Zyeremii 25 - Cebaara Bible 2010

Kolocɔlɔɔ syɛ́ɛnri joolo yɛ̀ʔɛlɛ toko ní taanri fúngo ni

¹ Syɛ́ɛnree di nan Zyeremii na lè Zyuda syɛ́ɛnbèle myɛ kéele na, Zyuda fànʔafɔw Yehoyakimi fǎngi yɛ̀ʔɛlɛ sicɛrɛ wóli na wi pye lè Zyozyasi jáaw, toro di nyɛ dee naa. Koro n pye Babilɔni fànʔafɔw Nebukadinezari fǎngi yɛɛzelile na.

² Toro Zyeremii joo Zyuda syɛ́ɛnbèle myɛ kéele na, ní Zyerusalɛmi ye myɛ yɛ́ʔɛ ma níì jo:

³ Nlaa yaà Amɔn jáaw Zyozyasi fǎngi yɛ̀ʔɛlɛ kɛɛ ní taanri wóli na, wi lè Zyuda fànʔafɔw fwɔɔ n baa nan níjanʔa na, ki yɛ̀ʔɛlɛ toko ní taanri wi wee, àmɛɛ Yawe syɛ́ɛnri nan mii na lè, a mii di joo n taʔala yele ma sìnyére ni yele si ga lóʔo í.

⁴ Yawe n wi falipyebèle myɛ tun yele ma, pe lè wi kanyaajoobèle, wi n be tun yele ma sìnyére ni, yele si ga lóʔo í, yele ga líiyi cáan bi lóʔo í.

⁵ Pe maa ni gi nyuu níì jo: «Ye myɛ nibin nibin n yɛlɛ bi láʔa yele kóbeeyi na, ní yele nàʔabeemi na, yele si kòro tári ni, dee Yawe kaan yele ma, ní yele tóolɛɛbèle ma lè, di kòro yele wóro làla o làla kwɔ́ɔmɔ fun.

⁶ Yele a kɔ́ yeyɛɛ bwɔɔ kolocɔlɔbèle pèle na bàā kpɔ̀ʔɔrɔli kpéʔele be ma í, sáā tíri bàā tuun pe yɛʔɛ̀ ma í. Yele a kɔ́ mii fúngi tanʔa ní yele kɔ́yi fáli ní í, koro ga pye mii a kapeʔe faala kpéʔele yele na í,

⁷ kàjáa yele ga lóʔo mii ma í,» Yawe wi jo nya, «koro ga pye bi mii fúngi tanʔa ní yele kɔ́yi fáli ní, jàngó bi wɔʔɔgɔ taʔa yeyɛɛ na.»

⁸ Koro na Yawe syɛ́ɛnri naa joo, wi lè Nyɛ̀ʔɛni Sùlasiibéle Kafɔlɔ, níì jo: «Amɛɛ gi nyɛ lè yele ga mii syɛ́ɛnri lóʔo í,

⁹ wéle, mii n tun pe sa solomɔkulo syɛ́ɛnbèle myɛ yeri bi pan,» Yawe wi jo nya, «ní Babilɔni fànʔafɔw Nebukadinezari, wi lè mii falipyew, mii a be yaʔa be pan tári naa kánma na, ní di syɛ́ɛnbèle kánma na, ní syɛɛnfeleyi naa myɛ kánma na yi di màʔa lè, bi ba be kálagi kwɔ́ɔ, bi be pye funwɔɔrɔ yáriga, ní faʔara yáriga, ní bàngwɔɔ yakalagiga.

¹⁰ Mii a mugurumi ŋúnuyo, ní fundaanri ŋúnuyo, ní nìyiliw ŋúnuyo ní pìcaaw ŋúnuyo kwɔ́ɔ yirige be níngi ni, n fàra tíreyi kàfulogo ní fètinni gbɛ̀ɛnmɛ na.

¹¹ Tári naa myɛ a ba kàri kataʔa, ní tɛɛ̀kalagiga, syɛɛnfeleyi naa si sa ra puloro fáli kpéʔele Babilɔni fànʔafɔw ma, bi taa yɛ̀ʔɛlɛ togoye taanri ní kpɔrigɔ.

¹² Kàjáa yɛ́ɛgèle bee togoye taanri ní kpɔrigɔ ga foro lǎli ni lè, mii a keele tɛ́ʔɛ Babilɔni fànʔafɔw, ní syɛɛnfelegi bee na,» Yawe wi jo nya, «pe kakoloyi kéele na, ní Kalide ye tári na, toro dee mii a kálagi lè ki kòro nya làla o làla.

¹³ Syɛ́ɛnree myɛ mii joo n tɛ̀ɛn tári naa kánma na lè, mii a di kpéʔele foro di na, dee myɛ di sɛ́bɛ sɛ́bɛw naa ni lè, ní gee Zyeremii nyaa n joo syɛɛnfeleyi naa myɛ kánma na lè.

¹⁴ Níì cán séekpɔɔɔ fɔɔlɔ, ní fànʔafɔ-gbólobéle a wɔ́ɔ be kɔ́ri paa báara poro ma, mii a be kapyegèle, ní be kɔ́yi fáli sìndɛʔɛ lúrugo be ma.»

Kútiiw yagbaala

¹⁵ Níì cán Yawe wi lè Isirayɛli Kolocɔlɔw, woro wi syɛ́ɛnri naa joo mii ma níì jo: «Yagbaali naa syɔɔ mii kɔ́gi ni, loro lee li nyìn fundanʔari dùvɛɛn na lè, mí syɛɛnfeleyi myɛ kaan yi gbaa li ni, yee má mii mɔ tun lè.

¹⁶ Yi gbaa bàā fági, si pye àmɛɛ nicurobéle nyɛ lè, ŋɔséew kéele na mii tórigo yi níngi ni lè.»

¹⁷ A mii yagbaali syɔɔ Yawe kɔ́gi ni, níì syɛɛnfeleyi myɛ kaan a yi gbaa li ni, yee má Yawe da mii tun lè,

¹⁸ bi séli Zyerusalɛmi, ní Zyuda kěyi, ní wi fànʔafɔbèle, ní wi syɛɛnkpolobèle na bi gi kpéʔele tɛɛ̀kalagiga, ní funwɔɔrɔ yáriga, ní kataanra yáriga, ní dánga yáriga, àmɛɛ gi nyɛ lè níjanʔa,

¹⁹ si nan Faraɔnw na, wi lè Ezyipiti fànʔafɔw, ní wi falipyebèle, ní wi syɛɛnkpolobèle na, ní wi syɛ́ɛnbèle myɛ na,

²⁰ ní canʔajeemɛ ye myɛw na, ní Usi fànʔafɔbèle myɛ na, ní Filisitini tári fànʔafɔɔlɔ myɛ na, ní Asikalɔn na, ní Gaza na, ní Ekurɔn na, ní bele na be kòro Asidɔdi ye ni lè,

²¹ ní Edɔmi ye na, ní Mowabi, ní Amɔn ye na,

²² ní Tiiri fànʔafɔbèle myɛ na, ní Siidɔn fànʔafɔbèle myɛ na, ní lǒgi nínge tára fanʔafɔɔlɔ na, ti nyɛ lè sólomi lɔ̀ʔɔ kàbangee na,

²³ ní Dedan na, ní Tema na, ní Buzi na, ní bele myɛ na pe be kpàkpɛʔɛlɛyi kùún lè,

²⁴ ní Arabii fànʔafɔbèle myɛ na, ní canʔajeemɛ fanʔafɔbèle myɛ na, pe nyɛ lè wodɛ́ɛnbéle ní fìími tára ni,

²⁵ ní Zimirii fànʔafɔbèle myɛ na, ní Elami fànʔafɔbèle myɛ na, ní Mɛdi ye fànʔafɔbèle myɛ na,

²⁶ ní solomɔkulo fànʔafɔbèle myɛ na, bele be nùuni lè ní bele be léeli lè, bi taʔala peyɛɛ na, ní tári fànya myɛ na, yi nyɛ lè tásaligi na. Syesyaki fànʔafɔw si wi a ba gbaa pe kàdoʔo ma.

²⁷ Mɔ a be pye: «Nyɛ̀ʔɛni Sùlasiibéle Kafɔlɔ Yawe, wi lè Isirayɛli Kolocɔlɔw, wi n jo: ‹Ye gbaa ye yele yɛ́ɛyi wɔ́ɔ ye tùgu, ye too, ye si a ní kɔ́ yìri í, ŋɔséew kéele na mii a tórigo yele níngi ni lè!›

²⁸ Pe si ga cée pe ga fɔ̀lɔ bi yagbaali syɔɔ mɔ kɔ́gi ni bi gbaa í, mɔ a be pye: ‹Yawe wi lè Nyɛ̀ʔɛni Sùlasiibéle Kafɔlɔ, wi n jo: A yele a tɔ̀nɔ́ gbaa wii!

²⁹ Níì cán wéle, kěgee na mii mɛ́ɛgi nyɛ lè, koro na mii kálagili séli. A yele, yele si ba kòro lé wɔʔɔgi sìndaa ni? Eʔe. Níì cán mii i ŋɔséew yiri ni wáa tári syɛ̀ɛnnɛ myɛ na,› Yawe wi lè Nyɛ̀ʔɛni Sùlasiibéle Kafɔlɔ woro wi jo nya.

³⁰ Mɔ si na, mɔ a kérigèle naa myɛ nyaa joo be ma si be pye: ‹Yawe i kaana ǹjogi ni. Wi yákpoli i yirigi wi tɛɛkòrojǎngi ni. Wi i kaana gee kánma na gi nyɛ lè wi tɛɛkòrogi. Wi i yákpolo wáa àmɛɛ bele nyɛ pe ɛrɛzɛn tánʔana lè ɛrɛzɛn lɔ́ʔɔ tɛɛnùgugo ni, bele myɛ kánma na pe nyɛ lè tári na.

³¹ Kàfulogi i syée fwɔɔ n sa ni nangi tári láʔala na. Níì cán Yawe i nyɛ kútii na ní syɛɛnfeleyi ní. Wi a kútiiw kúun cere yáriri myɛ na. Wi a syɛɛnpeebèle kaan ŋɔséew ma,› » Yawe wi jo nya.

³² Yawe wi lè Nyɛ̀ʔɛni Sùlasiibéle Kafɔlɔ, wi n jo: «Wéle, wɔʔɔgɔ i yirigi syɛɛnfelegaa ni ni syée syɛɛnfelegaa ma, káfalakpɔʔɔ si i yìrigí tári láʔagéle ma ni maa.»

³³ Bele Yawe a kpóo cángi bee na lè pe a pye yaà, bi séli tári láʔalee na bi sa nan lee na, pe kùúyi a le í, pe a be kúceri láa í, pe a tɔ́n í. Pe a pye kariga tári na.

³⁴ Bànaʔabèle, yaa cɛ́ɛn, yaa yákpogèle wáa! Yaa kòlogí tári na yele bele ye kínigi yaweeri yɛ́ʔɛ na lè! Níì cán cányi n nan, yee ni pe a yele kɔnɔgi lè, si yele cariga. Yele a too àmɛɛ yalejanga nyɛ gi too lè.

³⁵ Tɛɛlàraga ní o nyɛ bànaʔabèle ma í! Kàsuro-jée-tɛ́ʔɛ ní o nyɛ yaweeri yɛɛ̀kinibéle ma í!

³⁶ Ye bànaʔabèle yákpowáara lóʔo, ní yaweeri yɛɛ̀kinibéle cɛ́ɛnmɛ, níì cán Yawe n be yaweenaʔa-tɛ́ɛgi kálagi.

³⁷ Yaweeri tɛɛsùluyo yi pye lè yɛɛ̀nyinge na kàfulogo ní o lúro yi ni í, Yawe fundanʔari káfugbanga báriga ni.

³⁸ Wi n wi tɛɛkòrogi yaʔa àmɛɛ càaraɔ nyɛ, wee wi wi tɛɛlàragi yaʔa lè. Níì cán pe tári n kàri tɛɛ̀kalagiga kálagifɔw fundanʔagbɔɔrɔ, ní wi fundanʔari káfugbanga báriga ni.