Zyeremii 2 - Cebaara Bible 2010

Lòcǎngi púloweele, lǒgi weèpáʔalaya ni

¹ Yawe syɛ́ɛnri n nan mii na, wi n jo:

² «Da syée mi sa yákpoli wáa ní syɛ́ɛnri naa ní mi le Zyerusalɛmi syɛ́ɛnbèle líiweegéle ni mí jo: ‹Yawe n jo: Mii i sɔ̀ngí ni taagi mɔ picaagi làla tàmaga na, ki lè mɔ larijoli tàmaga, lǎli ni mɔ da taʔa mii na lè fìími tára ni, táraa ni, dee di pɛɛn lè.

³ Isirayɛli maa yaʔa kɔlɔ̀ na Yawe ma, wi n pye wi yataari yaselire. Bele myɛ pe da ni líi di na lè, pe maa ni kolomɔ cáan peyɛɛ na, wɔʔɔyi maa ni tuun be na,› » Yawe wi jo nya.

⁴ Zyakɔbi kpáagi wòolo, ye Yawe syɛ́ɛnri lóʔo, ní yele myɛw ye nyɛ lè Isirayɛli kpáagi narigbaaya woolo.

⁵ Yawe wi syɛ́ɛnri naa joo níì jo: «Sìnzinmìí félege yele tóobèle nyaa mii na, a koro be kaan a be léeli mii na, ní sáà peyɛɛ bwɔɔ gbanzan yáriyi na, a poro tiimaw baa pye gbanzan yáriya?

⁶ Pe si ga wɔ́ɔ̀ gi joo í, níì jo: ‹Sán Yawe nyɛ woro wee wi wolo yirige Ezyipiti tári ni lè, níì kíni wolo yɛ́ɛgi na fìími tára ni, lɔ̀ʔɔ fun tára, ní gòrógoroweeye tára ni, waama ní kùu yébilimɛ tára ni, táraa ni, dee di lè syɔɔn faala da ni sɔ̀lɔ́ yaà í, ní beè lè syɔɔn faala da pye í?›

⁷ Mii n pan ní yele ní tiire séye tára ma, jàngó yele í ba ra yasanri ní yacanri líi. Kàjáa yele n pan, a yele baa mii tári kàriga yanɔnʔɔgɔ. Yele n baa mii kɔ́rigi pye yanibɛɛnmɛgɛ.

⁸ Sáriga-wòlobèle ga gi joo níì jo: ‹Sán Yawe nyɛ í?› Làlwaw kɔ́rɔjoofɔɔlɔ ga mii cán í. Bànaʔabèle n mii cée. Kanyaajoobèle i kérigèle nyaagi ni nyuu Baali mɛ́ɛgi na. Pe n peyɛɛ daʔa fànʔa fun yáriya na.

⁹ Koro na mii a ní kútii joo yele na,» Yawe wi jo nya. «Mii a kútii joo yele pìíbèle pìibēle na.

¹⁰ Koro na ye sɔ̀lɔ Kitiimi lǒgi nínge tátɛɛgéle ma ye gi wéle! Ye tun Kedaari ma, ye sámaga ye wéle, ye wéle kapye gi felege n kɔ́ɔ̀ pye.

¹¹ A syɛɛnfelegaa i gi kolocɔlɔbèlē fɛ̀ɛ́ lé, àlí n gi yaʔa pe o nyɛ kolocɔlɔ-tèlebēle í? A mii syɛ́ɛnbèle si be nìjanri fàli fànʔa fun yáriga na.

¹² Nyɛ̀ʔɛgèle, yaa káama gee bee na, ye pye funwɔɔrɔ na, yáā fɛ̀ɛgí gbanʔama,» Yawe wi jo nya.

¹³ «Níì cán kapeeye siin mii syɛ́ɛnbèle kpéʔele. Pe n mii yaʔa, mii wee wi lè sìíw lɔ́ʔɔ pùnweele, ní sa ni lɔ̀ʔɔ wéeyaa túru peyɛɛ ma, lɔ̀ʔɔ wéeyaa, yee yi páʔala páʔala lè, yee yi lè lɔ̀ʔɔ a gbǎn kòro yi ni í.

Yawe yaʔali i nyɛ kapeele

¹⁴ «A Isirayɛli i nyɛ lé puloo, wàlá wee be see lè puloo? Nyàʔá na wi jée kolifɔbèle kɔ́yɔ ni?

¹⁵ Càarabiiye i kaana wi na, ni yákpogèle wáa, ní i wi tári kálagi. Wi kěyi n sógi. Syɛ̀ɛnnɛ ní o yi ni í.

¹⁶ Alí Nɔfi ní Takipanɛsi wóbèle i mɔ káa nyǔngi nínge ni àmɛɛ nyàā nyɛ lè.

¹⁷ Gee bee o kpéʔele mɔ na àmɛɛ mɔ Yawe mɔ Kolocɔlɔw yaʔa lè lǎli tiimaa ni, lee ni wi da kíni mɔ yɛ́ɛgi na kólogi ni lè ì?

¹⁸ Tɔ́ɔliw ni nyàʔá mɔ kpéʔele Ezyipiti kólogi na, bi kári sa Niili cábigi lògaa gbaa lé? Nyàʔá mɔ kpéʔele Asirii kólogi na, bi kári sa cábigi lògaa gbaa lé?

¹⁹ Ki n yɛlɛ mɔ péemi sàra í kaan mɔ ma, mɔ sinzinmi kèlē í wɔʔɔgɔ taʔa mɔ na. Ki n yɛlɛ mɔ í gi cán, si gi nyaa bi cán bi Yawe mɔ Kolocɔlɔw cée, gee bee i nyɛ yapeʔe, ní yasorogo, wàlá bi pye fyáakaanna fun mii kàbangi na,» Nyɛ̀ʔɛni Sùlasiibéle Kafɔlɔ Yawe wi jo nya.

Isirayɛli i nyɛ cêkalagiga ní nànjaacɔɔ̀

²⁰ «Nlaa yaà làridɔɔnnɔ ni mii n mɔ zúuw kabi, níì mɔ yapwɔɔri cɛnɛ. A mɔ gi joo níì jo: ‹Mii ní o caa bi pye puloo í.› Kàjáa mɔ i lɛ̀ɛlɛ́, dǎndama-tɔ́nɔyi myɛ na, ní tiipiriyi myɛ láara ni àmɛɛ nànjaacɔɔ̀ nyɛ lè.

²¹ Mii maa mɔ cɔ́rɔ àmɛɛ ɛrɛzɛn tíricànga nyɛ lè, yacɔ́rɔgɔ, gee gi sámaga n yére lè. Mɛ̀ɛ́ si mɔ baa kàri nya mii kàbangi na n pye ɛrɛzɛn tíri-nibɔngɔ kágangèlē?

²² Alí mɔ ga yajeenɛʔɛgɛ le gbǎnga ni n tɛ́ʔɛ n miyɛɛ jée kanma o kanma na, mɔ kolomi a sèʔé kòro yaà mii yɛ́ʔɛ ma,» Kàfɔw Yawe wi jo nya.

²³ «Mɛ̀ɛ́ mɔ a gbǎn gi joo si jo: ‹Mii ga niyɛɛ nɔ́nʔɔ í. Mii ga niyɛɛ bwɔɔ Baalibèle kpɔ̀ʔɔrɔlɔ na í.› Mɔ nyɔngèle wéle jǐnlɔgi ni. Ki cán gee mɔ kpéʔele lè fàlibaacaa-faʔala, lee li nyaari ni máari lè.

²⁴ Seʔe jofanicaala, lee li tàli fìími tára na lè, li ki laànitaagi sɔ̀ngurɔ gbànna báriga ni li i káfalagi fàrá, wìí wi a li yérige li kanidaanni na. Bele myɛ pe li caa lè ki o nyɛ be ma fɔ̀rɔgɔ í. Pe i li nyaagi li yégi làla ni.

²⁵ Da miyɛɛ kɔ̀rɔsíi, mɔ tɔ́lɔyi a kɔ́ kòro wowaaya ní í, mɔ a kɔ́ mɔ yákpodirigi yaʔa ki waʔa í dɛ! Kàjáa mɔ n jo: ‹Eʔe! Koro o nyɛ yafyɛn í. Níì cán nibɔnbèle kéele n mii dɛ́nɛ. Mii i caa bi niyɛɛ bwɔɔ be na.›

²⁶ Amɛɛ fɛ̀ɛrɛ kàyuuo taagi lǎli ni pe ga wi taa n cò lè, kánmi bee na fɛ̀ɛrɛ bele taa be nyɛ lè Isirayɛli kpáagi wòolo, poro ní be fànʔafɔbèle, ní be syɛɛnkpolobèle, ní be sáriga-wòlobèle, ní be kanyaajoobèle.

²⁷ Poro bele pe gi nyuu tíige ma lè si jo: ‹Mɔ wi nyɛ mii tóow!› Ní kàdɛnɛgɛ ma si jo: ‹Mɔ wi mii see!› Níì cán pe kàdoyi be wáa mii ma, pe yɛ́ɛyi ban í. Lǎlee si ni wɔʔɔlɔ ga nan be na lè, pe n ni gi nyuu si jo: ‹Yìri mi wolo syɔɔ.›

²⁸ Koro na sán mɔ kolocɔlɔbèle nyɛ, bele mɔ sámaga n pye miyɛɛ wòolo lè? Ki n yɛlɛ be yìri kapye pe a gbǎn mɔ syɔɔ wɔʔɔgi làla ni. Níì cán mɔ kolocɔlɔbèle n nɛʔɛ n sɔ̀lɔ mɔ keyi na, ee Zyuda.

²⁹ Nyàʔá na gi yɛlɛ yele í pye kútii na ní mii ní? Yele ye myɛw n yeyɛɛ bye niceebéle mii kánmi na,» Yawe wi jo nya.

³⁰ Mii n yele jáabèle kpúmɔn koro ga yafyɛn nyɔɔ í. Pe ga fɔ̀lɔ tamani na í. Yele ŋɔséew n yele kanyaajoobèle lìi, àmɛɛ càaraɔ nyɛ wee wi gàlagí kpéʔele lè.

³¹ Ee! Yele ye nyɛ lè lǎli naa syɛ̀ɛnnɛ, ki n yɛlɛ yaa Yawe syɛ́ɛnri córo! A mii da pye lé fìimɛ tára Isirayɛli ma, wàlá yébilimɛ tára? Nyàʔá na mii syɛ́ɛnbèle gi nyuu níì jo: ‹Wolo i nyɛ woyɛɛ ma, wolo o caa bi ní lúru pan mɔ ma í?›

³² A pìcaa i fɛ̀ʔɛ́ lé wi fèreri yárira na, pìcaaw nìgɔcariɔ cò lè, wi fɛ̀ʔɛ lé wi fèreri na? A mii syɛ́ɛnbèle si fɛ̀ʔɛ mii na, nlaa yaà córomɔ fun canya ni.

³³ Ee! Kánmee na mɔ wári lè mɔ tánʔaganmi ni, tàmagi caala kurugo, kánmi bee wonijanma na mɔ wɔ́ɔ̀ mɔ tánʔaganbeemi kpéʔele tamana.

³⁴ Tɛɛlɛ fun foomɔfɔbèle sìsyaan n nyaa mɔ buronyɔɔw na n gi yaʔa mɔ ga be cò kàyuugo na í.

³⁵ Kàjáa gee bee myɛ fúngo ni mɔ i gi nyuu níì jo: ‹Mii tɔ̀nɔ́ i nyɛ tɛɛlɛ fun, wi fundanʔari n yɛlɛ bi láʔa mii na.› Mii wi wee! Mii a mɔ kɔ́ri bi kári kútii na. Níì cán mɔ i gi nyuu níì jo: ‹Mii ga kapeele pye í.›

³⁶ Nyàʔá na mɔ fúngi wári nya bi mɔ kólogi fàli? Fɛ̀ɛrɛ si a wɔ́ɔ mɔ taa Ezyipiti kéeli na, àmɛɛ fɛ̀ɛrɛ mɔ taa lè Asirii kéeli na.

³⁷ Mɔ a wɔ́ɔ yiri yaà beè ní kɔ́yi ní wodugoyo ní nyǔngi ni. Níì cán bele na mɔ miyɛɛ daari lè, Yawe i bele bee yaari. Mɔ a tée dɛ̀ɛmɛnɛ taa be ma í.»