Zyeremii 27 - Cebaara Bible 2010

Zyeremii n zúu pari wi yatiigi ni

¹ Yehoyakimi wi lè Zyozyasi jáaw, Zyuda fànʔafɔw, woro fǎngi sélimɛ na, a Yawe syɛ́ɛnri naa nan Zyeremii na kánmi naa na, wi n jo:

² Yawe n syɛ́ɛnri naa joo mii ma níì jo: «Ki n yɛlɛ mi yapwɔɔrɔ, ní zúu sámaga mi taʔa mɔ yátiigi na,

³ mí di tórigo Edɔmi fànʔafɔw, ní Mowabi fànʔafɔw, ní Amɔn ye fànʔafɔw, ní Tiiri fànʔafɔw, ní Siidɔn fànʔafɔw ma, tundunbèle kɔ́yɔ ni, poro bele be pan Zyerusalɛmi ma lè, Zyuda fànʔafɔw Sedesyasi ma,

⁴ ní bele má mɔ a mii tundunri kaan, dee mii joo n gbàn mɔ ma lè, pe sa di joo be kàfɔbèle ma, si jo: ‹Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: Syɛ́ɛnri naa yele a sa joo yele kàfɔbèle ma si jo:

⁵ Mii wi tári sámaga n fàra syɛ́ɛnbèle ní yaweeri na di nyɛ tári na lè, mii fàngbɔɔgi ní mii kɔ̂zánʔagi báriga ni, mii si i tári kaangi wee má ki ga mii dɛ́nɛ bi di kaan lè.

⁶ Tɔ́ɔliw ni, mii a tátɛɛyi bee myɛ le Nebukadinezari kɔ́yi ni, wi lè Babilɔni fànʔafɔw, ní i nyɛ mii falipyeo. Mii n wɔ́ɔ̀ sìnbirigi yaweere kaan wi ma jàngó taa báara wi ma.

⁷ Syɛɛnfeleyi myɛ a ra báara woro, ní wi jáaw, ní wi pìinyanbiigi ma, fwɔɔ bi taa wi tári làla í wɔ́ɔ ba nan, fànnɛʔɛgɛ syɛɛnfelege, ní fànʔafɔ-gbólobéle si wi kɔ́ri waa báara poro ma.

⁸ Syɛɛnfelegaa, wàlá fàngaa ga pye ki ga kiyɛɛ gaan Nebukadinezari ma í, wi lè Babilɔni fànʔafɔw, n gi yátiigi kaan Babilɔni fànʔafɔw zúu ma í, mii a keele tɛ́ʔɛ syɛɛnfelegi bee na ní ŋɔséew, ní kateekpɔɔgi, ní káfalagi yáama ní, Yawe wi jo nya, fwɔɔ bi taa mii í gi kwɔ́ɔ yirige yaà ní wi kɔ́gi ní.

⁹ Yele doò, yele a kɔ́ ra lúro yele kanyaajoobèle, ní yele kanyaabèle, ní yele tiimaa ŋúnɔyi, ní yele kacánbèle, ní yele cɛ́lɛfɔbèle ma í, poro bele pe gi nyuu yele ma lè níì jo: Yele a tée pɔ́rɔtɔɔrɔ kpéʔele Babilɔni fànʔafɔw ma í!

¹⁰ Níì cán jànvaa kérigèle be nyaagi ni nyuu yele ma, jàngó bi yele léeli yele tári na, koro ga pye mii í yele yirige yaà yele í kùu.

¹¹ Syɛɛnfelegee si ga gi yátiigi kaan Babilɔni fànʔafɔw zúu ma, ni báara wi ma lè, mii a gi yaʔa gi tiimaa tári ni, koro ga pye kaa di fála si tɛ́ɛn di ni,› » Yawe wi jo nya.

¹² A mii syɛ́ɛnri naa wonijanra joo kélemi Zyuda fànʔafɔw Sedesyasi ma kánmi naa na, níì jo: «Ye yele yátiiyi kaan Babilɔni fànʔafɔw zúu ma, yaa báara wi ma, woro ní wi syɛ́ɛnbèle, yele a kòro sìi na.

¹³ Nyàʔá na gi yɛlɛ yele í kɔ́ kùu, mɔ ní mɔ syɛ́ɛnbèle, ŋɔséew, ní kateekpɔɔgi, ní káfalagi yáama báriga ni, àmɛɛ Yawe gi joo lè syɛɛnfelegi kéele na, gee ki ga pye lè ki ga kiyɛɛ gaan Babilɔni fànʔafɔw ma í?

¹⁴ Kanyaajoobèle bele be gi nyuu yele ma lè níì jo: ‹Yele a tée báara Babilɔni fànʔafɔw ma í!› Yele a kɔ́ be syɛ́ɛnri lóʔo í. Níì cán kérigèle be nyaagi ni nyuu yele ma lè jànvaa wii.

¹⁵ ‹Mii ga be tun í, pe si i jànvaaw kèlē nyaagi ni nyuu mii mɛ́ɛgi na, koro ga pye mii í yele nɛnɛ bi yirige yaà, yele si kùu, yele ní yele kanyaajoobèle be jànvaaw kèlē nyaagi ni nyuu lè,› » Yawe wi jo nya.

¹⁶ A mii gi joo kánmi naa na sáriga-wòlobèle, ní syɛ́ɛnbèle naa myɛ ma níì jo: «Yawe n jo: ‹Yele a kɔ́ yele kanyaajoobèle syɛ́ɛnrɛ lóʔo í, poro bele be kérigèle nyaagi ni nyuu yele ma lè níì jo: Wéle, tɔ́ɔliw ni Yawe kpáagi yárira ti a ní láa yirige yaà dee Babilɔni ma bi pan! Níì cán kérigèle be nyaagi ni nyuu yele ma lè. Ke i nyɛ jànvaa.

¹⁷ Yele a kɔ́ lóʔo be ma í, yaa báara Babilɔni fànʔafɔw ma, yele a kòro sìi na. Nyàʔá na gi yɛlɛ kěgi naa í ba kàri kataʔa?›

¹⁸ Pe ga pye kanyaajoobéle, kapye Yawe syɛ́ɛnri i nyɛ be ma, ki n yɛlɛ pe Nyɛ̀ʔɛni Sùlasiibéle Kafɔlɔ Yawe nyɛ́ɛri, koro ga pye yayigeleri di kòro Yawe kpáagi, ní Zyuda fànʔafɔw kpaʔa, ní Zyerusalɛmi ni lè, ti a kɔ́ kári Babilɔni ma í.

¹⁹ Níì cán Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo gàángèle, ní pɛɛkpɔɔgi, ní yataʔayi kéele na, ní yayigeleri wozanra kéele na di kòro lè kěgi naa ni,

²⁰ dee di lè Babilɔni fànʔafɔw Nebukadinezari da di láa n kári í, lǎli ni wi Zyuda fànʔafɔw Yekonya cò Zyerusalɛmi ni wi pye lè Yehoyakimi jáaw n kári Babilɔni ma, n fàra Zyuda, ní Zyerusalɛmi mɛ́ɛkpoloyi fɔ̀ɔlɔ myɛ na.

²¹ Yawe wi lè Nyɛ̀ʔɛni Sùlasiibéle Kafɔlɔ, wi lè Isirayɛli Kolocɔlɔw, woro wi syɛ́ɛnri naa joo yayigeleri kéele na di kòro Yawe kpáagi, ní Zyuda fànʔafɔw kpaʔa, ní Zyerusalɛmi ni lè, wi n jo:

²² ‹Ti a láa bi kári Babilɔni ma, ti a kòro yaà bi taa cángee na mii a yìri di kéeli na lè, bi di lúrugo di pan, ti ní ba pye tɛ́ɛgi naa ni.› Yawe wi jo nya.»