɔ í tɛ́nɛ Yawe syɛ́ɛnri lóʔo Sedesyasi, mɔ wi lè Zyuda fànʔafɔw! Syɛ́ɛnri naa Yawe joo mɔ kéeli na, wi n jo: Pe a mɔ kpóo ní ŋɔsée ní í.

⁵ Yɛɛ̀nyinge na mɔ a kùu, àmɛɛ pe nùndaanna yárira sórigo mɔ tóolɛɛbèle kéele na lè, be pye lè fànʔafɔɔlɔ naa mɔ yɛ́ʔɛ ma, kánmi bee na pe a tàa sórigo mɔ kéeli na, pe a ra mɔ kuugi nyɛnigɛ kpéʔele si gi joo si jo: Ee kàfɔw! Níì cán mii wi syɛ́ɛnri bee joo, Yawe wi jo nya.› »

⁶ A kanyaajoow Zyeremii baa syɛ́ɛnri bee myɛ joo n tɛ̀ɛn Sedesyasi na wi lè Zyuda fànʔafɔw, Zyerusalɛmi ni.

⁷ Koro n gi taa Babilɔni kapɛɛnkpumɔnbèle maa pye ni kapɛɛnni kpúmɔn ní Zyerusalɛmi ní, ní Zyuda kěyi wozanya myɛ ní, yi lè Lakiisyi, ní Azeka, níì cán yoro yi da kòro Zyuda kěyi ni kèniriyi.

Púlobèle kàfɔɔlɔ n be yaʔa níì lúru n be cò

⁸ Yawe syɛ́ɛnri di nan Zyeremii na lè, lǎli ni fànʔafɔw Sedesyasi joogaanna kpéʔele ní Zyerusalɛmi syɛ́ɛnbèle myɛ ní lè, n púlobèle yaʔala kéele jáari be ma.

⁹ Wi n jo syɔɔn o syɔɔn í wi pulonàɔn ní wi pulocaà yaʔa waa syée, pe lè Heburubèle, wàa faala si a ní kɔ́ wi Zyefu-senyɛnnɛ cò bi yaʔa púlori fáli ni í.

¹⁰ Syɛɛnkpolobèle myɛ, ní syɛ́ɛnbèle myɛ pe da pínɛ joogaanni na lè, a be fɔ̀lɔ syɛ́ɛnri na syɔɔn o syɔɔn í wi pulonàɔn ní wi pulocaà yaʔa waa syée, jàngó poro a ní kɔ́ be cò bi yaʔa púlori fáli ni í. A be lóʔo níì be lúrugo n tórigo.

¹¹ Kàjáa koro kàdoʔo ma a pe níì be sɔ̀nguri kàriga, a pe níì be pulonǎnbèle ní pulocebèle lúrugo n pan, bele pe da yaʔa a be kári lè, ní ní baa be kɔ́ri n pye pulobèlē.

¹² Lǎli bee ni a Yawe Zyeremii tun wi syɛ́ɛnri naa joo, ti n jo:

¹³ «Yawe wi lè Isirayɛli ye Kolocɔlɔw, wi n jo: ‹Mii n joogaanna kpéʔele ní yele tóolɛɛbèle ní, cángee na mii be yirige Ezyipiti tári ni lè, púlori kpaʔa ni, níì be pye:

¹⁴ Yɛ̀ʔɛlɛ kɔrɔsiin wóli na, syɔɔn o syɔɔn n yɛlɛ yele ni bi wi Heburu-senyɛnnɛ yaʔa waa syée wɔ́rɔɔ, wee wi baa wiyɛɛ pára wi ma lè. Wi a báara mɔ ma yɛ̀ʔɛlɛ kɔrɔni, mɔ si wi yirige mɔ tɛ́ɛgi ni bi yaʔa waa syée wɔ́rɔɔ. Kàjáa yele tóolɛɛbèle ga lóʔo mii ma í, pe ga líiyi cáan mii kàbangi na í.

¹⁵ Yele si na, níjanʔa, yele maa lúru n pan, yele maa gi kpéʔele a gi sín mii nyɛ́nɛ na, àmɛɛ yele myɛ nibin nibin yele syɛɛnnyɛnbèle yaʔala kéele jáari lè, níì joogaanna kpéʔele mii yɛ́ʔɛ ma kpáagi ni, gee na mii mɛ́ɛgi nyɛ lè.

¹⁶ A yele si níì yele syɛ́ɛnri kàriga, níì mii mɛ́ɛgi faʔa, yele myɛ nibin nibin n níì lúru n pulonǎnbèle ní pulocebèle cò, poro bele yele da yaʔa a be kári lè wɔ́rɔbéle. Yele n níì be kɔ́ri a be pye yele pulonànbēle, ní yele pulocabala.›

¹⁷ Gee bee na Yawe syɛ́ɛnri naa joo níì jo: ‹Yele ga fɔ̀lɔ n lóʔo mii ma í, á syɔɔn o syɔɔn wi senyɛnnɛ, ní wi syɛɛnnyɛnnɛ yaʔa wɔ́rɔɔ í. Awá, mii a ŋɔséew, ní káfalagi yáama, ní kateekpɔɔgi sánʔa yaʔa yele kánmi na, Yawe wi jo nya. Mii a yele kpéʔele fyáakpɔɔrɔ yáriga tári fànya myɛ ma.

¹⁸ Nǎnbèle bele be mii joogaanni kálagi lè, pe si ga joogaanni kèlē foro í, loro lee pe da kpéʔele mii yɛ́ʔɛ ma lè, níì náapiige ceri siin níì foro gi ceriyi nínge ni lè, mii a be le kɔyɔ ni.

¹⁹ Zyuda syɛɛnkpolobèle, ní Zyerusalɛmi syɛɛnkpolobèle, ní nǎnbèle be wòlo lè, ní sáriga-wòlobèle, ní tári syɛ̀ɛnnɛ myɛ be foro náapiigi ceriye lariga ni lè,

²⁰ mii a be le pe nigoobèle kɔ́yɔ ni, bele kɔ́yɔ ni pe be sìikwɔɔri caa lè, pe kúceri a pye lìile nyɛ̀ʔɛni féjɛɛnrɛ, ní tári yaweere ma.

²¹ Mii a Zyuda fànʔafɔw Sedesyasi, ní wi syɛɛnkpolobèle le pe nigoobèle kɔ́yɔ ni, bele kɔ́yɔ ni pe be sìikwɔɔri caa lè, mii a be le Babilɔni fànʔafɔw kapɛɛnkpumɔnbéle kɔ́yɔ ni, poro bele pe wírè núngo yele taana n kári lè.

²² Wéle, mii a gi joo gbàn be ma, Yawe wi jo nya, mii a be lúrugo be pan kěgi naa kurugo, jàngó pe ba too gi na bi gi syɔɔ taa, si gi sórigo ní naà ní. Mii a Zyuda kěyi kàriga tɛɛ̀kalagiga syɛ̀ɛnnɛ fun tɛ́ʔɛ.› »