Zyeremii 24 - Cebaara Bible 2010

Děsyaangi sɛ̀ʔɛgēle siin

¹ A Yawe děsyanʔa sɛʔɛgéle siin tɛ̀ɛn mii na, gele ge pye lè wodɛʔɛgéle ní Yawe kpɔ̀ʔɔrɔli kpaʔa yɛ́ʔɛ ma. Koro n gi taa Babilɔni fànʔafɔw Nebukadinezari maa baa Yehoyakimi jáaw Yekonyahu cò Zyerusalɛmi ni, wi pye lè Zyuda fànʔafɔw n kári Babilɔni ma n fàra Zyuda syɛɛnkpolobèle na, ní minizyebèle, ní fɔ̀nɔbèle.

² Děsyanʔa n pye sɛ̀ʔɛlaa nibin ni, gee gi nyɔɔ lè gbanʔama àmɛɛ děsyaan-wozelijɔʔɔ nyɛ lè, á sɛ̀ʔɛlee děsyanʔa si tɔ̀nɔ n pee gbanʔama, gee gi pye lè ki a gbǎn lìi í àmɛɛ di pee n sɔ̀lɔ lè.

³ A Yawe mii pye: «Nyàʔá mɔ nyaa, Zyeremii?» A mii wi yari: «Děsyanʔa. Wojangi n tɔ̀nɔ n nyɔɔ cama, á wobeegi tɔ̀nɔ n pee cama, n pye ki a gbǎn lìi í ki peejaanrimi kéele na.»

⁴ A Yawe syɛ́ɛnri nan mii na kánmi naa na, ki n jo:

⁵ «Yawe wi syɛ́ɛnri naa joo, wi lè Isirayɛli Kolocɔlɔw, wi n jo: ‹Amɛɛ gi kpéʔele děsyaangi na, gee gi nyɔɔ lè, Zyuda syɛ́ɛnbèle bele mii nɛnɛ n yirige tɛ́ɛgi naa ni lè n tórigo Kalide ye tári ma, mii a wɔ́ɔ bele bee córo wojanbéle.

⁶ Mii a nyapiigèle le be ni pe nyɔɔmɔ kéele na, bi be lúrugo pan tári naa ma. Mii a be sámaga yérige, mii a ní be kálagi í, mii a be cɔ́rɔ, mii a ní be kíle kɔ́n í.

⁷ Mii a funyo kaan be ma jàngó pe gi cán bi cán mii wi nyɛ Yawe. Pe a pye mii syɛ́ɛnbèle, mii si pye be Kolocɔlɔw, níì cán pe a lúru pan mii ma ní be fúnyi myɛ ní.

⁸ Gee si gi děsyaangi kéele kwɔ́ɔ lè, gee gi pee lè n pye ki a gbǎn lìi í ki peejaanrimi kéele na, gee naa Yawe joo níì jo: ‹Kánmi bee na mii a Sedesyasi pye wi lè Zyuda fànʔafɔw, woro ní wi syɛɛnkpolobèle, ní Zyerusalɛmi wogorobèle, poro bele be kòro tári naa ni lè, ní bele be nyɛ wodɛ́ɛnbéle ní Ezyipiti tári ni lè.

⁹ Mii a be kàriga fyáara, ní wɔʔɔgɔ yáriga tári fànya myɛ ma, bi be pye faʔara, ní nɛ̀ɛnyɛnɛgɛ, ní kataanra, ní dánga yáriga tɛ́ɛyi myɛ ni, beè mii a be nɛnɛ bi tórigo lè.

¹⁰ Mii a ŋɔséew, ní kateekpɔɔgi, ní káfalagi yáama lége be níngi ni, bi taa be kwɔ́ɔ bi yiri tásaligi ni, gee mii da kaan be ma, ní be toolɛɛbèle ma lè.› »