Zyeremii 3 - Cebaara Bible 2010

Nànjaabeʔe céw

¹ Yawe n jo: «Lǎli ni nàɔn ga wi cɔɔ̀ yaʔa lè, á wi yiri wi tɛ́ɛgi ni n sáà pye nànwaa nikwɔɔ cɔ́ɔ, a wi nànzeliw a ní gbǎn ba wi láa lé? Tári naa a nɔ́nʔɔ péw ì? A mɔ, mɔ wee wi miyɛɛ bye lè nànjaacɔɔ̀ ní nànbēle saʔa ní, mɔ si ní ba lúru pan lé mii ma?» Yawe wi jo nya.

² «Mɔ nyapiigèle yìrige mi le dǎndama-wɔlɔgɔyi ni maa wéle! Tɛɛgìí gi yaà, beè lè mɔ ga miyɛɛ gaan í? Mɔ maa pye yaà wodɛ́ɛɔn ní kólogi nyɔ́ɔ na be kéeli na àmɛɛ arabuo nyɛ lè fìími tára ni, a mɔ tári nɔ́nʔɔ mɔ nanjaari, ní mɔ naʔabeemi báriga ni.

³ Koro na zěyi wɔ́ɔ̀ yére, zěseligi ga too í. Nànjaacɔɔ̀ gbáala n pye mɔ na, ki fɛ̀ɛrɛ ga mɔ taa í.

⁴ Tɔ́ɔliw ni, mɔ i yákpoli wáa mii kurugo ni gi nyuu níì jo: ‹Mii Tóow, mɔ wi nyɛ mii cárimi làla tàannyɛnnɛ.› Anbée ban gi nyɛ ì?

⁵ A wi a wi fundanʔari kɔn lé bi yaʔa nya? Wi a kòro lé nya di na làla o làla? Koro si mɔ da ni nyuu. Kàjáa kapeʔe mɔ kpéʔele, a gi fǎngi wɔ́ɔ̀ pye mɔ ni.»

Isirayɛli wi lè cêkalagiga, ní Zyuda wi lè námarafɔw

⁶ A Yawe gi joo mii ma fànʔafɔw Zyozyasi lǎli ni níì jo: «Gee cêkalagigi Isirayɛli kpéʔele lè, a mɔ gi nyaa lé? Wi n kári nyanbe-nyundɔnɔyi myɛ ma, ní tiipiriyi myɛ láara ma, n sáà kanɔnʔɔri kpéʔele yaà beè.

⁷ Mii maa ni gi nyuu niyɛɛ ma níì jo: Wi ga kérigèle bee myɛ kpéʔele n kwɔ́ɔ wi a ní lúru pan mii ma. Kàjáa, wi ga lúru n pan í. Wi senyɛnjew Zyuda wi lè námarafɔw, woro n pye gi séera.

⁸ Alí àmɛɛ mii Isirayɛli yaʔa lè, wi lè cêkalagiga, wi kanɔnʔɔbyeri myɛ kéele na, níì wi ceyaʔa-sɛ́bɛw kaan wi ma, a mii gi nyaa wi senyɛnjew Zyuda wi lè námarafɔw, woro ga téè fyáa í, a woro wɔ́ɔ̀ kári n sáà kanɔnʔɔrɔ kpéʔele.

⁹ Isirayɛli n tári nɔ́nʔɔ ní wi fɛ̀ɛrɛ fun nàʔabeemi ní, wi n kanɔnʔɔri pye ní kàdɛnɛgi, ní tíigi ní.

¹⁰ Koro ní ki myɛ ní wi senyɛnjew Zyuda wi lè námarafɔw, woro ga lúru n pan mii ma ní wi fúngi myɛ ní í, jànvaa wi kpéʔele.» Yawe wi jo nya.

¹¹ A Yawe mii pye: «Isirayɛli wi lè cêkalagigi, woro n pɔ́rɔ Zyuda na wi lè námarafɔw.

¹² Da syée mi sa ra yákpoli wáa ní syɛ́ɛnri naa ní solomɔkulo kàbangi na mí jo: ‹Lúru maa maa cêkalagiga Isirayɛli,› Yawe wi jo nya, ‹mii yɛ́ɛgi a ní pye wodanʔaga ní yele na í. Níì cán mii i nyɛ nyinidaaɔ,› Yawe wi jo nya. ‹Mii fúngi a kòro nya wodanʔaga ní làla o làla í.

¹³ Ki n yɛlɛ mɔ í tɛ́nɛ mɔ kolomi cán. Ki cán Yawe mɔ Kolocɔlɔw kánma na mɔ céemi kpéʔele. Mɔ n fàn n kári kàbanyi myɛ na nibɔnbèle kurugo, tiipiriyi myɛ láara ni, yele ga téè mii jóomi lóʔo í.› » Yawe wi jo nya.

Zyuda ye lúrubanni kéele

¹⁴ Ye lúru yaa maa jaafɔ-niceeye, Yawe wi jo nya. Níì cán mii wi nyɛ yele Kàfɔw. Mii a yele láa nibin nibin kěyi ni, bi yele láa siin-ziin nariyi ni, bi yele lúrugo pan Siyɔn ma.

¹⁵ Mii a bànaʔabēle kaan yele ma bi yɛlɛ ní mii fúngi ní, pe a ra yele nàʔá ní cánna, ní yákirii ní.

¹⁶ Lǎli ni yele ga baa nɛʔɛ lè níì yasanra saʔa kpéʔele tári ni, cányi bee ni, pe a ní da nyuu Yawe joogaanna kásu kéele na í, Yawe wi jo nya, syɔɔn a ní da sɔ̀ngí da taagi wi kéeli na í, wi keele a ní da nyuu í, pe a ní da yákirii yaari wi fɔ̀nnɔ kéele na í, pe a ní wàa sámaga í.

¹⁷ Lǎli bee ni pe a ra Zyerusalɛmi yiri «Yawe Fàngoli.» Syɛɛnfeleyi myɛ a ra kpóʔoro yaà Yawe mɛ́ɛgi na Zyerusalɛmi ma. Pe a ní peyɛɛ daʔa pe funbeeyi nàʔagbanma na í.

¹⁸ Cányi bee ni Zyuda kpáagi ní Isirayɛli kpáagi wòolo a pínɛ da táanri, pe a pínɛ yìri solomɔkulo tári ma bi pan táree má mii kaan yele tóolɛɛbèle ma lè kɔrigɔ.

Syɛɛnfele-nikalagigi lúrubanna Kolocɔlɔɔ ma

¹⁹ Mii na, mii maa ni gi nyuu niyɛɛ ma níì jo: Kanmìí na mii a mɔ lége mii jáabèle ni si fundaanra kèlē tára kaan mɔ ma di pye kɔrigɔ, gee gi lè syɛɛnfeleyi fèrecàn-dèlere? Mii maa ni gi nyuu niyɛɛ ma níì jo: Mɔ a ra mii yiri: «Mii tóo!» Mɔ a tée wàli bi lúru mii kurugo í.

²⁰ Kánmee na si cɔlɔɔ wi nàɔn jànváa wee wi kéeli dɛ́nɛ lè, kánmi bee na yele mii jànváa, Isirayɛli kpáagi wòolo, Yawe wi jo nya.

²¹ Yákpolo i lúro dǎndamayi na. Isirayɛli yòdaʔayi wòolo nyɛnimɛ, ní be nyɛ́ɛrigboloyi yii. Níì cán pe n be kólogi ŋánga, pe n fɛ̀ʔɛ Yawe be Kolocɔlɔw na.

²² «Ye lúru yaa maa jaafɔ-niceeye, mii a yele kálagimi kèlē yáama láʔa yele na.» «Wolo wéle bele, wolo i syée mɔ ma, níì cán Yawe, mɔ wi nyɛ wolo Kolocɔlɔw.

²³ Kányɛʔɛ na, kàfulogi gi yìrigí dǎndamayi ní nyanbeleyi ma lè, ki i nyɛ jànvaa. Kányɛʔɛ na Yawe wolo Kolocɔlɔw má Isirayɛli syɔɔli nyɛ.

²⁴ Nlaa yaà wolo cárimi làla ni, Fɛ̀ɛ́ri Yáriga n wolo tóobèle fáli tɔ̀nɔ lìi, wi lè pe yaweeyiligèle, ní be yaweekpologèle, ní be nànbiigèle ní be calipiigèle.

²⁵ Wolo fɛ̀ɛ́ri di nyɛ wolo ma yasinɛgi, wolo faʔari si i nyɛ wolo ma làgogi. Níì cán wolo n kapeele pye Yawe wolo Kolocɔlɔw na, wolo ní wolo tóobèle nlaa yaà wolo cárimi làla ni fwɔɔ n baa nan níjanʔa na, wolo si ga Yawe wolo Kolocɔlɔw jóomɔ lóʔo í.»