Zyeremii 26 - Cebaara Bible 2010

Pe i caa bi Zyeremii kpóo

¹ Yehoyakimi fǎngi sélimɛ na, wi lè Zyozyasi jáaw ní i nyɛ Zyuda fànʔafɔw, a Yawe syɛ́ɛnri naa joo n tɛ̀ɛn:

² Yawe n jo: «Yére Yawe kpáagi kadàala na, mí syɛ́ɛnri naa joo bele má be yìrigí Zyuda kěyi myɛ ma ni maa n ba ni tíri ni tuun Yawe kpáagi ni lè. Syɛ́ɛnree myɛ mii joo n gbàn mɔ ma níì jo mɔ í di joo be ma lè, mɔ a kɔ́ syɛɛnkanbilaa nibin fɔ̀n di ni í.

³ Dɔ̀ʔɔ́ pe a lóʔo pe myɛ nibin nibin si láʔa be kobeegi na. Lǎli bee ni mii a mii sɔ̀ngumi láʔa kapeegi na mii da ni sɔ̀ngí bi kpéʔele be na lè pe péemi nàʔabeemɛ kéele na.

⁴ Mɔ a be pye: ‹Yawe wi syɛ́ɛnri naa joo níì jo: Yele ga pye yele ga lóʔo mii ma í, ní i táanri ni yɛlɛgi ní mii làlwaw ní mii tɛ́ʔɛ yele yɛ́ʔɛ ma lè í,

⁵ ní i mii falipyebèle syɛ́ɛnrɛ lúro í, pe lè kanyaajoobèle, poro bele mii tungu yele ma lè, bele mii tungu yele ma lè sìnyére ni, yele si ga lóʔo be ma í,

⁶ lǎli bee ni mii a keele tɛ́ʔɛ kpáagi naa na àmɛɛ mii gi pye Silo na lè, si wɔ́ɔ kěgi naa pye dánga yáriga tári syɛɛnfeleye myɛ ma.› »

⁷ A sáriga-wòlobèle, ní kanyaajoobèle, ní syɛ́ɛnbèle myɛ syɛ́ɛnri bee lóʔo, dee Zyeremii da ni nyuu ni tèé lè Yawe kpáagi ni.

⁸ Lǎli ni Zyeremii kwɔ́ɔ lè syɛ́ɛnri joolo na, dee myɛ Yawe da joo n gbàn wi ma níì jo wi di joo syɛ́ɛnbèle myɛ ma lè, a sáriga-wòlobèle ní kanyaajoobèle, ní syɛ́ɛnbèle myɛ wi cò níì jo: «Mɔ a kpóo wii!

⁹ Nyàʔá na mɔ kérigèle nyaagi ni nyuu Yawe mɛ́ɛgi na níì jo: Kpáagi naa a pye àmɛɛ Silo nyɛ lè, kěgi naa si jaa bi pye syɛ̀ɛnnɛ fun?» A syɛ́ɛnbèle myɛ tìn n kpóʔoro Zyeremii na n wi màʔa Yawe kpáagi ni.

¹⁰ Lǎli ni Zyuda syɛɛnkpolobèle kérigèle bee lóʔo lè, a be yìri fànʔafɔw kpaʔa ma n lúgu n kári Yawe kpáagi ma, ní sáà tɛ́ɛn Yawe kpáagi kpàánweefɔnnɔ na.

¹¹ Lǎli bee ni a sáriga-wòlobèle ní kanyaajoobèle gi joo syɛɛnkpolobèle ní syɛ́ɛnbèle myɛ ma níì jo: «Nǎnw naa n yɛlɛ ní kpóolo ní! Níì cán wi n kérigèle nyaa n joo kěgi naa kánma na àmɛɛ yele gi lóʔo yele tiimaa líiweegèle ni lè.»

¹² A Zyeremii gi joo syɛɛnkpolobèle myɛ, ní syɛ́ɛnbèle myɛ ma níì jo: «Yawe wi mii tun mii í ba kérigèle naa nyaa bi joo kpáagi naa, ní kěgi naa kánma na, syɛ́ɛnri myɛ yele lóʔo lè.

¹³ Tɔ́ɔliw ni, ye yele kóloyi, ní yele nàʔaganmi fàli, ye Yawe jóomi lóʔo wi lè yele Kolocɔlɔw. Yawe a wi sɔ̀ngumi láʔa kapeegi na, gee wi joo yele kéeli na lè.

¹⁴ Gee si gi mii kéeli kwɔ́ɔ lè, mii wi wee yele kɔ́yi ni. Ye gi kpéʔele mii na gee gi nyɔɔ lè níì sín yele nyɛ́nɛ na.

¹⁵ Gee si gi nyɛ gi ni lè, koro gi nyɛ ki n tɔ̀nɔ n yɛlɛ ye gi cán yele ga mii kpóo, yele n tɛɛlɛ fun sìsyaan kapeele túgoro taʔa yele, ní kěgi naa, ní gi syɛ́ɛnbèle na. Níì cán kányɛʔɛ na Yawe wi mii tun yele ma mii í ba syɛ́ɛnri naa myɛ joo bi le yele líiweegèle ni.»

¹⁶ Lǎli bee ni a syɛɛnkpolobèle, ní syɛ́ɛnbèle myɛ binɛw gi joo sáriga-wòlobèle ní kanyaajoobèle ma níì jo: «Nǎnw naa ga tɔ̀nɔ n yɛlɛ ní kpóolo ní í! Níì cán wi n joo wolo ma Yawe wolo Kolocɔlɔw mɛ́ʔɛ na.»

¹⁷ A tári wolɛɛbèle pèle yìri n gi joo syɛ́ɛnbèle myɛ ma pe da kpóʔoro lè, níì jo:

¹⁸ «Mika wi pye lè Moresyɛti ye wów, wi maa ni kérigèle nyaagi ni nyuu Zyuda fànʔafɔw Ezekyasi lǎli ni, ní i gi nyuu Zyuda syɛ́ɛnbèle myɛ ma, níì jo: ‹Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: Siyɔn a fála àmɛɛ seʔe nyɛ lè. Zyerusalɛmi a pye kàdɛnɛgboolo, kpɔ̀ʔɔrɔli kpaʔa nyanbelege si pye dǎndamaga, gee kɔligɔ tɔ́n lè.›

¹⁹ A Zyuda fànʔafɔw Ezekyasi ní Zyuda ye myɛw wi kpóo lé? Ezekyasi ga fyáa Yawe na ì? Wi ga Yawe nyɛ́ɛri gbanʔama ì? Lǎli bee ni a Yawe wi sɔ̀ngumi láʔa kapeegi na wi da joo be kéeli na lè, á wolo si i caa bi kapeekpɔɔgi naa kpéʔele woyɛɛ na!»

Yehoyakimi n be pye a be kanyaajoow Uriyahu kpóo

²⁰ Nànwaa nikwɔɔ maa wɔ́ɔ ni kérigèle nyaagi ni nyuu Yawe mɛ́ɛgi na, woro wi pye Syemayahu jáaw Uriyahu, wi pye lè Kiiriyati-Yeyarimi ye wów. Wi maa kérigèle nyaa n joo kěgi naa kánma na, ní tári naa kánma na, syɛɛnjóoraa ni, dee ti da tɔ̀nɔ n pye lè sèjira ní Zyeremii wóri ní.

²¹ A fànʔafɔw Yehoyakimi, ní wi sànbalipɔbèle myɛ, ní wi syɛɛnkpolobèle wi syɛ́ɛnri lóʔo, a fànʔafɔw i wi caa bi kpóo. A ki ga joo Uriyahu ma, a fyáari wi cò, a wi fàn n kári Ezyipiti ma.

²² A fànʔafɔw Yehoyakimi syɛ̀ɛnnɛ tun Ezyipiti ma, poro be pye Akibɔɔri jáaw Elinatan, ní syɛ́ɛnbèle pèle, bele wi tórigo ní wi ní lè Ezyipiti ma.

²³ A be sáà Uriyahu cò n yirige Ezyipiti ni n pan ní wi ní fànʔafɔw Yehoyakimi ma, a wi baa wi kpúmɔn n kpóo ní ŋɔséew ní, níì wi kúceri wáa syɛ́ɛnmi nyangbaa ni.

²⁴ Lǎli bee ni Ahikami wi lè Syafan jáaw, a woro Zyeremii syɔɔ, níì kéeli bee sàa jàngó pe a kɔ́ wi le syɛ́ɛnbèle kɔ́yɔ ni pe wi kpóo í.