Zyeremii 18 - Cebaara Bible 2010

Zyeremii kárili kéele cóofaanw kpaʔa ma

¹ Yawe syɛ́ɛnri n nan Zyeremii na kánmi naa na, wi n jo:

² «Yìri mi tìgi yaà cóofaanw kpaʔa ma, mii a sa mii syɛ́ɛnri joo mɔ í lóʔo yaà beè.»

³ A mii tìgi yaà cóofaanw kpaʔa ma. Wéle, wi maa pye kòdɔɔlɔ faanna na cétɛʔɛ na.

⁴ Kòdoli wi da ni faanri lè, a li kálagi, àmɛɛ gi kpéʔele ní cóori ní lè cóofaanw kɔ́lɔ ni, a wi níì kòdolaa nikwɔɔ faan àmɛɛ ki wi dɛ́nɛ bi gi kpéʔele lè.

⁵ A Yawe syɛ́ɛnri nan mii na kánmi naa na, wi n jo:

⁶ «Isirayɛli kpáagi wòolo, mii a wɔ́ɔ gbǎn gi kpéʔele yele kéeli na àmɛɛ cóofaanw naa gi kpéʔele lè ì?» Yawe wi jo nya. «Wéle, àmɛɛ cóori nyɛ cóofaanw kɔ́lɔ ni lè, kánmi bee na yele nyɛ mii kɔ́gi ni, Isirayɛli kpáagi wòolo.

⁷ Làlaa ni mii ga gi joo syɛɛnfelegaa, wàlá fàngaa kéele na níì jo gi kɔ́n bi yiri yaà, bi kpúmɔn cáan, bi kálagi,

⁸ kàjáa syɛɛnfelegi bee kéele na mii ga joo lè, ki ga láʔa ki péemi na, lǎli bee ni mii n kàdoʔo wáa kapeegi pyele ma, gee mii da joo mii a kpéʔele gi na lè.

⁹ Mii ga gi joo syɛɛnfelegaa, wàlá fàngaa kéele na níì jo ki faan, ki cɔ́rɔ,

¹⁰ kàjáa syɛɛnfelegi bee ga ni gi kpéʔele, gee gi pee mii nyɛ́nɛ na lè, ki ga fɔ̀lɔ n mii jóomi lóʔo í, kacǎngee mii da kɔ̀rirɔ n tímana bi kpéʔele gi ma lè, mii n kàdoʔo wáa gee bee pyele ma.

¹¹ Ki joo tɔ́ɔliw ni Zyuda nǎnbèle, ní Zyerusalɛmi ye ma, mí be pye: ‹Yawe wi syɛ́ɛnri naa joo níì jo: Wéle, mii i wɔʔɔgɔ sámagi yele kánmi na, mii i yele kálagila kéele tímana. Ki n yɛlɛ ye myɛ nibin nibin í láʔa ye kóbeeyi na. Ye yele kóloyi ní yele nàʔami fàli.›

¹² Kàjáa pe i gi nyuu níì jo: ‹Gee bee i nyɛ gbanzan! Wolo i caa bi woyɛɛ daʔa wolo funzɔnguri na, wo myɛ nibin nibin a taʔa wolo péemi zɔ̀ngbaɔn na.› »

Isirayɛli ye n fɛ̀ʔɛ be Kàfɔw na

¹³ Koro na Yawe syɛ́ɛnri naa joo níì jo: «Ye yíbege kpéʔele syɛɛnfeleyi nínge ni! Wìí wi kɔ́ɔ̀ gi felege lóʔo? Nàngeele sinján Isirayɛli n tɔ̀nɔ n kapeekpɔʔɔ kpéʔele.

¹⁴ A Liban lànɛɛzyiw i kwóo lé sìnbirigi fálaga na? Lònyíngi gi yìrigí yaà lè léelige ni fóo ni tíri, a ki i kwóo lé?

¹⁵ A mii syɛ́ɛnbèle si fɛ̀ʔɛ mii na, pe i nùndaanni yáriga kaangi yasunyo ma. Koro n be kaan a be tàra n yiri be kóloyi ni, pe kolɛɛyi ni jàngó bi kobiigèlē láa, koloyaa yee yi lè yi ga kpoori í.

¹⁶ Pe n be tári pye funwɔɔrɔ yáriga ní kataanra yáriga, a gi kòro nya làla o làla. Bele myɛ be sɔ̀lɔ́ yaà lè, ki n be nyínima, a pe i nyǔnyi kólo.

¹⁷ Mii a be cariga pe nigoobèle yɛ́ʔɛ ma, àmɛɛ canʔafolomɔ káfalagi gi kpéʔele lè. Mii kàdogi mii a wáa be ma pe kálagili canʔa na, mii yɛ́ɛgi ban í.»

Pe n nyɔɔ kúun Zyeremii na, kanyaajoow nyɛ́ɛrigɛ

¹⁸ Pe n jo: «Yaa maa wo ba nyɔɔ kúun Zyeremii na! Níì cán bi sáriga-wòlobèle yaʔa beè, làlwaw a kwɔ́ɔ wàlá bi fɔ̀n sícilibēle ni, bele pe a ra wolo lálii lè í, wàlá bi fɔ̀n kanyaajoobéle ni, bele pe a ra nyuu wo ma lè í. Yaa maa wo ba wi kpúmɔn ní nyíngèle ní, syɛ́ɛnri myɛ wi nyuu lè wo a kɔ́ yákirii yaʔa di na í.»

¹⁹ Yákirii yaʔa mii na Yawe! Mii kàsiitun-nyɛ́nbèle yákpogéle lóʔo!

²⁰ A gi yɛlɛ lé be kapeʔe tɛ́ʔɛ bi kacànna sàra? Níì cán pe n weecurugo túgu bi mii bɔ̀nɔ mii sìíw ni. Sɔ̀ngi mi taa gi na àmɛɛ mii yére mɔ yɛ́ʔɛ ma lè níì joo ní mɔ ní pe nyɔɔmi kéele na, níì mɔ fundanʔagbɔɔri lúrugo be kurugo.

²¹ Koro na pe jáabèle kaan kateekpɔɔgi ma, pe ŋɔrigɔ mi wáa ŋɔséew nyɔ́ɔ ma, ki n yɛlɛ pe cébèle í bɔ̀nɔ pìibēle ni, si pye lɔgucaala, káfalagi yáama í be nǎnbèle kpóo. Ki n yɛlɛ ŋɔséew í be nìgɔcaribèle kpúmɔn kpóo kapɛɛnni làla ni!

²² Ki n yɛlɛ yákpogéle wáama í da lúro bàā yirigi be kpáayi ni, lǎli ni mɔ ga kapɛɛnkpumɔnbéle kabiga foo n tórigo be kurugo lè! Níì cán pe n weecurugo túgu jàngó bi mii taa cò, pe n mɛɛngéle le n cáan mii tɔ́lɔyi láara ni.

²³ Mɔ si na, Yawe, kérigèle myɛ be tímana mii kéeli na jàngó bi mii taa kpóo lè, mɔ n ge cán. Mɔ a kɔ́ be kolomi kùsulugo syɔɔ í, mɔ a kɔ́ be kapeeli kurugo láʔa yaà mɔ yɛ́ʔɛ ma í! Ki n yɛlɛ pe kpírige too mɔ yɛ́ʔɛ ma! Keele tɛ́ʔɛ be na mɔ fundanʔari làla ni!