Zyeremii 30 - Cebaara Bible 2010

Kolocɔlɔɔ nyɔɔfaligi Isirayɛli fǎngi kéele na

¹ Yawe syɛ́ɛnri di nan Zyeremii na lè, ti n jo:

² «Yawe wi lè Isirayɛli Kolocɔlɔw, wi n jo: ‹Syɛ́ɛnree myɛ mii joo mɔ ma lè, ti sɛ́bɛ sɛ́bɛ ni.

³ Wéle, canyaa i maa,› Yawe wi jo nya, ‹yee ni mii a mii syɛ́ɛnbèle yaʔa pe lúru pan lè, bele be cò n kári lè, pe lè Isirayɛli ní Zyuda wóbèle,› Yawe wi jo nya. ‹Mii a be lúrugo ba lége tári ni, dee mii kaan be toolɛɛbèle ma lè, pe a ba di taa di pye be worò.› »

⁴ Syɛ́ɛnri naa si Yawe joo Isirayɛli ní Zyuda kéeli na:

⁵ «Yawe wi syɛ́ɛnri naa joo níì jo: ‹Wolo i nyáʔamina supiiwáara lúro, fyáakpɔɔrɔ dii, bɛ̀ɛlɛ ban í.

⁶ Ye yíbege kpéʔele bi gi cán kapye nàɔn n kɔ́ɔ̀ see! Nyàʔá na si mii nǎnbèle myɛ nyaa a be kɔ́yi i nyɛ be sárigèle ni, mɔ a jo cɔlɔɔ wii, wee wi nyɛ seeli na lè? Nyàʔá na yɛɛcɔɔgèle myɛ kánma kàri?

⁷ Wɔʔɔlɔ! Níì cán cángi bee tɔ̀nɔ́ i nyɛ cângbɔʔɔ! Ki felege ga kɔ́ɔ̀ pye í. Fɔ̀rɔgɔ làla lii Zyakɔbi ma, kàjáa wi a yiri gi ni wozyɔɔɔ ní.

⁸ Cángi bee na mii a wi zúuw kabi bi láʔa mɔ yátiiyi na,› Nyɛ̀ʔɛni Sùlasiibéle Kafɔlɔ Yawe wi jo nya, ‹bi mɔ yapwɔɔri sánʔana, nibɔɔnnɔ a ní mɔ kɔ́ri mɔ í ra báara poro ma í.

⁹ Pe a ra báara Yawe be Kolocɔlɔw, ní Davidi ma, wi lè be fànʔafɔw, woro wee mii a yìrige be ma lè.

¹⁰ Mɔ si na, mii falipyew Zyakɔbi, mɔ a kɔ́ ra fɛ̀ɛgí í,› Yawe wi jo nya. ‹Mɔ a kɔ́ ra cɛ̀lɛ́ í, Isirayɛli! Níì cán wéle, mii a mɔ syɔɔ bi yirige yaà táleelire ni, ní mɔ yodaʔayi, bi yi yirige yaà táree ni yi nyɛ lè púlori ni. Zyakɔbi a ní lúru pan, wi a ba pye ŋɔ́ndaala na, si wɔ́ɔ tɛ́ɛn sági, syɔɔn faala a ní pye yaà bàā be tɔ́ɔrɔ í.

¹¹ Níì cán mii i nyɛ ní mɔ ní, bàā mɔ syoo,› Yawe wi jo nya. ‹Mii a syɛɛnfeleyi myɛ kálagi kwɔ́ɔ, yee nínge ni mii mɔ nɛnɛ n tórigo lè, kàjáa mɔ na, mii a mɔ kálagi kwɔ́ɔ í. Mii a mɔ wɔʔɔ bi yɛlɛ ní gee ní gi sín lè, mii a gbǎn mɔ yaʔa sìnwɔʔɔ ni í.›

¹² Yawe wi syɛ́ɛnri naa joo níì jo: ‹Mɔ kpaligi i nyɛ kpàlinaa-sìnbɔʔɔgɔ, mɔ námigi i nyɛ namipeʔe.

¹³ Wàa faala ga taa bi mɔ kéeli yáa í, koro ga pye bi mɔ námigi pwɔɔ í. Tiindaanma a taa mɔ kéeli na í.

¹⁴ Bele myɛ mɔ kéeli da dɛ́nɛ lè, pe n fɛ̀ʔɛ mɔ na, pe ní o mɔ caa í, ncan mii n mɔ kpúmɔn àmɛɛ nigoò kpúmɔn lè, mii n mɔ wɔʔɔ fungbanga ni, mɔ kakolobyeri nɛʔɛnɛ ní mɔ kapeegèle péemɛ kéele na.

¹⁵ Nyàʔá na mɔ yákpoli wáa mɔ kpaligi kéele na, ní mɔ yayaanaa-sìnbɔʔɔgi kéele na? Mɔ kakolobyeri nɛʔɛnɛ kéele, ní mɔ kapeegèle péemɛ kéele na mii koro kpéʔele mɔ na.

¹⁶ Koro na bele myɛ pe mɔ káa lè, pe a be káa, mɔ wɔʔɔfɔbèle myɛw, pe myɛ a kári púlori na. Bele pe mɔ kɔ́lɔ yáriri syoo mɔ na lè, pe kɔlɔ̀ yáriri a wɔ́ɔ syɔɔ be na, bele myɛ pe mɔ yáriri koli lè, mii a wɔ́ɔ gi yaʔa pe yáriri í koli.

¹⁷ Níì cán mii a ní mɔ céri kàriga wovɔnrɔ ní, mii a mɔ námiyi pɔʔɔ,› Yawe wi jo nya. ‹Níì cán pe i mɔ yiri céw be nɛnɛ lè, Siyɔn wii, wàa o caa wi na í.›

¹⁸ Yawe n syɛ́ɛnri naa joo níì jo: ‹Wéle, mii a Zyakɔbi fànikpaayi wojo-mí-káribéle lúrugo bi pan, wi tɛɛkòroyi nyínimɛ i nyɛ mii na. Kěgi a ní faan ki gurubɛɛlɛɛri na, kpaakpɔɔgi a ní faan gi tɛ́ɛgi ni.

¹⁹ Bariga kaanna ní fundaanra yákpolo a ra yìrigí be níngi ni. Mii a be nɛʔɛ pe a tée cɛ́rɛ í, mii a be kpɔ́ʔɔ, pe a pye yafaʔagéle í.

²⁰ Pe pìíbèle a pye àmɛɛ ki da pye lè booma ni, pe syɛɛnfelegi a kòro beè mii yɛ́ʔɛ ma, mii a keele tɛ́ʔɛ pe wɔʔɔfɔbèle myɛ na.

²¹ Pe kùndigiw a yiri pe tiimaw ni, wee wi a tɛ́ɛn pe nyúngi na lè, wi a yiri pe tiimaa níngi ni. Mii a wi yaʔa wi nùuni, wi a pan mii ma. Níì cán wìí wi a wi nyúngi waʔa bi nùuni mii na?› Yawe wi jo nya.

²² ‹Yele a pye mii syɛ́ɛnbèle mii si pye yele Kolocɔlɔw.› »

²³ Wéle, Yawe káfalakpɔɔgi n yìri, fundanʔagbɔɔri n folo n yiri, káfalabingaʔa gii, ki i céregi syɛɛnpeebèle nyúnyo ni.

²⁴ Yawe fundanʔari káfugbanga a tée kolo lúru í, fwɔɔ bi taa wi ba di foro, bi taa wi wi fúngi katimanagéle foro. Làrigèle kwɔ́ɔmɔ na, yele a gi kɔ́rɔw cán.