Zyeremii 21 - Cebaara Bible 2010

Syɛɛnlurugoro kaanna fànʔafɔw Sedesyasi ma

¹ Yawe syɛ́ɛnri di nan Zyeremii na lè, lǎli ni fànʔafɔw Sedesyasi Malikiya jáaw Pasyihuri, ní Maaseya jáaw Sáriga-wòlow Sofonii tun wi ma lè, pe sa wi pye:

² «Yawe yíbe wolo ma. Níì cán Nebukadinezari, wi lè Babilɔni fànʔafɔw, wi i kapɛɛnnɛ kpúmɔn ní wolo ní. Dɔ̀ʔɔ́ Yawe a ní wi kakpɔɔgaa kpéʔele wolo nyɔɔmi kéele na, koro ga pye wi léeli wolo na.»

³ A Zyeremii be pye: «Ye sa gi joo Sedesyasi ma yé wi pye:

⁴ ‹Yawe wi lè Isirayɛli Kolocɔlɔw, woro wi syɛ́ɛnri naa joo níì jo: Wéle, mii a kapɛɛnkpumɔn-yáriri kolo lúrugo, dee di nyɛ yele kɔ́yi ni lè, ní dee ní yele kapɛɛnni kpúmɔn ní Babilɔni fànʔafɔw, ní Kalide ye ní lè, poro bele be tɛ́ɛn tǒw kàdoʔo ma n yele màʔa lè, mii a be kpóʔoro kěgi naa nínge ni.

⁵ Mii tiimaa si kapɛɛnni kpúmɔn yele kánmi na, ní kɔzánʔaga, ní séekɔlɔ, ní fundanʔara, ní fundanʔagbɔɔrɔ ní, ní àmɛɛ mii fúngi tɔ̀nɔ n yìri lè gbanʔama.

⁶ Mii a kěgi naa wòolo kpúmɔn, syɛ́ɛnbèle ní yaweeri. Káfalaga yáabeemɛ a be kpóo.

⁷ Koro kàdoʔo ma Zyuda fànʔafɔw wi lè Sedesyasi, ní wi falipyebèle, ní syɛ́ɛnbèle bele pe ga kòro kěgi naa ni lè káfalagi yáama, ní ŋɔséew, ní kateekpɔɔgi kàdoʔo ma, mii a be le Babilɔni fànʔafɔw Nebukadinezari kɔ́yi ni, ní be nigoobèle kɔ́yɔ ni, ní bele kɔ́yɔ ni pe be sìikwɔɔri caa lè. Wi a be kpúmɔn kpóo ní ŋɔséew nyɔ́ɔ ní, nyinimɛ fun, ní cɔɔnrimɔ fun, ní tɔʔɔlɔmɔ fun,› Yawe wi jo nya.

⁸ Mɔ a gi joo syɛ́ɛnbèle naa ma si be pye: ‹Yawe wi syɛ́ɛnri naa joo níì jo: Wéle, mii n sìíw kólogo, ní kùúw kólogo tɛ́ʔɛ yele yɛ́ʔɛ ma.

⁹ Wee wi ga kòro kěgi naa ni lè, ŋɔséew, ní kateekpɔɔgi, ní káfalagi yáama a wi kpóo. Kàjáa, wee wi ga yiri n sáà wiyɛɛ gaan lè Kalide ye ma pe baa tɛ́ɛn yele taana lè kapɛɛnni kánma na, wi sìíw a pye wi ma yataʔa.

¹⁰ Níì cán mii a mii yɛ́ɛgi wáa kěgi naa ma bi kapeʔe pye gi na, kacànna ban mii a pye gi na í, Yawe wi jo nya. Ki a le Babilɔni fànʔafɔw kɔ́yɔ ni, wi a gi sórigo ní naà ní.›

Gee gi joo fànʔafɔw kpaʔa kéele na lè

¹¹ «Ki joo Zyuda fànʔafɔw kpaʔa wòolo ma mí be pye: ‹Ye Yawe syɛ́ɛnri lóʔo!

¹² Davidi kpáagi wòolo! Yawe wi syɛ́ɛnri naa joo níì jo: Yaa kútiiw nyuu ní sínnɛ ní bi séli nyǐngi nyɔ́ɔ na, wee na be fǎngi gbàn lè, ye wi yirige wi wɔʔɔfɔw kɔ́yɔ ni, koro ga pye mii fundanʔari a kɔ́ folo cò àmɛɛ naà nyɛ lè bàā có bi pye syɔɔn a ní gbǎn di fígi í, yele nàʔabeemi kéele na.

¹³ Wéle, mɔ ní mii cáan, mɔ wee wi nyɛ lè wodɛ́ɛɔn ní jǐnlɔgi ǹjoʔo ni, tɛɛfiigi fálaga na, Yawe wi jo nya, yele bele ye gi nyuu lè níì jo: Wìí syɔ́ɔn wi a tìgi bi pan wolo kánmi na? Wìí wi a jée wolo tɛɛkòroyi ni?

¹⁴ Mii a keele tɛ́ʔɛ yele na bi yɛlɛ ní yele kapyegèle yasanra ní, Yawe wi jo nya. Mii a naà le yele kɔ́ligi na, gee bee a tɛ́ɛyi myɛ sórigo, yee yi yele màʔa lè.› »