Zyeremii 19 - Cebaara Bible 2010

Kasànjaali

¹ A Yawe syɛ́ɛnri naa joo mii ma níì jo: «Da syée mi sa cóoro kasànna syɔɔ cóofaanw ma, mí syɛɛnfelegi wólɛɛbèle pèle, ní sáriga-wòlobèle wólɛɛbèle pèle pínɛ ní miyɛɛ ní,

² mi yiri maa syée Bɛn-Hinɔmi jǐnlɔgi ma, ki i nyɛ Cóofaan-tɛ́ɛgi kpàánweele yɛ́ʔɛ ma. Mɔ a sa yákpoli wáa ní syɛ́ɛnri ní yaà beè, dee mii a joo mɔ ma lè.

³ Mɔ a gi joo si jo: ‹Ye Yawe syɛ́ɛnri lóʔo, Zyuda fànʔafɔbèle, ní Zyerusalɛmi ye! Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: Wéle, mii a wɔʔɔgɔ cáan tɛ́ɛgi naa na, gee ki a gi lóʔofɔbèle líiweegéle wáriga lè.

⁴ Níì cán pe n mii yaʔa, pe n tɛ́ɛgi naa kàriga tɛɛgaa gee ni syɔɔn pùuní lè. Pe i nùndaanni yáriga kaangi kolocɔlɔbèle pèle nikwɔɔlɔ ma gi ni, bele be lè pe tiimaw, ní be toolɛɛbèle, ní Zyuda fànʔafɔbèle da be cán í. Pe n tɛɛlɛ fun syɛ́ɛnbèle sìsyaan tɛ́ʔɛ n tɛ́ɛgi naa nyìn.

⁵ Pe n sáriga-wòlo-tɛ́ɛyɛ faan Baali ma bàā be jáabèle sórogi náagi ni, sáriga-sórigoo Baali ma, gee gi lè mii da gi kéeli joo n gbàn í, gee gi lè mii da joo gi na í, gee gi lè ki da caà jée mii sɔ̀nguri ni í.

⁶ Koro na wéle, canyaa i maa, Yawe wi jo nya, yee ni lè pe a ní da tɛ́ɛgi naa yiri Tofɛti í, ní Bɛn-Hinɔmi jǐnlɔgɔ í. Kàjáa pe a ra gi yiri kpóobeeli jǐnlɔgɔ.

⁷ Tɛ́ɛgi bee ni mii a Zyuda ye ní Zyerusalɛmi ye katimanani kálagi. Mii a gi yaʔa ŋɔséew í be kpóo cáan pe nigoobèle yɛ́ʔɛ ma, ní bele pe be sìikwɔɔri caa lè, bele bee kɔ́yɔ í be kpóo. Mii a be kúceri kaan nyɛ̀ʔɛni féjɛɛnrɛ, ní tári yaweere ma ti lìile.

⁸ Mii a kěgi naa pye funwɔɔrɔ yáriga, ní kataanra yáriga, bele myɛ pe ga ni sɔ̀lɔ́ gi taana lè, ki a be fúnyi wɔ́ɔ, pe a ra gi tɛ́ʔɛ ki wɔʔɔyi myɛ kéele na.

⁹ Mii a be yaʔa paa be nànbiigèle cére ní be calipiigèle cére káa, pe myɛ nibin nibin a ra be syɛɛnnyɛnbèle cére káa, lǎli ni pe nigoobèle ga be sùlu n le lè a pe i wɔʔɔ, ní bele pe a ra be sìikwɔɔri caa lè.›

¹⁰ Koro kàdoʔo ma nǎnbèle pe a pínɛ kári ní mɔ ní lè mɔ a kasǎnni jaa bele bee nyɛ́nɛ na, si be pye:

¹¹ ‹Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: Kánmi naa na mii a syɛ́ɛnbèle naa ní kěgi naa jaa, àmɛɛ be cóofaaɔn kasànna jee lè li si a ní gbǎn sámaga í. Pe a ra kúbèle tɔ́ngi Tofɛti ni, tɛ́ɛgi fɔ̀ngɔ kéele na.

¹² Kánmi bee na mii a gi kpéʔele tɛ́ɛgi naa na, Yawe wi jo nya, ní gi syɛ́ɛnbèle na, mii a kěgi naa kàriga gi pye àmɛɛ Tofɛti nyɛ lè.

¹³ Zyerusalɛmi kpáayi, ní Zyuda fànʔafɔbèle kpaaya a pye yanɔnʔɔyɔ àmɛɛ Tofɛti nyɛ lè, kpáayi bee myɛ, yoro yee ǹjoyo ni pe da ni nùndaanni yáriga kaangi nyɛ̀ʔɛni ŋɔ́ripiigéle myɛ ma lè, ní i sáriga-yólogow wóo kolocɔlɔbèle pèle nikwɔɔlɔ ma.› »

¹⁴ A Zyeremii ga yìri yaà Tofɛti ma n lúru n pan, beè Yawe da wi tórigo wi sa kérigèle nyaa-mí-joolo kpéʔele lè, a wi baa yére Yawe kpáagi kadàala na, níì gi joo syɛ́ɛnbèle myɛ ma níì jo:

¹⁵ «Yawe wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, woro wi syɛ́ɛnri naa joo níì jo: ‹Wéle, wɔʔɔyi myɛ kéele mii joo kěgi naa kánma na lè, mii a yi yaʔa yi too gi na, ní kěyee myɛ na, yee yi nyɛ gi taana lè. Níì cán pe n be nyùngbaabèle kpee jàngó poro a kɔ́ mii syɛ́ɛnri lóʔo í.› »