Zyeremii 20 - Cebaara Bible 2010

Zyeremii leli kéele yakparagi na

¹ Imɛɛri jáaw Pasyihuri wi pye lè sáriga-wòloo, ní i nyɛ Yawe kpáagi fálisaanri-wélere kundigi, a woro kérigèle bee lóʔo, gele Zyeremii da ni nyaagi ni nyuu lè.

² A Pasyihuri kanyaajoow Zyeremii kpúmɔn níì wi le yakparagi na n táriga Bɛnzyamɛ ǹjoʔo ma kpàánweeli na, Yawe kpáagi ni.

³ Kàjáa ki nyǐndaligi na a Pasyihuri be pye a be Zyeremii yirige yakparagi na. A Zyeremii wi pye: «Yawe a ní da mɔ yiri Pasyihuri í, kàjáa wi a ra mɔ yiri Magɔri-Misabiibi.

⁴ Níì cán syɛ́ɛnri naa Yawe joo níì jo: ‹Wéle, mii a fyáakpɔɔrɔ cáan mɔ ní mɔ taannyɛnbèle myɛ na. Pe nigoobèle ŋɔsée a be cáan, mɔ nyapiigèle a gi nyaa. Mii a wɔ́ɔ Zyuda ye myɛw le Babilɔni fànʔafɔw kɔ́yɔ ni, wi a be cò bi kári Babilɔni ma, si pèle kpóo ní ŋɔséew ní.

⁵ Mii a kěgi naa lɔ́rɔ myɛ, ní gi yakɔnri myɛ, ní gi yacanri myɛ le kɔyɔ ni. Mii a Zyuda fànʔafɔbèle lɔ́rɔ tɛɛkɔnyɔ myɛ le pe nigoobèle kɔ́yɔ ni. Pe a di fuguri láa bi di koli kári Babilɔni ma.

⁶ Mɔ si na, Pasyihuri, ní bele myɛ be nyɛ mɔ kpáagi ni lè, yele a kári púlori na. Mɔ a kári Babilɔni ma, nɛɛ bee mɔ a sa kùu, nɛɛ bee pe a mɔ tɔ́n, mɔ ní mɔ taannyɛnbèle myɛ ní, poro bele má mɔ jànvaa kanyaajoori joo lè.› »

Zyeremii i wi funbɛɛnri nyuu Kolocɔlɔɔ ma

⁷ Yawe, mɔ n mii lɛ́ɛlɛ n pùuni, a mii niyɛɛ yaʔa a mɔ lɛ́ɛlɛ n pùuni. Mɔ n mii cò, a mɔ fànʔa taa. Mii n pye kataanra yála canʔa o canʔa, pe myɛ i peyɛɛ nyɛ́nɛ mii na.

⁸ Mii ga ni nyuu lǎlee faala ni lè, fwɔɔ mii í da yákpoli wáa, fwɔɔ mii í da gi nyuu si jo: «Tanʔara ní kálagila!» Pe i mii faari ní i mii kpàná canbogi myɛ ni Yawe syɛ́ɛnri kéele na.

⁹ Mii ga gi joo níì jo: «Mii a ní wi kéeli joo í, mii a ní joo wi mɛ́ɛgi na í,» lǎli bee ni ki n pye mɔ a joo naà i có mii ni, gee gi nyɛ mii kaceleyi fúngo ni lè. Mii n ni ŋàʔaná bi gi cǒ yérige, mii fánʔa si a taa í.

¹⁰ Mii i syɛɛnnɛʔɛmɛ syɛɛn-ŋúnuŋunuro lúro a pe i gi nyuu níì jo: «Fyáakpɔɔrɔ i nyɛ kàbanyi myɛ na! Yaa gi nyuu yaa tèé! Waa gi nyuu waa tèé!» Bele myɛ pe da pye ní mii ní lè yɛɛ̀nyinge na, pe i mii tooli caa ní i gi nyuu níì jo: «Dɔ̀ʔɔ́ wi a wiyɛɛ yaʔa be fáana pùuni, wolo si wi taa jáa, si gɔ̀lɔ́w wòlo wi na!»

¹¹ Kàjáa Yawe i nyɛ ní mii ní àmɛɛ fànnɛʔɛgɛ sanbali nyɛ lè. Koro na mii wɔʔɔfɔbèle a kpírige, pe a fànʔa taa í. Fɛ̀ɛrɛ a tɔ̀nɔ́ be taa àmɛɛ gi nyɛ lè be fanʔa ga taa í. Ki a pye bàngwɔɔ nyáʔamina, lee li lè syɔɔn a fɛ̀ʔɛ li na í.

¹² Yawe, mɔ wi lè Nyɛ̀ʔɛni Sùlasiibéle Kafɔlɔ, mɔ wee wi syɛɛnsiɔn sɛʔɛ ni wéle lè, mɔ i syɔɔn kasɔ̀ngugèle ní wi fúngi myɛ nyaagi. Mii a mɔ gɔlɔ́-wòlori nyaa, dee mɔ a kpéʔele be na lè. Níì cán mɔ má mii mii kéeli kàlifáa.

¹³ Yaa ŋúu Yawe ma, yaa Yawe sòoló! Níì cán wi i foomɔfɔw kíle ni yirigi kapeebyebèle kɔ́yɔ ni.

¹⁴ Ki n yɛlɛ cángi í dánga, gee ni mii see lè! Cángee ni mii nɔ́ɔw mii see lè ki ga yɛlɛ dùba í pye gi na í!

¹⁵ Nǎnwee wi sáà syɛ́ɛnri naa joo mii tóow ma lè, níì wi pye: «Pe n pyà see mɔ ma nànbile,» níì wi kaan a wi nyìn fundaanri na lè, ki n yɛlɛ syɔ́ɔnw bee í dánga!

¹⁶ Ki n yɛlɛ nǎnw bee í pye àmɛɛ kěyi nyɛ, yee Yawe kálagi lè nyínimɛ fun ni! Ki n yɛlɛ waa yákpogèle lúro nyǐngi nyɔ́ɔ na, ní kapɛɛnnɛ sùpiigéle cânvulɛɛli na!

¹⁷ Ki maa yɛlɛ wi mii kpóo yaà mii nɔ́ɔw láʔa ni, mii nɔ́ɔw a dée pye mii nyángi, ficɛnni a dée kòro wi na làla o làla!

¹⁸ Nyàʔá na mii caà yiri mii nɔ́ɔw láʔa ni bi ba ra fɔ̀rɔgi, ní wɔʔɔgi nyaagi bi mii cányi kwɔ́ɔ fɛ̀ɛ́ri ni?