Zyeremii 31 - Cebaara Bible 2010

¹ Yawe n jo: «Lǎli bee ni mii a pye Kolocɔlɔɔ Isirayɛli narigbaayi myɛ ma, pé pye mii syɛ́ɛnbèle.»

Isirayɛli wogorobèle lúrubanna

² Yawe wi syɛ́ɛnri naa joo níì jo: «Syɛ́ɛnbèle bele be syɔɔ ŋɔséew ma lè, pe n kpɔʔɔrɔ taa fìími tára ni. Isirayɛli i táanri ni syée wi ŋɔ́ndaali ma.»

³ Yawe i wiyɛɛ dèé mii na léelige, níì jo: «Mii n bàngwɔɔ tàmaga le ní mɔ ní. Koro na mii mii funjǎngi kɔn mɔ kabangi na.

⁴ Mii a ní mɔ faan, mɔ a ní faan, nàngeele sinján Isirayɛli! Mɔ tamabèle a ní pye mɔ fereri. Mɔ a ní yiri bi pye yɔ́ɔfɔbèle bele nínge ni be nyɛ lè fundaanra na.

⁵ Mɔ a ní ɛrɛzɛn tírire cɔ́rɔ Samarii nyanbeleyi na. Tiicɔ́rɔbèle a ní da tíiri cɔ́rɔ, sáā yasanri coo.

⁶ Níì cán cangaa i maa, gee ni kɔ̀rɔsiifɔbèle a yákpogèle wáa lè Efirayimi nyanbeleyi na, si jo: ‹Ye yìri wo lúgu wo kári Siyɔn ma, Yawe ma wi lè wolo Kolocɔlɔw.›

⁷ Níì cán Yawe wi syɛ́ɛnri naa joo níì jo: ‹Yaa ŋúu gbanʔama Zyakɔbi kéeli na ní fundaanra ní. Yaa mugurumɔ yákpogéle wáa gbanʔama syɛɛnfeleyi wogbɔɔɔ kéele na! Ye yele yákpogèle yaʔa kaa lúro, yaa sòololi kpéʔele, ye jo: Yawe, mɔ syɛ́ɛnbèle syɔɔ, pe lè Isirayɛli wogorobèle!

⁸ Wéle, mii n be yìrige yaà solomɔkulo tári ma a be lúru n pan, mii n be láa yaà tári láʔagéle ma n kpóʔoro. Fúunbèle ní tɔyaayi fɔ̀ɔlɔ i nyɛ be níngi ni n fàra cébèle bele na be nyɛ lè fícarigèle fɔ̀ɔlɔ, ní bele be nyɛ seeli na lè, poro myɛ bìnɛw. Syɛɛnnɛʔɛmɛ pi lúru ni maa nɛɛ naa.

⁹ Pe i nyaan ni maa, mii si i maa ní be ní pe nyɛ́ɛrigboloyi nínge ni. Mii i syée ní be ní lǒyi ma yi fóo lè, kojànga ni, gee ni lè pe a gbǎn kpírige í. Níì cán mii i nyɛ Tofɔlɔ Isirayɛli ma, Efirayimi si i nyɛ mii pìiseliw.

¹⁰ Syɛɛnfeleyi, ye Yawe syɛ́ɛnri lóʔo, yáā di jáari lǒgi nínge tátɛɛgéle ni ke lè léelige! Yaa gi nyuu yé jo: Wee wi Isirayɛli ye cariga lè, wi a ní be kpóʔoro, sáā be kpáaw wéle àmɛɛ bànaʔaɔ nyɛ, wee wi wi yaweeri kpáa wéle lè.

¹¹ Níì cán Yawe n Zyakɔbi nyúngi syɔɔ, wi n wi yirige wàa kɔ́lɔ ni wee wi nìri n sɔ̀lɔ wi na lè.

¹² Pe a pan si ba ra fundaanra yákpogéle wáa Siyɔn ǹjoʔo ma tɛ́ɛgi ni. Pe a kabi fala Yawe yacanri ma, ti lè bilew, ní dùvɛɛnfɔnw, ní sǐnmi, ní yaweeyiligèle, ní yaweekpologèle. Pe fúnyi a pye àmɛɛ nángwɔɔ nyɛ, wee be fɔɔn lè, pe a ní fàngwɔɔrɔ cán í.

¹³ Lǎli bee ni nàngeele sinján pìcaa a ra fundaanra kpéʔele yɔ́ɔli na, nígɔcaribèle, ní nànlɛɛbèle wɔ́ɔgēle. Mii a be kùu káyaagi kàriga mugurumɔ, mii a be kpɛʔɛlɛ. Mii a fundaanra kaan be ma pe fɔ̀rɔyi sìndɛʔɛ ni.

¹⁴ Mii a sáriga-wòlobèle tín kaasǐnmi na. Mii yacanri a mii syɛ́ɛnbèle tín.» Yawe wi jo nya.

¹⁵ Yawe wi syɛ́ɛnri naa joo níì jo: «Pe i yákpogéle wáama lúro Arama ni. Sùpiipeegéle wáama bii. Arasyɛli wi nyaan wi pìíbèle kéele na. Wi si ga fɔ̀lɔ wàa í woro kpɛʔɛlɛ í, níì cán pe ní o yaà í.»

¹⁶ Yawe wi syɛ́ɛnri naa joo níì jo: «Mɔ supiiwáari nyɛnigɛ yaʔa, mɔ nyatinmi tùuni mɔ nyapiigèle na. Níì cán sàra a kaan mɔ kapyegèle kéele na,» Yawe wi jo nya. «Nigoow tára má pe a yìri bi lúru pan.

¹⁷ Sɔ̀ngumɔ tɛɛtaʔaga i nyɛ mɔ nyɛʔɛnaw kéele na,» Yawe wi jo nya, «mɔ piibèle a lúru pan pe tiimaa tári ma.

¹⁸ Mii i Efirayimi nyɛni-mí-peeleli lúro: ‹Mɔ n mii wɔʔɔ, a mii wɔʔɔ àmɛɛ náapiige nyɛ, gee gi lè ki da kóro í. Ki yaʔa mii í lúru pan, mii a lúru pan. Níì cán mɔ Yawe wi nyɛ mii Kolocɔlɔw.

¹⁹ Mii kolo-lúrugwɔɔli kàdoʔo ma, a mii kàdoʔo wáa mii kapeegèle ma. Amɛɛ mii niyɛɛ ján lè, a mii i mii ceekpɔɔli kpúmɔn, mii maa nyìn fɛ̀ɛ́ri ní fyáari na, Níì cán mii cárimi làla faʔara i nyɛ mii na tugoro.›

²⁰ A Efirayimi i nyɛ lé jaafɔwaa, wee kéele li kpɔ́ʔɔ mii ma lè, pìiwaa, wee kéele li mii dɛ́nɛ lè gbanʔama? Níì cán àmɛɛ mii nyuu wi kéeli na lè, ànbée wi kéeli sɔ̀ngurɔ kpɔ́ʔɔgi mii fúngi ni. Mii fúngi yárira i cɛ̀lɛ́ mii ni wi nyɔɔmi kéele na, mii a tɔ̀nɔ́ nyinimɛ taa wi na,» Yawe wi jo nya.

²¹ «Mɔ fɛɛw yáriya yérige, mɔ tiikóriyi yérige, da kɔ̀rɔsíi kólogi na, kozɔ̀lɔgi na, gee ni mɔ táanri lè. Lúru maa maa, nàngeele sinján Isirayɛli, lúru maa maa kěyi naa ma yi nyɛ lè mɔ wóyi.

²² Làlìí ni mɔ a láʔa nya curugo-mí-màʔaw na, calipii-niceele? Níì cán Yawe i yafɔngɔ kpéʔele tári na. Céw n lúru ni nǎnw caa!»

Isirayɛli lúruvaanni ní joogaanvɔnni kéele

²³ Nyɛ̀ʔɛni Sùlasiibéle Kafɔlɔ Yawe wi lè Isirayɛli Kolocɔlɔw, woro wi syɛ́ɛnri naa joo níì jo: «Dee pe a ní da nyuu lè Zyuda tári, ní wi kěyi ni lè, lǎli ni mii ga pe wojo-mí-káribèle lúrugo n pan lè, toro di nyɛ dee naa, pe a ra gi nyuu si jo: ‹Ki n yɛlɛ Yawe í dùbaw taʔa mɔ na, sínni tɛɛkòrogo, ní cǎnmi nyanbelege!›

²⁴ Nɛɛ bee Zyuda a tɛ́ɛn ní wi kěyi myɛ ní n fàra tèfalabèle na, ní bele be syée ni máari ní yaweeri gboolo ní lè.

²⁵ Níì cán wee fúngo fanʔa gi kwɔ́ɔ lè mii i gi nyíngi, ní fúngee ni kateegi ga dígi lè mii n gi tín.»

²⁶ N fàra gee bee na mii yìri ŋúnɔmi na lè, a mii gi nyaa mii ŋúnɔmi maa tɛ́nɛ!

²⁷ «Wéle, canyaa i maa,» Yawe wi jo nya, «yee ni mii a lùguro lùgu Isirayɛli kpáagi, ní Zyuda kpáagi ni lè. Lùguri bee a pye syɛ̀ɛnnɛ ní yaweere.

²⁸ Amɛɛ mii da yɛʔɛ̀ wáa be ma n be kíle n kɔ́nɔgi, n be kpúmɔn n cáan, n be kálagi, n be kpóo, n kapeʔe taʔa be na lè, kánmi bee na mii a yɛʔɛ̀ wáa be ma bi be faan, bi be cɔ́rɔ,» Yawe wi jo nya.

²⁹ «Cányi bee ni pe a ní da gi nyuu kánmi naa na í si jo: ‹Tofɔbèle n ɛrɛzɛn-nìgbere kún, á jaafɔbèle gànʔana tanʔa be na í.›

³⁰ Kàjáa syɔɔn o syɔɔn a kùu wi tiimaa kolomi kéele na. Nǎnwee faala wi ga ɛrɛzɛn-nìgbere kún lè, woro gǎngèle ke a tanʔa wi na.

³¹ Wéle, canyaa i maa, Yawe wi jo nya, yee ni mii a joogaanvɔnnɔ kpéʔele lè ní Isirayɛli kpáagi, ní Zyuda kpáagi wòolo ní.

³² Joogaannee mii da kpéʔele ní be toolɛɛbèle ní lè, cángee na mii be cò kɔ́yi na n yirige Ezyipiti tári ni lè, loro félege ban li a pye í, pe n joogaanni bee kálagi, àlí n gi taa mii n pye be tamafɔw,» Yawe wi jo nya.

³³ «Kàjáa joogaanni mii a kpéʔele ní Isirayɛli kpáagi wòolo ní lè cányi bee kàdoʔo ma, loro li nyɛ lee naa,» Yawe wi jo nya, «mii a mii làlwaw lége be fúnyi ni, mii a wi sɛ́bɛ pe zɔ̌nbèle na, ki a ní pye kàdɛnɛgɛ kàlagorigēle na í. Mii a pye be Kolocɔlɔw, pé pye mii syɛ́ɛnbèle.

³⁴ Wee naa a ní da wi syɛɛnnyɛnnɛ tama, wàlá wee yaa í da wi senyɛnnɛ tama si jo: ‹Ki n yɛlɛ ye Yawe cán í.› Níì cán pìíbèle ní wolɛɛbèle myɛ a ba mii cán,» Yawe wi jo nya. «Níì cán mii a be kolomi kùsulugo syɔɔ, mii a ní sɔ̀ngí taa be kapeegèle na nyáana í.»

³⁵ Yawe wi syɛ́ɛnri naa joo, woro wee wi cángi télege lè kaa gbɛ̀ɛnmɛ yirigi cángi làla ni, n wɔ́ɔ̀ yégi ní ŋɔripiigèle télege kaa gbɛ̀ɛnmɛ yirigi yébiligi làla ni, woro wi sólomi lɔ̀ʔɔ tugu ni yìrigí, ni gi kùnguruyi kàfulogo kpéʔele, woro wee mɛ́ʔɛ gi nyɛ lè Yawe wi lè Nyɛ̀ʔɛni Sùlasiibéle Kafɔlɔ,

³⁶ wi n jo: «Kajoogèle bee ga gbàn n kwɔ́ɔ mii yɛ́ʔɛ ma, Isirayɛli yòdaʔagi a wɔ́ɔ gbǎn kwɔ́ɔ mii yɛ́ʔɛ ma gi kòro nya, pe a ní pye syɛɛnfelege mii yɛ́ʔɛ ma í.»

³⁷ Yawe wi syɛ́ɛnri naa joo níì jo: «Nyɛ̀ʔɛgèle ge lè ǹjogi ni, kapye ke a gbǎn tímana, tári di lè táàma, kapye ti kàpɔɔnbèle a gbǎn sɛʔɛ bi cán, lǎli bee ni mii a Isirayɛli yòdaʔagi wòolo myɛ wáa, gee myɛ kéele na be kpéʔele mii na lè,» Yawe wi jo nya.

³⁸ «Wéle, canyaa i maa,» Yawe wi jo nya, «yee ni kěgi a ní faan Yawe ma lè, bi séli yaà Hananeyɛli kpaataʔa-tɔ́nɔgi na bi sa nan Jɛ̀ɛ́nni kpàánweele na.

³⁹ Yatimana mɛ́ɛnni a ní sánʔa bi sín cérire bi sa nan Garebi dǎndamagi na, si ní kári bi sa nan Gowati na.

⁴⁰ Kúbèle jǐnlɔgɔ myɛ, ní cɔ́ɔngi jǐnlɔgɔ, ní tɛɛwaayi myɛ bi kári fwɔɔ sa nan Sedurɔn gòrógoroweegi na, si ní kári fwɔɔ sa nan Syɔ́ɔnyi kpàánweele jɛɛnnɛ na, canʔafolomɔ ma, tɛ́ɛyi bee myɛ a yaʔa kɔlɔ̀ na Yawe ma, yi a tée gbǎn too wàlá bi kálagi í.»